ગુજરાતમાં ડ્રગ્સની હેરાફેરી કરવા માટે બુટલેગરો અને માફિયાઓ રોજ નવા કીમિયા અજમાવી રહ્યા છે, પરંતુ અમદાવાદના આંતરરાષ્ટ્રીય એરપોર્ટ પર કસ્ટમ્સ વિભાગના એર ઇન્ટેલિજન્સ યુનિટ (AIU) એ એક મોટી કાર્યવાહી કરી આંતરરાષ્ટ્રીય ડ્રગ્સ સિન્ડિકેટના મનસૂબા પર પાણી ફેરવી દીધું છે. એઆઈયુની ટીમે બેંગકોકથી ગેરકાયદે રીતે લાવવામાં આવેલો અંદાજે ૧.૯ કરોડ રૂપિયાની કિંમતનો ‘હાઇડ્રોપોનિક ગાંજો’ (ઉચ્ચ ગુણવત્તાવાળો વિદેશી ગાંજો) જપ્ત કરી એક દંપતીની ધરપકડ કરી છે.
પ્રોફાઇલિંગ અને એક્સ-રે સ્કેનિંગમાં ફૂટ્યો ભાંડો
પ્રાપ્ત માહિતી અનુસાર, બેંગકોકથી અમદાવાદ ઇન્ટરનેશનલ એરપોર્ટ પર થાઈ એરવેઝની ફ્લાઇટ (TG-343) લેન્ડ થઈ હતી. કસ્ટમ્સ વિભાગ દ્વારા મુસાફરોનું રાબેતા મુજબ પેસેન્જર પ્રોફાઇલિંગ અને સામાનનું એક્સ-રે સ્કેનિંગ કરવામાં આવી રહ્યું હતું. આ દરમિયાન એઆઈયુના અધિકારીઓને એક દંપતીની હિલચાલ અને તેમના સામાન પર શંકા જતા તેમને અટકાવવામાં આવ્યા હતા.
ટ્રોલી બેગમાંથી મળ્યા ૧૦ વેક્યુમ-સીલ પેકેટ
અધિકારીઓએ શંકાસ્પદ મુસાફરોના સામાનની ઝીણવટભરી તપાસ શરૂ કરી હતી. તેમની ટ્રોલી બેગ ખોલતા તેમાંથી સિફતપૂર્વક સંતાડવામાં આવેલા વેક્યુમ-સીલ કરેલા ૧૦ પેકેટ મળી આવ્યા હતા. આ પેકેટો તોડીને તપાસ કરતા તેમાંથી કુલ ૧.૯૨૮ કિલોગ્રામ ઉચ્ચ ગુણવત્તા ધરાવતો ‘હાઇડ્રોપોનિક ગાંજો’ મળી આવ્યો હતો. આંતરરાષ્ટ્રીય ગેરકાયદે બજારમાં આ જથ્થાની અંદાજિત કિંમત અધધ.. ૧.૯ કરોડ રૂપિયા આંકવામાં આવી છે.
NDPS એક્ટ હેઠળ કડક કાર્યવાહી અને રિમાન્ડની તજવીજ
કસ્ટમ્સ વિભાગે તાત્કાલિક અસરથી આ નશાકારક પદાર્થનો જથ્થો ‘નાર્કોટિક ડ્રગ્સ એન્ડ સાયકોટ્રોપિક સબસ્ટન્સ’ (NDPS) એક્ટ, ૧૯૮૫ ની કડક જોગવાઈઓ હેઠળ જપ્ત કર્યો છે.
આ હાઇડ્રોપોનિક ગાંજો બેંગકોકમાં કોની પાસેથી ખરીદવામાં આવ્યો હતો?
ગુજરાતમાં આ માલ કોને સપ્લાય કરવાનો હતો?
આ કથિત દાણચોરીના નેટવર્કમાં સ્થાનિક કે અન્ય કયા લોકો સામેલ છે?
તેની ઓળખ કરવા માટે કસ્ટમ્સ વિભાગે પકડાયેલા દંપતીની સઘન પૂછપરછ શરૂ કરી છે અને આગળની કાયદાકીય તપાસનો ધમધમાટ શરૂ કર્યો છે.
આ પણ વાંચો – નેતાઓ અને કંપનીઓની મિલીભગત? ધોળકામાં 11મા દિવસે આંદોલન આક્રમક, ભાજપના ધારાસભ્યને જનતાની સીધી ચીમકી
