અમદાવાદ: કડક દારૂબંધી અને ઓર્ગેનાઈઝ્ડ ક્રાઈમના નીચા દર માટે સમગ્ર દેશમાં મોડેલ ગણાતા ગુજરાતના આર્થિક પાટનગર અમદાવાદની ‘સલામત શહેર’ (Safe City) હોવાની વર્ષો જૂની છબી હવે કડડભૂસ થઈ રહી છે. પોલીસ ઈમરજન્સી નંબર ૧૧૨ (112) ના લોગ બુકના આંકડાઓએ એક એવી કડવી વાસ્તવિકતા છતી કરી છે, જે દર્શાવે છે કે શહેરના જાહેર માર્ગો, રહેણાંક વિસ્તારો અને કોમર્શિયલ હબ હવે શેરી હિંસા, ગુંડાગીરી અને શારીરિક હુમલાઓનો ગઢ બની ચૂક્યા છે.
દર ૪.૮ મિનિટે હિંસાનો એક કૉલ!
ઓગસ્ટ ૨૦૨૫ ના અંતમાં શરૂ થયેલી ૧૧૨ ઈમરજન્સી હેલ્પલાઈનના ૩૩૪ દિવસના સત્તાવાર ડેટાનું વિશ્લેષણ ચોંકાવનારું છે. જુલાઈ ૨૦૨૬ સુધીમાં નોંધાયેલા કુલ ૨,૧૦,૫૯૩ ઈમરજન્સી કૉલ્સમાંથી ૧,૦૦,૦૮૧ કૉલ્સ માત્ર શારીરિક માથાકૂટ, જાહેર ઝઘડા અને હિંસક હુમલાના હતા. આ આંકડાઓનો સીધો અર્થ એ થાય છે કે અમદાવાદમાં દર ૪.૮ મિનિટે એક હિંસક ઝઘડો નોંધાય છે. એટલે કે ચોવીસે કલાક દર કલાકે સરેરાશ ૧૨ થી ૧૩ નાગરિકો હિંસાનો ભોગ બની રહ્યા છે.
અમદાવાદ પોલીસ કંટ્રોલ રૂમ (112) નો ચોંકાવનારો ડેટા
- કુલ ઈમરજન્સી કૉલ્સ: ૨,૧૦,૫૯૩
- જાહેરમાં વિવાદ / ઝઘડો: ૩૬,૨૩૮
- શારીરિક હુમલો (Assault): ૩૬,૧૬૧
- પીધેલાઓનો દંગલ / ઝઘડા: ૧૭,૦૫૦
- મહિલાઓ / બાળકો પર શારીરિક હુમલો: ૧૦,૬૩૨
- કુલ શારીરિક હિંસા અને વિવાદ: ૧,૦૦,૦૮૧
દારૂબંધીની પોલ : હિંસા પાછળ ‘પીધેલાઓનો આતંક’
ભાવનગરના લઠ્ઠાકાંડ બાદ ગુજરાત પોલીસે ભલે રાજ્યવ્યાપી દરોડા પાડીને કાર્યવાહીના દાવા કર્યા હોય, પરંતુ ૧૧૨ ના આંકડા કહે છે કે અમદાવાદમાં દારૂબંધી માત્ર કાગળ પર છે. જાહેર ઝઘડા અને હુમલાના નોંધાયેલા કેસમાંથી ૧૭,૦૫૦ કૉલ્સ સીધા દારૂના નશામાં ધૂત અસામાજિક તત્વો અને બુટલેગિંગથી પ્રેરાયેલી ગુંડાહરકતો સાથે જોડાયેલા હતા. એટલે કે રસ્તાઓ પર થતી દર ૫ માંથી ૧ હિંસક ઘટના ગેરકાયદે નશાને કારણે થાય છે. નશાખોરોએ હવે જાહેર બજારો અને રહેણાંક શેરીઓને પોતાનો અડ્ડો બનાવી લીધો છે.
વધતો ટોળાશાહીનો આતંક (Mob Aggression) અને લાચાર પોલીસ
આ આંકડાઓ શહેરમાં ટોળાશાહીની ઘાતક માનસિકતા પણ છતી કરે છે. વસ્ત્રાલમાં એક નાના વ્યવસાયિક વિવાદમાં ૨૦ જણાના ટોળાએ તલવારો અને લોખંડના પાઈપો સાથે એસયુવી (SUV) ચાલક પર જીવલેણ હુમલો કર્યો હતો. જ્યારે વાડજ સર્કલ પાસે તો બાળ અપહરણકર્તાઓની માત્ર અફવાને કારણે ૩૦ લોકોના ટોળાએ એક ઓટો-રિક્ષાને ઘેરીને ૪ મહિલાઓને બહાર ખેંચી ઢોર માર માર્યો હતો, જેમાં એક મહિલાનું કરુણ મોત નીપજ્યું હતું.
ઘરો સુધી પહોંચેલી હિંસાની આગ
આ આક્રમકતા માત્ર રસ્તાઓ સુધી સીમિત નથી. ૧૧૨ કંટ્રોલ સેન્ટર પર જીવના જોખમ (Threat to Life) ના ૫,૫૮૩ કૉલ, મૌખિક ગાળાગાળીના ૪,૭૬૯ કૉલ, ઘરેલુ હિંસાના ૩,૭૪૯ કૉલ અને મહિલા-બાળકોની સુરક્ષા અંગે ૫,૮૪૨ કૉલ નોંધાયા છે.
અન્ય મોટા મહાનગરોની સરખામણીએ અમદાવાદમાં ભલે ગેંગ-સિંડિકેટ ક્રાઈમ ઓછો હોય, પરંતુ દર કલાકે નોંધાતા ૧૩ હિંસક કૉલ્સ અને પોલીસની ઉપરછલ્લી કામગીરીએ શહેરની સાર્વજનિક સુરક્ષા પર એક મોટું અને ગંભીર પ્રશ્નાર્થચિહ્ન મૂકી દીધું છે.
આ પણ વાંચો – ગુજરાત સરકારની મોટી વહીવટી સર્જરી : રાજ્યની નગરપાલિકાઓના ૨૫ ચીફ ઓફિસરોની એકસાથે બદલી
