વડોદરા: શહેરમાં યુવાધનને નશાના રવાડે ચડાવતા કાળા કારોબાર પર વડોદરા સ્પેશિયલ ઓપરેશન ગ્રુપ (SOG) દ્વારા મોટી તવાઈ બોલાવવામાં આવી છે. SOG ની ટીમે બાતમીના આધારે ગોરવા વિસ્તારમાં દરોડો પાડીને પ્રતિબંધિત નશીલી કફ સીરપનો મોટો જથ્થો ઝડપી પાડ્યો છે. પોલીસે ગોડાઉનના સંચાલક અને સીરપ મંગાવનાર ઈસમ સામે નાર્કોટિક્સ એક્ટ હેઠળ ગુનો નોંધીને વધુ તપાસ હાથ ધરી છે.
હિમાચલ પ્રદેશથી મંગાવાયો હતો જથ્થો
પોલીસને ચોક્કસ બાતમી મળી હતી કે, ગોરવા આઈટીઆઈ રોડ પર નર્મદા નગરી વિભાગ-૧ સામે આવેલા પ્રમુખ ફ્લેટ્સની એક દુકાનમાં નશીલી કફ સીરપનો મોટો જથ્થો ઉતારવામાં આવ્યો છે. આ જથ્થો છેક હિમાચલ પ્રદેશથી વડોદરા લાવવામાં આવ્યો હોવાની વિગતો મળતા SOG ની ટીમે તાત્કાલિક સ્થળ પર પહોંચીને દુકાનનું તાળું તોડી અંદર સર્ચ ઓપરેશન હાથ ધર્યું હતું.
૨૨.૫૮ લાખનો મુદ્દામાલ જપ્ત
દુકાનની અંદર તપાસ કરતા પોલીસને મોટી સંખ્યામાં બોક્સ મળી આવ્યા હતા. આ બોક્સની ગણતરી કરતા તેમાંથી આયુર્વેદિક કોડીન કફ સીરપની કુલ ૧૯૨૦ બોટલો મળી આવી હતી. જેની બજાર કિંમત અંદાજે રૂ. ૨૨.૫૮ લાખ જેટલી થવા જાય છે. પોલીસે આ તમામ જથ્થો જપ્ત કરી લીધો છે.
નાર્કોટિક્સ એક્ટ હેઠળ નોંધાયો ગુનો
ઉલ્લેખનીય છે કે, આયુર્વેદિક કોડીન કફ સીરપનો ઉપયોગ નશા માટે પણ મોટા પાયે થતો હોવાથી સરકારે તેના વેચાણ અને સંગ્રહ પર કડક નિયંત્રણો મૂક્યા છે. આ સીરપ રાખવા માટે ખાસ લાયસન્સની જરૂર પડે છે. આમ છતાં ગેરકાયદેસર રીતે તેનો જથ્થો રાખવા બદલ પોલીસે ગોડાઉન ધરાવતા અને સીરપ મંગાવનાર આરોપી આકાશ સિંહ રાજેશ સિંહ ઠાકુર (રહે. સાઈ લાઈફ સાયન્સ, લાભ બિઝનેસ હબ, કરોડિયા રોડ, ગોરવા) વિરુદ્ધ નાર્કોટિક્સ એક્ટ હેઠળ ગુનો નોંધી કાયદેસરની કાર્યવાહી શરૂ કરી છે.
આ પણ વાંચો – અમદાવાદના મનપસંદ જીમખાના જુગાર કેસમાં મોટી કાર્યવાહી : દરિયાપુર PI જી.વી. ગોહિલ સસ્પેન્ડ
