અમદાવાદ : 8 માર્ચે નરેન્દ્ર મોદી સ્ટેડિયમમાં યોજાનાર ICC Men’s T20 World Cup 2026ની હાઈ-વોલ્ટેજ ફાઈનલ મેચ (ભારત વિ. ન્યુઝીલેન્ડ)ની ટિકિટોનું કાળાબજાર કરતા બે આરોપીઓને અમદાવાદ શહેર ક્રાઈમ બ્રાન્ચે સફળતાપૂર્વક ઝડપી પાડ્યા છે. આ કાર્યવાહીએ ફરી એક વાર ક્રિકેટના મોટા મેચમાં ટિકિટોની કાળાબજારી અને તેના વિરુદ્ધ પોલીસની સતર્કતા દર્શાવી છે.
પ્રાપ્ત માહિતી અનુસાર, ફાઈનલ મેચની ટિકિટોની ઉંચા ભાવે કાળાબજારી થતી હોવાની બાતમી મળતા ક્રાઈમ બ્રાન્ચની ટીમે ઉસ્માનપુરા, ગુજરાત વિદ્યાપીઠ એસ.ટી. પીક બસ સ્ટેન્ડ પાસે વોચ ગોઠવી હતી. વોચ દરમિયાન શંકાસ્પદ હાલતમાં મળી આવેલા બે આરોપીઓને કોર્ડન કરી તેમની અંગેઝડતી લેતા તેમની પાસેથી ફાઈનલ મેચની કુલ 8 ટિકિટો મળી આવી હતી.
તપાસ દરમિયાન જાણવા મળ્યું કે આરોપીઓએ અગાઉથી ઓનલાઈન ટિકિટો બુક કરાવી હતી અને મેચના આગલા દિવસે તેને નિયત કિંમત કરતા ત્રણ ગણા એટલે કે રૂ. 10,000માં ગેરકાયદેસર રીતે વેચવાનો પ્રયાસ કરી રહ્યા હતા. ક્રાઈમ બ્રાન્ચે તમામ ટિકિટો કબજે કરી લીધી છે અને આરોપીઓ વિરુદ્ધ કાયદેસરની કાર્યવાહી હાથ ધરી છે.
આરોપીઓની ઓળખ
વિપીન રાજેન્દ્રસિંગ ભાટી (રહે. જોધપુર, રાજસ્થાન)
રીતીક રાકેશ યાદવ (રહે. વર્સોવા, મુંબઈ; મૂળ મધ્યપ્રદેશ)
ક્રાઈમ બ્રાન્ચે આ નેટવર્કમાં અન્ય કોઈ વ્યક્તિ સંડોવાયેલ છે કે કેમ તે અંગે વધુ તપાસ તેજ કરી છે. આ કાર્યવાહીથી ફાઈનલ મેચના દિવસે ટિકિટોની કાળાબજારીને અટકાવવામાં મદદ મળી છે અને ખરા ક્રિકેટ પ્રેમીઓને ન્યાય મળ્યો છે.આવા મોટા આંતરરાષ્ટ્રીય મેચમાં ટિકિટોની કાળાબજારી અટકાવવા પોલીસ અને સાયબર સેલની ટીમો સતત સતર્ક છે. જો તમને કોઈ કાળાબજારી અંગે માહિતી મળે તો તરત જ અમદાવાદ ક્રાઈમ બ્રાન્ચ અથવા સ્થાનિક પોલીસને જાણ કરો.
આ પણ વાંચો – મૌન ચીસ સાંભળો : દબાણમાં તૂટી રહેલી કિશોર પેઢી
