અમદાવાદમાં બાળ કલ્યાણ અને જાહેર સુરક્ષાને કેન્દ્રમાં રાખીને ક્રાઇમ બ્રાન્ચ, સ્થાનિક પોલીસ અને અમદાવાદ મ્યુનિસિપલ કોર્પોરેશનના સંયુક્ત અભિયાનને મોટી સફળતા મળી છે. વર્ષ 2024થી અત્યાર સુધી બાળ મજૂરી, બળજબરીપૂર્વક કરાવવામાં આવતી ભિક્ષાવૃત્તિ અને આંતર-રાજ્ય માનવ તસ્કરીના નેટવર્ક સામે હાથ ધરાયેલી સતત કાર્યવાહી દરમિયાન કુલ 276 બાળકોને રેસ્ક્યૂ કરવામાં આવ્યા છે.
સત્તાવાર આંકડા મુજબ, શહેરમાં છેલ્લા બે વર્ષથી વધુ સમયગાળા દરમિયાન વિવિધ એજન્સીઓ દ્વારા ટાર્ગેટેડ ડ્રાઇવ, દરોડા અને બચાવ અભિયાન હાથ ધરવામાં આવ્યા, જેના પરિણામે ગુમ થયેલા બાળકોને શોધી પરિવાર સાથે મિલન કરાવવાથી લઈને બાળ મજૂરી અને ભિક્ષાવૃત્તિમાં ધકેલાયેલા બાળકોને મુક્ત કરાવવાની નોંધપાત્ર કામગીરી થઈ છે.
ગુમ થયેલા 33 બાળકોનું પરિવાર સાથે કરાવ્યુ મેળાપ
અભિયાન અંતર્ગત સત્તાવાળાઓએ 33 ગુમ થયેલા બાળકોને શોધી કાઢીને તેમના પરિવાર સાથે પુનર્મિલન કરાવ્યું છે. આ કાર્યવાહી દરમિયાન બાળકોની સુરક્ષા સાથે તેમની કાઉન્સેલિંગ અને જરૂરી સંસ્થાકીય સહાયની પ્રક્રિયા પણ હાથ ધરાઈ હતી.
બાળ મજૂરી વિરુદ્ધ 33 કેસ, 107 બાળકો મુક્ત
બાળ મજૂરી સામે ચલાવવામાં આવેલા કડક અભિયાન હેઠળ શહેરના વિવિધ વિસ્તારોમાં દરોડા પાડવામાં આવ્યા હતા. આ દરમિયાન 33 કેસ નોંધાયા હતા અને 107 બાળકોને બાળ મજૂરીના ચંગુલમાંથી મુક્ત કરાવવામાં આવ્યા હતા. બચાવાયેલા બાળકોને આગળની કાનૂની અને પુનર્વસન પ્રક્રિયા હેઠળ સંબંધિત તંત્રને સોંપવામાં આવ્યા હતા.
15 દિવસના નવજાત શિશુની તસ્કરીનો ભાંડાફોડ
સૌથી સંવેદનશીલ અને ગંભીર કામગીરીમાં માત્ર 15 દિવસના નવજાત બાળકને બચાવી લેવામાં આવ્યું, જેના પગલે આંતર-રાજ્ય માનવ તસ્કરીના એક મોટા રેકેટનો પર્દાફાશ થયો હતો. આ કેસે બાળ સુરક્ષાના મુદ્દે શહેરમાં કામ કરતી એજન્સીઓની સતર્કતા અને સંકલિત કામગીરીને ઉજાગર કરી છે.
ભિક્ષાવૃત્તિમાં ધકેલાયેલા બાળકોના રેસ્ક્યૂ સાથે પુનર્વસન પર ભાર
શહેરમાં બાળકો પાસેથી બળજબરીપૂર્વક ભિક્ષાવૃત્તિ કરાવવાના ગેરકાયદે નેટવર્ક સામે પણ ખાસ ઝુંબેશ હાથ ધરવામાં આવી છે. માત્ર રેસ્ક્યૂ સુધી સીમિત ન રહી, તંત્રએ આવા બાળકોને મુખ્ય પ્રવાહમાં પરત લાવવા માટે પુનર્વસન પર પણ ભાર મૂક્યો છે.
JJ એક્ટ હેઠળ 22 ગુના, 67 બાળકોનો બચાવ
જ્યુવેનાઇલ જસ્ટિસ એક્ટ હેઠળ 22 ગુના નોંધવામાં આવ્યા હતા અને 67 બાળકોને ભિક્ષાવૃત્તિમાંથી મુક્ત કરાવવામાં આવ્યા હતા. બચાવાયેલા તમામ બાળકોને મુખ્ય પ્રવાહના શિક્ષણ સાથે જોડવા માટે અમદાવાદ મ્યુનિસિપલ કોર્પોરેશનની શાળાઓમાં દાખલ કરી પુનર્વસનની પ્રક્રિયા શરૂ કરવામાં આવી હતી.
2026માં 40થી વધુ એન્ટી-બેગિંગ ડ્રાઇવ
વર્ષ 2026 દરમિયાન પણ આ ઝુંબેશ યથાવત રાખવામાં આવી છે. AMC અને અન્ય સંબંધિત વિભાગોના સંકલનથી 40થી વધુ સ્વતંત્ર એન્ટી-બેગિંગ ડ્રાઇવ યોજવામાં આવી છે. આ ડ્રાઇવ દરમિયાન માત્ર 2026માં જ 60થી વધુ બાળકો અને 89 પુખ્ત વયના લોકોને રેસ્ક્યૂ કરીને પુનર્વસન તરફ વાળવામાં આવ્યા છે.
મહિલાઓની સુરક્ષા માટે પણ વિશેષ ઝુંબેશ
બાળ સુરક્ષા ઉપરાંત જાહેર સ્થળોએ મહિલાઓને થતી છેડતી, પજવણી અને અન્ય પ્રકારના ન્યુસન્સને રોકવા માટે પણ એક મહિનાની વિશેષ મહિલા સુરક્ષા ડ્રાઇવ હાથ ધરવામાં આવી હતી. મહિલા સેલ, SHE Teams અને ક્રાઇમ બ્રાન્ચની સંયુક્ત કામગીરી દરમિયાન ગુજરાત પોલીસ એક્ટ હેઠળ 57 કેસ નોંધાયા હોવાનું સત્તાવાર આંકડાઓમાં જણાવાયું છે.
અમદાવાદમાં બાળ મજૂરી, ભિક્ષાવૃત્તિ અને માનવ તસ્કરી સામે હાથ ધરાયેલા આ અભિયાનને શહેરમાં બાળકોની સુરક્ષા અને પુનર્વસનના ક્ષેત્રમાં એક મહત્વપૂર્ણ પગલું માનવામાં આવી રહ્યું છે. માત્ર બચાવ કામગીરી નહીં, પરંતુ રેસ્ક્યૂ બાદ બાળકોને શિક્ષણ અને સંરક્ષણના મુખ્ય પ્રવાહ સાથે જોડવાનો પ્રયાસ આ અભિયાનને વધુ અર્થપૂર્ણ બનાવે છે.
આ પણ વાંચો – નિકોલ જ્વેલરી ચોરીમાં પોલીસનો ‘ખેલ’: 100% રિકવરીની બાજી બગાડી, ક્રાઇમ બ્રાન્ચ-નિકોલ પોલીસ આમને-સામને
