- અમદાવાદમાં એન્ટી-બેગિંગ અને ચાઇલ્ડ રેસ્ક્યુ ડ્રાઇવ શરૂ
- ક્રાઇમ બ્રાંચ મહિલા સેલ અને AMCની સંયુક્ત કાર્યવાહી; ભીખ માંગતા બાળકોનું રેસ્ક્યુ, પુનર્વસન અને શાળામાં દાખલાની પ્રક્રિયા હાથ ધરાઈ
- ક્રાઇમ બ્રાંચ અને AMC ની સંયુક્ત કાર્યવાહી: અમદાવાદને ‘બાળમૈત્રી’ શહેર બનાવવા મેગા ચાઇલ્ડ રેસ્ક્યુ ઓપરેશનનો પ્રારંભ
- ભિક્ષાવૃત્તિ સામે લાલ આંખ: બાળકોનું શોષણ કરતી ગેંગ પર થશે કડક કાર્યવાહી, રેસ્ક્યુ કરાયેલા બાળકોનું કરાશે પુનર્વસન
અમદાવાદ શહેરને સુરક્ષિત, સર્વસમાવેશક અને બાળમૈત્રી શહેર તરીકે વિકસાવવાના હેતુસર ક્રાઇમ બ્રાંચની મહિલા સેલ અને અમદાવાદ મ્યુનિસિપલ કોર્પોરેશન (AMC) દ્વારા શહેરના વિવિધ વિસ્તારોમાં સંયુક્ત રીતે “એન્ટી-બેગિંગ અને ચાઇલ્ડ રેસ્ક્યુ ડ્રાઇવ” શરૂ કરવામાં આવી છે. શહેરમાં આંતરરાષ્ટ્રીય કક્ષાની રમતગમત સ્પર્ધાઓ, ખાસ કરીને કોમનવેલ્થ ગેમ્સ જેવી ઇવેન્ટ્સને ધ્યાનમાં રાખીને આ અભિયાનને વિશેષ મહત્વ આપવામાં આવ્યું છે.
આ અભિયાન અંતર્ગત ટ્રાફિક સિગ્નલ, જાહેર રસ્તાઓ, બજારો અને અન્ય જાહેર સ્થળોએ ભિક્ષાવૃત્તિ કરતા બાળકોની ઓળખ કરી તેમનું રેસ્ક્યુ કરવામાં આવી રહ્યું છે. સાથે જ આવા બાળકોના પરિવાર, શિક્ષણ અને સામાજિક-આર્થિક પરિસ્થિતિની તપાસ પણ હાથ ધરવામાં આવી રહી છે. રેસ્ક્યુ કરાયેલા બાળકોને પુનર્વસન, કાઉન્સેલિંગ, કલ્યાણકારી સહાય તેમજ ઔપચારિક શૈક્ષણિક સંસ્થાઓમાં દાખલાની પ્રક્રિયા દ્વારા મુખ્ય પ્રવાહમાં જોડવાનો પ્રયાસ કરવામાં આવી રહ્યો છે.
અભિયાન દરમિયાન જો કોઈ વ્યક્તિ કે ગેંગ બાળકોને ભીખ માંગવા માટે મજબૂર કરતું, તેમનું શોષણ કરતું અથવા ભિક્ષાવૃત્તિ માટે ઉપયોગ કરતું હોવાનું સામે આવશે તો તેમના વિરુદ્ધ સંબંધિત કાયદાકીય જોગવાઈઓ હેઠળ કડક કાર્યવાહી કરવામાં આવશે.
આ પહેલનો મુખ્ય હેતુ બાળકોના હકો અને ગૌરવનું રક્ષણ કરવો, બાળશોષણ પર અંકુશ લાવવો અને અમદાવાદને વધુ સુરક્ષિત, પ્રગતિશીલ તથા સામાજિક રીતે જવાબદાર શહેર તરીકે મજબૂત બનાવવાનો છે.
આ પણ વાંચો – અમદાવાદ: વસ્ત્રાલના સ્પામાં મસાજની આડમાં પીરસાતું હતું MD ડ્રગ્સ, ક્રાઇમ બ્રાન્ચના દરોડામાં બે સંચાલકો ઝડપાયા
