Narmada : સ્થાનિક સ્વરાજ્યની ચૂંટણીઓ માટે આજે ફોર્મ પરત ખેંચવાનો અંતિમ દિવસ હતો, ત્યારે નાંદોદ મામલતદાર કચેરીમાં હાઈ વોલ્ટેજ ડ્રામા સર્જાયો હતો. કેટલાક ભાજપ આગેવાનો નાંદોદ તાલુકાની ઉમરવા તાલુકા પંચાયતના કોંગ્રેસ પક્ષના ઉમેદવાર નયનાબેન વસાવાને મોંઢે બુકાની બાંધી મામલતદાર કચેરી ખાતે ચૂંટણી અધિકારી પાસે ફોર્મ પરત ખેંચાવવા માટે લાવ્યા હતા.
જો કે આમલેથા જિલ્લા પંચાયતના કોંગ્રેસના ઉમેદવાર મુકેશ વસાવા અને અગ્રણી બળવંતસિંહ ગોહિલને આ બાબતની ગંધ આવી જતા તેઓ બંને ચૂંટણી અધિકારીની કચેરી મામલતદાર કચેરી પહોંચ્યા હતા. મામલતદાર કચેરીની અંદરના ભાગે પહોંચેલા કોંગ્રેસી આગેવાનો અને ભાજપી આગેવાનો વચ્ચે ઉમેદવારને લઇ જવા રીતસરની ખેંચાખેંચી સર્જાઈ હતી.
આ દરમ્યાન સામસામે અપશબ્દોનો વરસાદ પણ વરસ્યો હતો.દરમ્યાન કૉંગસી આગેવાનો ઉમેદવાર નયનાબેન વસાવાને લઇ જવામાં સફળ રહયા હતા.કોંગ્રેસી આગેવાનોએ તાત્કાલિક ગાડી મંગાવીને ઉમેદવાર નયનાબેનને અજ્ઞાત જગ્યાએ રવાના કર્યા હતા.ફોર્મ ખેંચવાનો અંતિમ દિવસ હોય અને અનુક્રમ નંબર અને ચૂંટણી ચિન્હો ફાળવવાનું કામ ચાલુ હોય મોટી સંખ્યામાં ઉમેદવારો અને તેમના સમર્થકોની રૂબરૂમાં આ હાઈવોલ્ટેજ ફિલ્મી ડ્રામા સર્જાયો હતો .
બીજી બાજુ નર્મદા જિલ્લા આમ આદમી પાર્ટી પ્રમુખ નિરંજન વસાવાએ આક્ષેપ લગાવ્યો હતો કે, આમ આદમી પાર્ટીના ઉમરવા બેઠકના ઉમેદવારના ઘરે પણ પોલીસ મોકલવામાં આવી રહી છે અને રાજકીય પ્રેસર કરવામાં આવી રહ્યું છે.
રાજપીપલા નગરપાલિકાના પણ વોર્ડ નંબર 4 ના આમ આદમી પાર્ટીના 2 ઉમેદવાર અને વોર્ડ નંબર 6 ના પણ 2 ઉમેદવારને આમ આદમી પાર્ટી દ્વારા અજ્ઞાત સ્થળ પર મોકલી દેવામાં આવ્યા છે.
