અમદાવાદ: મેટ્રિમોનિયલ વેબસાઇટ પર જીવનસાથીની શોધ કરતા લોકો માટે એક લાલબત્તી સમાન કિસ્સો સામે આવ્યો છે. અમદાવાદ શહેર ક્રાઈમ બ્રાંચે એક એવા રીઢા ગુનેગારને ઝડપી પાડ્યો છે, જે મેટ્રિમોનિયલ સાઇટ પર હિન્દુ યુવાનની ખોટી ઓળખ ઊભી કરીને એકલવાયું જીવન જીવતી વિધવા મહિલાઓને પોતાની પ્રેમજાળમાં ફસાવતો હતો. આ ભેજાબાજ આરોપી નકલી દસ્તાવેજોના આધારે મહિલાઓનો વિશ્વાસ જીતીને લાખો રૂપિયા અને વાહનો પડાવતો હતો.
શું હતી આરોપીની મોડસ ઓપરેન્ડી?
પોલીસ તપાસમાં બહાર આવેલી વિગતો અનુસાર, આરોપીનું સાચું નામ કરીમ રફીકભાઈ સિપાઈ છે, જે મહેસાણા જિલ્લાના કડી તાલુકાના સરઘાતાની ઘાટી વિસ્તારનો રહેવાસી છે.
કરીમ મેટ્રિમોનિયલ સાઇટ પર “આદિત્ય પટેલ” નામની ખોટી પ્રોફાઇલ બનાવીને પોતાને હિન્દુ તરીકે રજૂ કરતો હતો.
તે ખાસ કરીને એવી વિધવા મહિલાઓનો સંપર્ક કરતો જેઓ એકલવાયું જીવન જીવતી હોય.
મહિલાઓની સહાનુભૂતિ મેળવવા તે પોતાની જાતને વિધુર અને નિઃસંતાન હોવાનું જણાવતો અને ધીમે ધીમે તેમને વિશ્વાસમાં લઈને પ્રેમ સંબંધો કેળવતો હતો.
વિશ્વાસ જીતવા બનાવ્યા હતા નકલી દસ્તાવેજો
પોતાની બનાવટી ઓળખ સાચી સાબિત કરવા માટે આ ગઠિયાએ તમામ તૈયારીઓ કરી રાખી હતી. તે મહિલાઓને નકલી પાનકાર્ડ, ડ્રાઈવિંગ લાયસન્સ, પાસપોર્ટ અને નકલી આધારકાર્ડ મોકલતો હતો. એટલું જ નહીં, સહાનુભૂતિ માટે તેણે પોતાની કાલ્પનિક પત્નીના મૃત્યુનું ખોટું પ્રમાણપત્ર પણ બનાવી રાખ્યું હતું. એકવાર મહિલા વિશ્વાસમાં આવી જાય અને લગ્ન માટે તૈયાર થઈ જાય, એટલે આરોપી અલગ-અલગ બહાના હેઠળ તેમની પાસેથી લાખો રૂપિયાની રોકડ અને વાહનો પડાવીને છેતરપિંડી આચરતો હતો.
આ રીતે ફૂટ્યો કૌભાંડનો ભાંડો
આ સમગ્ર કૌભાંડનો પર્દાફાશ એક નાનકડી શંકાથી થયો હતો. ભોગ બનનાર મહિલાને ફોન પર વાતચીત દરમિયાન કૉલર આઈડી એપ્લિકેશન (જેમ કે Truecaller) માં દર્શાવાયેલા નામ અંગે શંકા જાગી હતી. ત્યારબાદ, મહિલાએ આરોપીએ આપેલા સરનામા અને દસ્તાવેજોની ઝીણવટભરી ચકાસણી કરાવી, જેમાં તમામ વિગતો સંપૂર્ણપણે ખોટી હોવાનું બહાર આવ્યું. આખરે તપાસમાં ખુલ્યું કે “આદિત્ય પટેલ” તરીકે મીઠી-મીઠી વાતો કરતો વ્યક્તિ હકીકતમાં કરીમ સિપાઈ છે.
પોલીસ કાર્યવાહી અને નાગરિકોને અપીલ
આ છેતરપિંડી અંગે મહિલા પોલીસ મથક (પશ્ચિમ) ખાતે ફરિયાદ નોંધાયા બાદ અમદાવાદ ક્રાઈમ બ્રાંચે ત્વરિત એક્શન લઈને આરોપી કરીમ સિપાઈની ધરપકડ કરી લીધી છે. હાલમાં પોલીસ તેની સઘન પૂછપરછ કરી રહી છે, જેથી તેણે આ જ પદ્ધતિથી અન્ય કેટલી મહિલાઓને પોતાનો શિકાર બનાવી છે તેનો ચોક્કસ આંકડો સામે આવી શકે.
પોલીસે આ ઘટનાને પગલે સામાન્ય નાગરિકોને ખાસ અપીલ કરી છે કે, મેટ્રિમોનિયલ સાઇટ અથવા સોશિયલ મીડિયા મારફતે કોઈપણ અજાણી વ્યક્તિ સાથે સંબંધ બાંધતા પહેલા અથવા આર્થિક વ્યવહાર કરતા પહેલા તેની ઓળખ અને દસ્તાવેજોની સંપૂર્ણ ચકાસણી અચૂક કરવી જોઈએ, જેથી આવા ગઠિયાઓનો ભોગ બનવાથી બચી શકાય.
આ પણ વાંચો – ગુજરાતમાં ‘ઓપન ડોર પૉલિસી’: પોલીસ મથકોમાં સાંજે 4 થી 6 અને ઉચ્ચ કચેરીઓમાં બપોરે 12 થી 2 સુધી ઉકેલાશે પ્રજાના પ્રશ્નો
