અમદાવાદ : ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB)ની ધોરણ 10-12ની પરીક્ષાઓના છેલ્લા દિવસે અમદાવાદ શહેરમાં એકાએક ભયાનક બોમ્બ ધમકીના સમાચાર આવતા જ શિક્ષણ જગત અને પોલીસ તંત્રમાં હાહાકાર મચી ગયો છે. અજાણ્યા સ્ત્રોત દ્વારા મોકલવામાં આવેલા ઈ-મેઈલમાં શહેરની અગ્રણી શાળાઓને બોમ્બથી ઉડાવી દેવાની ધમકી આપવામાં આવી છે, જેના કારણે હજારો વિદ્યાર્થીઓ, વાલીઓ અને શિક્ષકોમાં ભયનો વાતાવરણ ફેલાઈ ગયો છે. જણાવી દઈએ કે, આ પહેલા ગુજરાત વિધાનસભાને બોમ્બથી ઉડાવી દેવાની પણ ધમકી આપવામાં આવી હતી.
કઈ-કઈ શાળાઓને મળી ધમકી?
પ્રાપ્ત માહિતી અનુસાર, શહેરના પશ્ચિમ વિસ્તારની પ્રતિષ્ઠિત શાળાઓને આ ધમકીનું લક્ષ્ય બનાવવામાં આવ્યું છે. આમાં મેમનગરની મહારાજા અગ્રસેન સ્કૂલ, ઘાટલોડિયાની કેલોરેક્સ સ્કૂલ, શાંતિ એશિયાટિક સ્કૂલ સહિત અન્ય અનેક નામાંકિત સંસ્થાઓનો સમાવેશ થાય છે. સવારના સમયે જ આ શાળાઓને ઈ-મેઈલ દ્વારા ધમકી મળી કે શાળા સંકુલમાં વિસ્ફોટકો મૂકી દેવામાં આવ્યા છે અને તેને ઉડાવી દેવામાં આવશે.
પોલીસ-બોમ્બ સ્ક્વોડની તાત્કાલિક કાર્યવાહી
ધમકી મળતાની સાથે જ શાળા સંચાલકોએ પોલીસ કંટ્રોલ રૂમને જાણ કરી. ગણતરીની મિનિટોમાં જ સ્થાનિક પોલીસનો કાફલો, બોમ્બ ડિસ્પોઝલ સ્ક્વોડ (BDDS) અને ડોગ સ્ક્વોડ ઘટનાસ્થળે પહોંચી ગયા. પરીક્ષાનો છેલ્લો દિવસ હોવાથી શાળાઓમાં વિદ્યાર્થીઓની હાજરી મોટી સંખ્યામાં હતી. તકેદારીના ભાગરૂપે તાત્કાલિક અસરથી વર્ગખંડો ખાલી કરાવવામાં આવ્યા અને વિદ્યાર્થીઓને સુરક્ષિત રીતે બહાર કાઢવામાં આવ્યા.
પોલીસના ઉચ્ચ અધિકારીઓના જણાવ્યા મુજબ, પ્રાથમિક તપાસમાં આ એક ‘હોક્સ કોલ’ (ખોટી ધમકી) હોવાનું જણાય છે, પરંતુ સુરક્ષામાં કોઈ કચાશ ન રહે તે માટે દરેક શાળાનું ખૂણેખૂણું તપાસવામાં આવ્યું છે. અમદાવાદ સાયબર ક્રાઈમ બ્રાન્ચ આ મેઈલના IP એડ્રેસને ટ્રેસ કરી રહી છે. અગાઉ પણ ગણતંત્ર દિવસ અને બજેટ સત્ર દરમિયાન આવી જ ધમકીઓ મળી હતી, જેમાં વિદેશી સર્વરનો ઉપયોગ થયો હોવાનું બહાર આવ્યું હતું.
પોલીસ કમિશનરની અપીલ
પોલીસ કમિશનરે વાલીઓ અને વિદ્યાર્થીઓને અપીલ કરી છે કે તેઓ અફવાઓ પર ધ્યાન ન આપે અને ગભરાય નહીં. શાળાઓમાં ચુસ્ત બંદોબસ્ત ગોઠવી દેવામાં આવ્યો છે અને પરીક્ષાની પ્રક્રિયામાં કોઈ ખલેલ ન પહોંચે તેની તકેદારી રાખવામાં આવી રહી છે. હાલમાં કોઈપણ શંકાસ્પદ વસ્તુ મળી આવી નથી, જે રાહતના સમાચાર છે.
આ પણ વાંચો – દિલ્હીમાં કરુણાંતિકા : પાલમના મકાનમાં આગ લાગતા 6 લોકો જીવતા ભૂંજાયા
