અમદાવાદ: ગુજરાતની સૌથી મોટી અને મેટ્રો સિટીની અમદાવાદ મ્યુનિસિપલ કોર્પોરેશન (AMC) માં નોકરી મેળવવી એ લાખો યુવાનોનું સપનું હોય છે. પરંતુ જેમને આ નોકરી મળી ગઈ છે, તેઓ હવે કામના ભારણ અને પ્રેસરથી કંટાળીને સામૂહિક રાજીનામા આપી રહ્યા છે. AMCમાંથી કર્મચારીઓનો રાજીનામા પડવાનો સિલસિલો યથાવત્ છે. ગત મહિને જ ક્લાર્કથી લઈને ટેકનિકલ આસિસ્ટન્ટ સહિતના કેટલાક કર્મીઓએ રાજીનામા ધરી દીધા હતા, ત્યાં હવે વધુ 20 કર્મીઓએ નોકરી છોડી દેતા વહીવટી તંત્રમાં ખળભળાટ મચી ગયો છે.
નિમણૂકના 1 થી 2 વર્ષમાં જ નોકરીમાંથી મોહભંગ
સૌથી ચોંકાવનારી બાબત એ છે કે, રાજીનામું આપનારા મોટાભાગના કર્મીઓની હજુ એક-બે વર્ષ પહેલાં જ નિમણૂક કરવામાં આવી હતી. પ્રાપ્ત માહિતી અનુસાર, શારદાબહેન અને એલજી હોસ્પિટલ, સેન્ટ્રલ ઓફિસ, સોલિડ વેસ્ટ મેનેજમેન્ટ અને એસ્ટેટ સહિત મ્યુનિસિપલના વિવિધ વિભાગો અને પ્રોજેક્ટના કર્મીઓએ રાજીનામા આપ્યા છે.
જે 20 કર્મચારીઓએ રાજીનામા આપ્યા છે તેમાં નીચે મુજબની કેડરનો સમાવેશ થાય છે
- 13 સહાયક જુનિયર ક્લાર્ક
- 05 સહાયક ટેકનિકલ સુપરવાઇઝર
- સહાયક સબ ઇન્સ્પેક્ટર અને સહાયક ફિમેલ હેલ્થ વર્કર સહિત અન્ય કર્મીઓ
શા માટે છોડી રહ્યા છે AMC ની નોકરી? (મુખ્ય કારણો)
મેટ્રો સિટીની આટલી મોટી મહાનગરપાલિકામાં નોકરી છોડવા પાછળ માત્ર અન્ય નોકરી મળવી એ જ કારણ નથી, પરંતુ તંત્રની આંતરિક સિસ્ટમ પણ મોટી જવાબદાર છે.
કામનું અસહ્ય દબાણ (Workload): અમદાવાદ જેવા મેગા સિટીમાં વસ્તી અને વિસ્તારના પ્રમાણમાં સ્ટાફની અછત છે. જેના કારણે હાજર કર્મચારીઓ પર કામનું ભારણ એટલું બધું રહે છે કે તેઓ માનસિક તણાવ (Stress)નો શિકાર બની રહ્યા છે.
સરકારી અને રાજકીય પ્રેસર: AMC માં પબ્લિક ડીલિંગ અને વિવિધ પ્રોજેક્ટ્સમાં રાજકીય નેતાઓ, કોર્પોરેટરો અને ઉચ્ચ અધિકારીઓનું સતત પ્રેસર રહે છે. નાના કર્મચારીઓને સ્વતંત્રતાથી કામ કરવામાં પડતી મુશ્કેલીઓ તેમને હતાશ કરી રહી છે.
માનસિક શાંતિનો અભાવ: ફિક્સ પે (Fixed Pay) ના શરૂઆતના વર્ષોમાં આર્થિક વળતર ઓછું અને જવાબદારીઓ પહાડ જેવી હોવાથી યુવા કર્મચારીઓ માનસિક શાંતિ માટે અન્ય વિકલ્પો શોધી રહ્યા છે.
શાંતિ માટે નાની નોકરીઓ અને નાના શહેરોની પકડતા વાટ
આ અસહ્ય કામના દબાણ અને સરકારી પ્રેસરમાંથી મુક્ત થવા માટે કર્મીઓ મેટ્રો સિટી છોડીને નાના શહેરો કે અન્ય વિભાગોની નોકરીઓ સ્વીકારી રહ્યા છે. ઘણા કર્મચારીઓ ભાવનગર અને જામનગર મ્યુનિસિપલ કોર્પોરેશનમાં જતા રહ્યા છે, જ્યાં કામનું દબાણ અમદાવાદ કરતા ઓછું હોય. આ ઉપરાંત, કેટલાક કર્મીઓએ પોલીસ સબ ઇન્સ્પેક્ટર (PSI) તરીકે, તો કેટલાકે જેટકો (GETCO), એમજીવીસીએલ (MGVCL) અને રાજ્ય કૃષિ યુનિવર્સિટી સહિતના જુદા જુદા વિભાગોમાં નાની-મોટી નોકરીઓ શોધીને AMCને કાયમી અલવિદા કહી દીધું છે.
જો AMC નું વહીવટી તંત્ર કર્મચારીઓ પરનું દબાણ ઘટાડીને હકારાત્મક વર્ક-કલ્ચર ઊભું નહીં કરે, તો આગામી સમયમાં આ ‘બ્રેઈન ડ્રેઈન’ (Brain Drain) મહાનગરપાલિકાના કામકાજને માઠી અસર પહોંચાડી શકે છે.
આ પણ વાંચો – G-7 માં એક વર્ષ બાદ મળ્યા પીએમ મોદી અને ડોનાલ્ડ ટ્રમ્પ: જાણો મુલાકાતમાં શું થઈ ચર્ચા અને શું છે તેના કૂટનીતિક અર્થ?
