અમદાવાદ: શહેરમાં વધતી મોબાઇલ ચોરીની ઘટનાઓને કાબૂમાં લેવા માટે ચલાવવામાં આવેલા એક સપ્તાહના ઇન્ટેન્સિવ ડ્રાઇવ દરમિયાન ક્રાઈમ બ્રાન્ચને મોટી સફળતા મળી છે. આ કામગીરીમાં CEIR (Central Equipment Identity Register) પોર્ટલની મદદથી 200થી વધુ ચોરી થયેલા મોબાઇલ ફોન રિકવર કરવામાં આવ્યા છે.
તપાસ દરમિયાન પોલીસે એક સંગઠિત ગેંગનો પણ પર્દાફાશ કર્યો છે, જે ખાસ કરીને મોંઘા અને હાઈ-એન્ડ સ્માર્ટફોનને નિશાન બનાવતો હતો. ગેંગના સભ્યોને ઝડપી પાડવામાં આવ્યા છે અને તેમની સામે વધુ કાયદેસરની કાર્યવાહી હાથ ધરવામાં આવી રહી છે.
આ મામલે ક્રાઈમ DCP અજીત રાજિયાનએ જણાવ્યું હતું કે, “આ ડ્રાઇવમાં ક્રાઈમ બ્રાન્ચની ત્રણ સભ્યોની ટીમ કાર્યરત હતી. હોમ મિનિસ્ટ્રીના CEIR પોર્ટલના ડેટાના આધારે આ તમામ મોબાઇલ ટ્રેસ કરી રિકવર કરવામાં આવ્યા છે. જેમાં ઇન્ટર-સ્ટેટ મોબાઇલની પણ સફળતાપૂર્વક બરામદગી કરવામાં આવી છે.”
તેમણે વધુમાં ઉમેર્યું કે, મોબાઇલ સાથે સંકળાયેલા કેટલાક આરોપીઓની ધરપકડ પણ કરવામાં આવી છે, પરંતુ તેમની વિગતવાર માહિતી આગામી દિવસોમાં જાહેર કરવામાં આવશે.
આ દરમિયાન આવતીકાલે એક ખાસ સત્રનું આયોજન કરવામાં આવ્યું છે, જેમાં ટેલિકોમ વિભાગના અધિકારીઓ CEIR પોર્ટલના નવા ફીચર્સ અંગે પ્રેઝન્ટેશન આપશે. આ સત્રમાં અધિકારીઓને સમજાવવામાં આવશે કે ચોરી કે ગુમ થયેલા મોબાઇલને કેવી રીતે ટ્રેક અને બ્લોક કરી શકાય અને રિકવરી પ્રક્રિયાને વધુ અસરકારક કેવી રીતે બનાવી શકાય.
ક્રાઈમ બ્રાન્ચ દ્વારા અધિકારીઓને આ સત્રમાં જોડાવા આમંત્રિત કરવામાં આવ્યા છે, જેથી ટેક્નોલોજીના ઉપયોગથી ગુનાખોરી પર વધુ અસરકારક નિયંત્રણ લાવી શકાય.
આ પણ વાંચો – ભારતને સીધું સંબોધતા વિદેશી દેશો : રાજદ્વારી શિસ્ત સામે ઊભો થતો ખતરનાક ટ્રેન્ડ
