- કોંગ્રેસે સર્વેના આંકડાઓનો હવાલો આપી મહિલાઓની સ્થિતિ અંગે સરકારનું ધ્યાન દોર્યું
અમદાવાદ: નેશનલ ફેમિલી હેલ્થ સર્વે-6 (NFHS-6)ના તાજેતરના આંકડાઓનો હવાલો આપતાં ગુજરાત પ્રદેશ કોંગ્રેસ સમિતિએ રાજ્યમાં મહિલાઓના શિક્ષણ, આર્થિક માલિકી અને ડિજિટલ પહોંચ જેવા મુદ્દાઓ પર ચિંતા વ્યક્ત કરી છે. પક્ષના પ્રવક્તા ડૉ. હિરેન બેન્કરે જણાવ્યું હતું કે સર્વેના આંકડાઓ રાજ્યમાં મહિલાઓની વાસ્તવિક સ્થિતિને સમજવા માટે મહત્વપૂર્ણ સંકેતો આપે છે અને મહિલા સશક્તિકરણને લગતી નીતિઓની અસરકારકતા અંગે ચર્ચા જરૂરી બનાવે છે.
કોંગ્રેસ દ્વારા રજૂ કરાયેલા આંકડાઓ મુજબ, ગુજરાતમાં 6 વર્ષ કે તેથી વધુ વયની 76.3 ટકા મહિલાઓ જ ક્યારેય શાળાએ ગઈ છે, જ્યારે આશરે ચોથા ભાગની મહિલાઓ ક્યારેય શાળાએ ગઈ નથી. આ ઉપરાંત રાજ્યમાં માત્ર 38.6 ટકા મહિલાઓ જ 10 વર્ષ કે તેથી વધુનો અભ્યાસ પૂર્ણ કરી શકી છે.
શિક્ષણના મામલે શહેરી અને ગ્રામ્ય વિસ્તારો વચ્ચે નોંધપાત્ર તફાવત પણ સામે આવ્યો છે. આંકડાઓ મુજબ, શહેરી વિસ્તારોમાં 51.9 ટકા મહિલાઓએ 10 વર્ષ કે તેથી વધુનો અભ્યાસ કર્યો છે, જ્યારે ગ્રામ્ય વિસ્તારોમાં આ પ્રમાણ 28.8 ટકા છે. કોંગ્રેસનું કહેવું છે કે આ તફાવત રાજ્યમાં મહિલાઓ માટે શિક્ષણની સમાન તક ઉપલબ્ધ કરાવવાના પડકારોને દર્શાવે છે.
મહિલાઓના આર્થિક સશક્તિકરણને લઈને પણ પક્ષે કેટલાક આંકડા રજૂ કર્યા છે. કોંગ્રેસના જણાવ્યા અનુસાર, ગુજરાતમાં માત્ર 16 ટકા મહિલાઓ જ ઘર કે જમીનની માલિકી ધરાવે છે. પક્ષનું કહેવું છે કે સંપત્તિમાં માલિકી મહિલાઓના આર્થિક સશક્તિકરણ અને નિર્ણયક્ષમતાના મહત્વના માપદંડોમાંથી એક છે, તેથી આ આંકડો મહિલાઓની આર્થિક ભાગીદારી અંગે ગંભીર પ્રશ્નો ઉભા કરે છે.
ડિજિટલ પહોંચના મુદ્દે રજૂ કરાયેલા આંકડાઓ મુજબ, સમગ્ર ગુજરાતમાં 58.8 ટકા મહિલાઓ પાસે પોતાનો મોબાઇલ ફોન છે, જ્યારે ગ્રામ્ય વિસ્તારોમાં આ પ્રમાણ 46.2 ટકા છે. આ ઉપરાંત રાજ્યમાં 65.7 ટકા મહિલાઓ ઇન્ટરનેટનો ઉપયોગ કરે છે, જેમાં ગ્રામ્ય મહિલાઓમાં આ પ્રમાણ 54.3 ટકા હોવાનું જણાવાયું છે. કોંગ્રેસે જણાવ્યું હતું કે ડિજિટલ યુગમાં શિક્ષણ, સરકારી સેવાઓ અને રોજગારીની તકો સુધી પહોંચ માટે મોબાઇલ અને ઇન્ટરનેટ મહત્વપૂર્ણ સાધન બની ગયા છે, ત્યારે મહિલાઓના એક મોટા વર્ગ સુધી આ સુવિધાઓ મર્યાદિત હોવી ચિંતાજનક બાબત છે.
પક્ષનું કહેવું છે કે મહિલાઓના સશક્તિકરણ અંગેના દાવાઓને વાસ્તવિક અર્થ આપવા માટે શિક્ષણ, સંપત્તિમાં હક અને ડિજિટલ ઍક્સેસ જેવા મૂળભૂત ક્ષેત્રોમાં વધુ નક્કર કામગીરીની જરૂર છે. ખાસ કરીને ગ્રામ્ય વિસ્તારોમાં મહિલાઓ માટે શિક્ષણની પહોંચ, મોબાઇલ અને ઇન્ટરનેટ જેવી ડિજિટલ સુવિધાઓની ઉપલબ્ધતા તેમજ આર્થિક માલિકીના પ્રશ્નો પર વધુ ધ્યાન આપવાની જરૂરિયાત કોંગ્રેસે વ્યક્ત કરી છે.
કોંગ્રેસે રાજ્ય સરકારને મહિલાઓના શિક્ષણ, આર્થિક માલિકી અને ડિજિટલ સમાનતા જેવા મુદ્દાઓ પર પાયાના સ્તરે અસરકારક પગલાં લેવા અપીલ કરી છે. પક્ષના મતે, મહિલાઓના સશક્તિકરણનો મુદ્દો માત્ર યોજનાઓ અને જાહેરાતો પૂરતો મર્યાદિત ન રહી, પરંતુ તે શિક્ષણ, આર્થિક સ્વતંત્રતા અને ટેક્નોલોજી સુધી સમાન પહોંચમાં પણ દેખાવવો જોઈએ.
આ પણ વાંચો – બાળ મજૂરી, માનવ તસ્કરી અને ભિક્ષાવૃત્તિ સામે મોટું અભિયાન: 2024થી અત્યાર સુધીમાં 276 બાળકોનો બચાવ
