મિડલ ઈસ્ટમાં વધતા જતા સંઘર્ષ અને તેલના કુવાઓ પર થયેલા મિસાઈલ હુમલાઓને કારણે વૈશ્વિક બજારોમાં હાહાકાર મચી ગયો છે. ઈરાન દ્વારા કતારના સૌથી મોટા એલએનજી પ્લાન્ટ પર થયેલા હુમલા અને તેના વળતા પ્રહારને કારણે આંતરરાષ્ટ્રીય બજારમાં બ્રેન્ટ ક્રૂડની કિંમત ઉછળીને 112 ડોલર પ્રતિ બેરલ સુધી પહોંચી ગઈ છે. આ જબરદસ્ત ઉછાળાને કારણે આજે એશિયાઈ બજારો સહિત ભારતીય શેરબજારમાં પણ સુનામી જેવી સ્થિતિ સર્જાઈ છે.
ગુરુવારે ટ્રેડિંગની શરૂઆત થતાની સાથે જ મુંબઈ શેરબજારનો સેન્સેક્સ તેના અગાઉના બંધ 76,704ની સરખામણીએ સીધો 74,750 પર ખુલ્યો હતો અને જોતજોતામાં તે 1,900 પોઈન્ટ તૂટીને 74,685 સુધી નીચે ઉતરી ગયો હતો. તેવી જ રીતે નેશનલ સ્ટોક એક્સચેન્જનો નિફ્ટી પણ 23,777ના અગાઉના સ્તરથી 550 પોઈન્ટથી વધુના ઘટાડા સાથે 23,197 પર ખુલ્યો હતો. છેલ્લા ત્રણ દિવસથી બજારમાં જોવા મળી રહેલી તેજી પર આજે અચાનક બ્રેક લાગી ગઈ છે. ભારત સહિત વિશ્વના અનેક દેશોના શેર માર્કેટમાં કડાકા જોવા મળ્યા છે.
જાપાન: નિક્કેઈ ઈન્ડેક્સમાં 1,500 પોઈન્ટથી વધુનો ઘટાડો
હોંગકોંગ: હેંગસેંગ ઈન્ડેક્સ 500 પોઈન્ટથી વધુ તૂટ્યો
દક્ષિણ કોરિયા: કોસ્પી ઈન્ડેક્સમાં 1.50%થી વધુનો ઘટાડો
આ 10 શેરોમાં સૌથી વધુ ધોવાણ
બજારમાં આવેલી આ સુનામીમાં બ્લુચિપ કંપનીઓના શેરોમાં પણ ભારે વેચવાલી જોવા મળી છે. સૌથી વધુ પ્રભાવિત થયેલા શેરોમાં HDFC Bank (4.50%), L&T (3.50%), Eternal (3%) અને Bajaj Finance (2.80%)નો સમાવેશ થાય છે. આ ઉપરાંત Axis Bank, Asian Paints અને Kotak Bank જેવા મોટા શેરો પણ 2%થી વધુ તૂટ્યા છે.
બજારની સ્થિતિ હજુ અસ્થિર છે. મિડલ ઈસ્ટમાં તણાવ વધુ વધે તો તેલની કિંમતો અને શેરબજાર પર વધુ અસર પડી શકે છે.
આ પણ વાંચો – IranWar : ગેસ ફિલ્ડ પર હુમલા પછી કતારના મોટા પેટ્રોલિયમ પ્લાન્ટ પર ઈરાનનો જવાબી હુમલો
