- પેપર લીક વિવાદ બાદ એક્શનમાં NTA; 21 જૂને કડક સુરક્ષા વચ્ચે યોજાશે NEET-UG
નવી દિલ્હી: નેશનલ ટેસ્ટિંગ એજન્સી (NTA) દ્વારા NEET-UG 2026ની રી-એક્ઝામની તારીખની સત્તાવાર જાહેરાત કરી દેવામાં આવી છે. NTAના નિર્ણય અનુસાર, હવે આ પરીક્ષા 21 જૂન 2026 (રવિવાર) ના રોજ યોજાશે. અગાઉ લેવાયેલી પ્રવેશ પરીક્ષા રદ જાહેર કરવામાં આવી હતી. ભારત સરકારની મંજૂરી બાદ NTA દ્વારા બહાર પાડવામાં આવેલી જાહેરખબરમાં જણાવાયું છે કે, નવી પરીક્ષામાં સુરક્ષા અને દેખરેખના અત્યંત કડક પ્રબંધો કરવામાં આવશે.
ઉલ્લેખનીય છે કે, NEET-UG 2026ની મૂળ પરીક્ષા પેપર લીકના મોટા વિવાદને કારણે રદ કરવામાં આવી હતી. આ ઘટનાને પગલે દેશભરના વિદ્યાર્થીઓ અને વાલીઓમાં ભારે રોષ જોવા મળ્યો હતો. લાખો મેડિકલ ઉમેદવારોની મહેનત અને ભવિષ્યને ધ્યાનમાં રાખીને પરીક્ષા રદ કરવાનો નિર્ણય લેવાયો હતો. હાલ CBI આ પેપર લીક કેસની તપાસ અત્યંત વેગથી કરી રહી છે.
NTAની આ જાહેરાતથી MBBS, BDS અને અન્ય મેડિકલ કોર્સમાં પ્રવેશ મેળવવા ઈચ્છતા લાખો ઉમેદવારોને ફરીથી તક મળશે. છેલ્લા ઘણા અઠવાડિયાથી વિદ્યાર્થીઓ નવી તારીખની રાહ જોઈ રહ્યા હતા. જોકે, કેટલાક ઉમેદવારોએ ફરીથી તૈયારી કરવાના તણાવ અને અનિશ્ચિતતા અંગે ચિંતા પણ વ્યક્ત કરી હતી.
NTAએ તમામ ઉમેદવારો અને વાલીઓને અપીલ કરી છે કે તેઓ પરીક્ષા સંબંધિત કોઈપણ માહિતી માટે માત્ર સત્તાવાર સ્ત્રોતો પર જ વિશ્વાસ કરે. સોશિયલ મીડિયા કે અસત્તાવાર માધ્યમો દ્વારા ફેલાતી અફવાઓથી દૂર રહેવા જણાવાયું છે. કોઈપણ સહાય માટે હેલ્પલાઈન નંબર: 011-40759000 અને 011-69227700 અથવા ઈમેલ: neet-ug@nta.ac.in પર સંપર્ક કરી શકાશે.
અગાઉના વિવાદને જોતા, 21 જૂનની રી-એક્ઝામ માટે પરીક્ષા કેન્દ્રો પર સખત પ્રોટોકોલ, ડિજિટલ મોનિટરિંગ અને ગુપ્ત સામગ્રીના સંચાલન માટે વિશેષ તકેદારી રાખવામાં આવશે. આ પગલાંનો મુખ્ય ઉદ્દેશ્ય પરીક્ષાની વિશ્વસનીયતા પુનઃસ્થાપિત કરવાનો અને વિદ્યાર્થીઓનો વિશ્વાસ જીતવાનો છે.
આ પણ વાંચો – ઇંધણ બચત માટે ગુજરાત પોલીસ સક્રિય, DGPના કડક આદેશ
