- 2030 કોમનવેલ્થ ગેમ્સ પહેલા આંતરરાષ્ટ્રીય કક્ષાની તૈયારી તેજ, 2036 ઓલિમ્પિક હોસ્ટિંગ માટે પણ અમદાવાદને કેન્દ્રમાં રાખી યોજના
અમદાવાદ : ગુજરાત સરકાર દ્વારા વૈશ્વિક સ્તરના રમતોત્સવોની યજમાની માટે મહત્વપૂર્ણ પગલાં લેવામાં આવી રહ્યા છે. 2030ના કોમનવેલ્થ ગેમ્સ પહેલા યોજાનારા વર્લ્ડ પોલીસ એન્ડ ફાયર ગેમ્સને ધ્યાનમાં રાખીને રાજ્ય સરકારે પૂર્વ DGP વિકાસ સહાયને આયોજક સમિતિના CEO તરીકે નિમણૂક કરી છે.
1989 બેચના IPS અધિકારી વિકાસ સહાય ડિસેમ્બર 2025માં નિવૃત્ત થયા હતા. નિવૃત્તિ બાદ માત્ર ત્રણ મહિનામાં જ તેમને આ મહત્વપૂર્ણ જવાબદારી સોંપવામાં આવી છે, જે રાજ્ય સરકારના તેમના પરના વિશ્વાસને દર્શાવે છે.
આ ગેમ્સ માત્ર એક સ્પોર્ટ્સ ઇવેન્ટ નથી, પરંતુ આંતરરાષ્ટ્રીય સ્તરે ગુજરાતની આયોજન ક્ષમતા અને ઇન્ફ્રાસ્ટ્રક્ચરની કસોટી સમાન છે. વર્લ્ડ પોલીસ એન્ડ ફાયર ગેમ્સમાં વિશ્વભરના પોલીસ, ફાયર અને અન્ય યુનિફોર્મ સર્વિસીસના કર્મચારીઓ ભાગ લે છે, જેને કારણે આ ઇવેન્ટને વૈશ્વિક પ્રતિષ્ઠા પ્રાપ્ત છે.
ગુજરાત સરકાર પહેલેથી જ 2029માં યોજાનારા આ ગેમ્સ અને 2030ના કોમનવેલ્થ ગેમ્સ માટે યજમાની મેળવી ચૂકી છે. આ ઉપરાંત, કેન્દ્ર સરકાર મારફતે 2036ના ઓલિમ્પિક ગેમ્સ અમદાવાદમાં યોજવા માટે પણ પ્રયાસો ચાલી રહ્યા છે.
વિકાસ સહાયની નિમણૂકને માત્ર પ્રશાસનિક નિર્ણય તરીકે જોવો યોગ્ય નહીં હોય. આ પગલું એ સંકેત આપે છે કે રાજ્ય સરકાર કોમનવેલ્થ ગેમ્સ સહિત તમામ વૈશ્વિક ઇવેન્ટ્સને લઈને ગંભીર છે અને કોઈપણ પ્રકારનો જોખમ લેવા તૈયાર નથી.
આવનારા વર્ષોમાં ગુજરાત ખાસ કરીને અમદાવાદ વૈશ્વિક રમતોત્સવોનું કેન્દ્ર બની શકે છે. આવી સ્થિતિમાં, વર્લ્ડ પોલીસ એન્ડ ફાયર ગેમ્સને એક ટેસ્ટ ઇવેન્ટ તરીકે પણ જોવામાં આવી રહ્યું છે, જે રાજ્યની તૈયારીઓ અને વ્યવસ્થાપન ક્ષમતાને પરખશે.
રાજ્ય સરકાર હવે ઇન્ફ્રાસ્ટ્રક્ચર, સુરક્ષા, ટ્રાન્સપોર્ટ અને આંતરરાષ્ટ્રીય ધોરણોને અનુરૂપ સુવિધાઓ ઉભી કરવા માટે ઝડપી ગતિએ આગળ વધી રહી છે. વિકાસ સહાયના નેતૃત્વ હેઠળ આ સમગ્ર આયોજન વધુ ગોઠવાયેલ અને પરિણામકારક બને તેવી અપેક્ષા છે.
આ પણ વાંચો – અમદાવાદની 18 બેંકોમાં 5.67 લાખની નકલી નોટો! ગુનેગારોએ બેન્કોને જ બનાવી ટાર્ગેટ
