અમદાવાદ : અમદાવાદના રામોલ વિસ્તારમાં એક ૧૪ વર્ષ અને ૬ માસની સગીરાને લલચાવી-ફોસલાવી અપહરણ કર્યા બાદ ૪ દિવસ સુધી ગોંધી રાખીને વારંવાર દુષ્કર્મ આચરવાના અતિ ગંભીર કેસમાં પોક્સો (POCSO) કોર્ટે ઐતિહાસિક અને દાખલારૂપ ચુકાદો આપ્યો છે. ખાસ જજ એચ.એન. દેસાઈની અદાલતે મુખ્ય આરોપી દર્શન પંચાલ સહિત તેને આ ગુનામાં મદદગારી કરનારા અન્ય ત્રણ આરોપીઓને ૨૦ વર્ષની સખત કેદની સજા ફટકારી છે.
કોર્ટનું કડક વલણ અને મહત્ત્વપૂર્ણ અવલોકન
કોર્ટના આદેશ અનુસાર, મુખ્ય આરોપી દર્શન પ્રહલાદભાઈ પંચાલે ભોગ બનનારની ઉંમર સગીર હોવાનું જાણવા છતાં તેનું અપહરણ કરી વારંવાર દુષ્કર્મ આચર્યું હતું. આ જઘન્ય કૃત્યમાં અન્ય આરોપીઓ — પ્રહલાદભાઈ પંચાલ, વિપુલ પ્રહલાદભાઈ પંચાલ અને જયંતીભાઈ હેમચંદ્રભાઈ પંચાલે પણ સક્રિય મદદગારી કરી હતી.
ન્યાયાધીશે ચુકાદો સંભળાવતા અત્યંત સ્પષ્ટ શબ્દોમાં અવલોકન કર્યું હતું કે, “મદદગારી કરનારા આરોપીઓની નૈતિક અને કાનૂની જવાબદારી ભોગ બનનાર સગીરાને રક્ષણ આપવાની હતી. તેમ છતાં, સગીરાની ઉંમર જાણતા હોવા છતાં તેમણે આરોપીને સાથ આપી પોતાના ઘરમાં આશરો આપ્યો હતો. આવા ગંભીર અને હીન પ્રકારના ગુનામાં જો અદાલત નરમ વલણ અપનાવીને ઓછી સજા કરે તો સમાજમાં તેની અત્યંત વિપરીત અસર થાય તેમ છે. ન્યાયના હિતમાં આરોપીઓને સખત સજા ફટકારવી જ જરૂરી છે.”
૧૫ મિનિટમાં ગુમ થયેલી દીકરી અને ટેકનિકલ પુરાવા
ઘટનાની શરૂઆત ૨૨ માર્ચ ૨૦૨૨ ના રોજ થઈ હતી. સગીરાની માતા બપોરે માત્ર ૧૫ મિનિટ માટે બહાર ગયા હતા, ત્યારે દીકરી ઘરેથી ગાયબ થઈ ગઈ હતી. સગા-સંબંધીઓ અને મિત્ર વર્તુળમાં શોધખોળ કરવા છતાં અને તેનો ફોન સતત બંધ આવતો હોવાથી અંતે ૩૧ માર્ચ ૨૦૨૨ ના રોજ રામોલ પોલીસ મથકે અપહરણની ફરિયાદ નોંધાવવામાં આવી હતી.
પોક્સો કોર્ટમાં ચાલેલા આ કેસમાં સરકારી વકીલ ડી.એમ. ઠાકોરે નીચે મુજબના સચોટ પુરાવાઓ રજૂ કરી આરોપીઓને સજા અપાવી હતી.
સીઆરપીસીની કલમ-૧૬૪ મુજબ મેજિસ્ટ્રેટ સમક્ષ લેવાયેલું ભોગ બનનારનું સત્તાવાર નિવેદન.
મેડિકલ પુરાવા અને રિપોર્ટ્સ, જેણે ફરિયાદ પક્ષના કેસને મજબૂત સમર્થન આપ્યું.
આરોપીઓના મોબાઈલ ફોનનું કોલ રેકોર્ડિંગ, જેમાં આરોપીઓના જ અવાજ હોવાનું વૈજ્ઞાનિક રીતે ફલિત થયું હતું.
આ પણ વાંચો – નકલી બ્લડ પ્રેશરની દવાનો ઇન્ટર સ્ટેટ નેટવર્ક ઝડપાયું
