એઆઈ જનરેટેડ ઈમેજ
ગુજરાતમાં સાયબર ક્રાઈમના કિસ્સાઓ વધી રહ્યા છે, પરંતુ આ વખતે એક અલગ જ કિસ્સો સામે આવ્યો છે – ગુજરાતનો પહેલો મોટો બેંક સર્વર હેકિંગ કેસ, જેમાં ભાવનગર ડિસ્ટ્રિક્ટ કો-ઓપરેટીવ બેંકની સિસ્ટમમાં ઘૂસીને રવિવારની રજાના દિવસે 7 કરોડ જેટલી મોટી રકમની ઉચાપત કરવામાં આવી છે. આ ઘટનાએ બેંકિંગ સિસ્ટમની સુરક્ષા પર ગંભીર પ્રશ્નો ઉભા કર્યા છે અને ખાતેદારોમાં ભયનું વાતાવરણ ફેલાયું છે.
રજાના દિવસે હેકર્સે કર્યું હુમલો, 350થી વધુ ટ્રાન્ઝેક્શનથી રકમ ટ્રાન્સફર
રવિવારે બેંક બંધ હોવાના કારણે હેકર્સે બેંકની સોફ્ટવેર સિસ્ટમમાં મોબાઈલ એપ્લિકેશન દ્વારા પ્રવેશ મેળવ્યો. તળાજા, ભરતનગર, સુભાષનગર અને સિદસર – આ ચાર શાખાઓના એકાઉન્ટ્સને નિશાન બનાવીને 350થી વધુ બોગસ ટ્રાન્ઝેક્શન કરવામાં આવ્યા. મોબાઈલ બેંકિંગની મર્યાદા (એક વખતમાં 2 લાખ સુધી)ને ધ્યાનમાં રાખીને આ ટ્રાન્ઝેક્શન વિવિધ એકાઉન્ટ્સમાં વહેંચીને કરવામાં આવ્યા હતા. આ રીતે કુલ 7 કરોડ જેટલી રકમ અન્ય એકાઉન્ટ્સમાં ટ્રાન્સફર કરી દેવામાં આવી.
બેંકની તમામ 88 શાખાઓમાં કામગીરી સ્થગિત, 25 નિષ્ણાતોની ટીમ તપાસમાં
ઘટનાની જાણ થતાં જ બેંકની હેડ ઓફિસે તમામ 88 શાખાઓની કામગીરી સ્થગિત કરી દીધી છે. 25થી વધુ ટેક્નિકલ નિષ્ણાતોની ટીમ બનાવીને સિસ્ટમની તપાસ શરૂ કરવામાં આવી છે. બેંકમાં 1.25 લાખથી વધુ ખાતેદારો છે અને કરોડોની થાપણો છે, તેથી આ ઘટનાએ ખાતેદારોમાં ભારે ફફડાટ ફેલાવ્યો છે.
ચાર મોબાઈલ નંબર શંકાના દાયરામાં, સ્ટેટ સાયબર સેલમાં ફરિયાદ
પ્રાથમિક તપાસમાં ખુલાસો થયો છે કે હેકિંગ મોબાઈલ એપ્લિકેશન દ્વારા થયું છે અને ચાર અલગ-અલગ મોબાઈલ નંબરનો ઉપયોગ કરવામાં આવ્યો છે. ડિજિટલ ટ્રેલના આધારે આ નંબરો શંકાના દાયરામાં છે. બેંકે આ ઘટનાની ફરિયાદ ગાંધીનગર સ્થિત સ્ટેટ સાયબર સેલમાં નોંધાવવાની તૈયારી શરૂ કરી છે. સાયબર એક્સપર્ટ્સની ટીમ તપાસ કરી રહી છે કે બેંકની સિસ્ટમમાં કઈ ખામીઓને કારણે આ હુમલો શક્ય બન્યો.
આ ઘટના ગુજરાતની કોઓપરેટિવ બેંકિંગ સિસ્ટમ માટે ચેતવણીરૂપ છે. હવે બેંકોએ તેમની ડિજિટલ સુરક્ષા વધુ મજબૂત કરવાની જરૂર છે, જેથી ખાતેદારોના પૈસા સુરક્ષિત રહે.
