વલસાડ જિલ્લાના કપરાડા તાલુકામાંથી એક હૃદયદ્રાવક સમાચાર સામે આવ્યા છે. કપરાડાના વીરક્ષેત્ર ગામે 22 એપ્રિલના રોજ એક ભયાનક માર્ગ અકસ્માત સર્જાયો હતો, જેમાં એક જ પરિવાર અને સંબંધીઓના ખુશીના પ્રસંગ માતમમાં ફેરવાઈ ગયું છે. લગ્ન પ્રસંગમાં હાજરી આપી આનંદ-કિલ્લોલ સાથે પરત ફરી રહેલા મહેમાનો પર કાળે તરાપ મારી છે. આ કરૂણ દુર્ઘટનામાં 6 લોકોએ પોતાના જીવ ગુમાવ્યા છે, જ્યારે અનેક લોકો જીવન અને મરણ વચ્ચે ઝોલા ખાઈ રહ્યા છે.
બ્રેક ફેઈલ થતા સર્જાયો કાળમુખો અકસ્માત
ઘટનાની વિગતો મુજબ, એક પીકઅપ વાનમાં લગ્ન પ્રસંગના મહેમાનો સવાર થઈને પરત ફરી રહ્યા હતા. વીરક્ષેત્ર ગામ પાસેના એક ઊભા ચઢાણ પર જ્યારે વાન ચઢી રહી હતી, ત્યારે અચાનક ટેકનિકલ ખામી સર્જાઈ હતી. પ્રાથમિક માહિતી અનુસાર, ચઢાણ પર વાનની બ્રેક ફેઈલ થઈ ગઈ હતી. બ્રેક કામ ન આપતા વાન પર ચાલકે કાબૂ ગુમાવ્યો હતો અને વાન પાછળની તરફ એટલે કે રિવર્સમાં ખૂબ જ ઝડપથી ઉતરવા લાગી હતી. રિવર્સમાં આવતી વાન બેકાબૂ બનીને પલટી ખાઈ ગઈ હતી.
6ના કરૂણ મોત અને અનેક ઈજાગ્રસ્ત
આ અકસ્માત એટલો ભયાનક હતો કે વાનમાં સવાર મુસાફરોને બચવાની કોઈ તક પણ મળી નહતી. આ દુર્ઘટનામાં અત્યાર સુધીમાં 6 લોકોના કરૂણ મોત નિપજ્યા હોવાની પુષ્ટિ થઈ છે. આ ઉપરાંત, વાનમાં સવાર અન્ય 28 મુસાફરોને નાની-મોટી ઈજાઓ પહોંચી છે. ઈજાગ્રસ્તોમાં મહિલાઓ અને બાળકો પણ સામેલ હોવાનું જાણવા મળ્યું છે. 10 જેટલા લોકોની હાલત અત્યંત ગંભીર હોવાથી મૃત્યુઆંક વધવાની આશંકા સેવાઈ રહી છે.
સ્થાનિકોની મદદ અને હોસ્પિટલની દોડધામ
અકસ્માતનો અવાજ સાંભળતા જ આસપાસના ગ્રામજનો તાત્કાલિક મદદ માટે દોડી આવ્યા હતા. ચીસો અને આક્રંદ વચ્ચે સ્થાનિકોએ કાટમાળ નીચે દબાયેલા લોકોને બહાર કાઢવાની કામગીરી શરૂ કરી હતી. તાત્કાલિક 108 એમ્બ્યુલન્સ અને પોલીસને જાણ કરવામાં આવી હતી. તમામ ઈજાગ્રસ્તોને તાત્કાલિક કપરાડા અને ત્યારબાદ વધુ સારવાર માટે વલસાડની સિવિલ હોસ્પિટલ ખાતે ખસેડવામાં આવ્યા છે. ગંભીર ઈજાગ્રસ્તો માટે ડોક્ટરોની ખાસ ટીમ કાર્યરત કરવામાં આવી છે.
પરિવારમાં શોકનું મોજું
લગ્નના ગીતો અને આનંદના માહોલ વચ્ચે પરત ફરી રહેલા આ લોકોના ઘરે હવે માતમ છવાઈ ગયો છે. અકસ્માતની જાણ થતા જ હોસ્પિટલ ખાતે સગા-સંબંધીઓના ટોળેટોળા ઉમટી પડ્યા હતા. આ ઘટનાએ સમગ્ર વલસાડ જિલ્લામાં અરેરાટી ફેલાવી દીધી છે. ડુંગરાળ વિસ્તારમાં વાહનોની સ્થિતિ અને ઓવરલોડિંગ સામે પણ સ્થાનિક સ્તરે સવાલો ઉઠી રહ્યા છે.
આ પણ વાંચો – હોર્મુઝ સ્ટ્રેટમાં તણાવ : ઈરાને મુંદ્રા આવતા જહાજને કર્યો કબ્જે
