- ‘હું તમારો થંબી છું’: સીએમ વિજયનું પ્રથમ સંબોધન, નશાબંધી અને ભ્રષ્ટાચાર મુક્ત શાસનનો આપ્યો કોલ
ચેન્નાઈ: તમિલનાડુના રાજકીય ઈતિહાસમાં રવિવારનો દિવસ સુવર્ણ અક્ષરે લખાશે. દક્ષિણ ભારતીય ફિલ્મોના સુપરસ્ટાર અને ‘થલપતિ’ તરીકે જાણીતા જોસેફ વિજયે તમિલનાડુના નવા મુખ્યમંત્રી તરીકે શપથ ગ્રહણ કર્યા છે. સફેદ શર્ટ, બ્લેઝર અને કાળા પેન્ટમાં સજ્જ વિજય જ્યારે ચેન્નાઈના જવાહરલાલ નેહરુ સ્ટેડિયમમાં પહોંચ્યા, ત્યારે વાતાવરણ ‘દલપતિ! દલપતિ!’ ના નાદથી ગુંજી ઉઠ્યું હતું. રાજ્યપાલ રાજેન્દ્ર વિશ્વનાથ અર્લેકરે તેમને પદ અને ગોપનીયતાના શપથ લેવડાવ્યા હતા.
શપથ વિધિ: ‘હું, સી. જોસેફ વિજય…’
જ્યારે વિજયે તમિલ ભાષામાં શપથ લેતા કહ્યું, ‘સી. જોસેફ વિજય યેનુમ નાન’ (હું, સી. જોસેફ વિજય), ત્યારે સ્ટેડિયમમાં હાજર હજારો સમર્થકોનો ઉત્સાહ ચરમસીમાએ હતો. આ ક્ષણ વિજયની ફિલ્મોના સુપરહિટ ડાયલોગ્સ કરતા પણ વધુ રોમાંચક અને પ્રભાવશાળી સાબિત થઈ હતી.
પ્રથમ ભાષણ: ‘હું તમારો જ પુત્ર, તમારો જ ભાઈ – થંબી છું’
મુખ્યમંત્રી પદના શપથ લીધા બાદ વિજયે રાજ્યની જનતાને સંબોધતા એક અત્યંત ભાવુક અને પ્રેરણાદાયી ભાષણ આપ્યું હતું. તેમણે કહ્યું, “આ માત્ર એક હોદ્દો નથી, પરંતુ એક નવી શરૂઆત છે. હવે તમિલનાડુમાં અસલી ધર્મનિરપેક્ષતા અને સામાજિક ન્યાયનો નવો દોર શરૂ થઈ રહ્યો છે.” પોતાની સામાન્ય પૃષ્ઠભૂમિનો ઉલ્લેખ કરતા તેમણે ઉમેર્યું કે, “હું કોઈ શાહી પરિવારમાં જન્મ્યો નથી. હું તમારા જેવો જ એક સામાન્ય માણસ છું. હું તમારા પરિવારનો પુત્ર અને તમારો ‘થંબી’ (નાનો ભાઈ) છું. મેં ગરીબી અને ભૂખ શું હોય છે તે નજીકથી જોયું છે.”
ભ્રષ્ટાચાર મુક્ત શાસન અને નશાબંધીની ખાતરી
વિજયે પોતાના એજન્ડામાં યુવાનો અને સુરક્ષાને અગ્રતા આપી છે. તેમણે જાહેરાત કરી કે, “આજથી જ હું નશીલા દ્રવ્યોના દૂષણને રોકવા માટે કડક પગલાં ભરીશ. યુવાનોને આ નરકમાંથી બચાવવા એ મારી પ્રથમ ફરજ છે.” આ ઉપરાંત તેમણે કાયદો અને વ્યવસ્થા જાળવવાની તેમજ શિક્ષણ, રસ્તા અને પીવાના પાણી જેવી પાયાની સુવિધાઓ પર ધ્યાન કેન્દ્રિત કરવાની ખાતરી આપી હતી. તેમણે સ્પષ્ટ શબ્દોમાં કહ્યું કે, “હું જનતાના પરસેવાના પૈસાના એક પાઈને પણ અડકીશ નહીં.”
ગઠબંધન સરકાર અને મંત્રીમંડળ
વિજયની પાર્ટી ટીવીકે (TVK) એ વિધાનસભાની 234 બેઠકોમાંથી 108 બેઠકો જીતી છે. બહુમતી માટે જરૂરી 118 ના આંકડા સુધી પહોંચવા માટે તેમણે કોંગ્રેસ, CPI, CPM, VCK અને IUML સાથે પોસ્ટ-પોલ ગઠબંધન કર્યું છે. પ્રથમ તબક્કાના શપથ ગ્રહણમાં વિજયની સાથે ટીવીકેના 9 નેતાઓએ મંત્રી તરીકે શપથ લીધા, જેમાં એન. આનંદ, આદવ અર્જુન અને આર. નિર્મલ કુમાર જેવા દિગ્ગજોનો સમાવેશ થાય છે. માનવામાં આવે છે કે આગામી સમયમાં ગઠબંધનના સાથી પક્ષોને પણ મંત્રીમંડળમાં સ્થાન આપવામાં આવશે.
મહાનુભાવોની હાજરી અને ભાવુક ક્ષણો
આ ઐતિહાસિક અવસરે કોંગ્રેસ નેતા રાહુલ ગાંધી ખાસ ઉપસ્થિત રહ્યા હતા. 1967 પછી પ્રથમ વખત કોંગ્રેસ તમિલનાડુમાં સત્તાધારી ગઠબંધનનો હિસ્સો બની રહી છે, જે રાષ્ટ્રીય રાજકારણ માટે પણ મોટો સંકેત છે. વિજયની સાથે લાંબા સમય સુધી ફિલ્મોમાં કામ કરનાર અભિનેત્રી તૃષા કૃષ્ણન પણ આ સમારોહમાં હાજર રહી હતી. જ્યારે વિજય મુખ્યમંત્રી પદના શપથ લઈ રહ્યા હતા, ત્યારે તેમના માતા-પિતાની આંખોમાં હર્ષના આંસુ હતા.
60 વર્ષ બાદ નવો ઇતિહાસ
તમિલનાડુમાં છેલ્લા છ દાયકાથી દ્રવિડિયન પક્ષો (DMK અને AIADMK) નું વર્ચસ્વ રહ્યું છે. વિજયની જીત સાથે 60 વર્ષ બાદ કોઈ ‘નોન-દ્રવિડિયન’ પક્ષનો નેતા મુખ્યમંત્રી બન્યો છે. આ જીત એ વાતનું પ્રતીક છે કે જનતા હવે પરિવર્તન ઈચ્છે છે અને પરંપરાગત રાજકારણથી કંટાળી છે.
હવે સૌની નજર વિધાનસભામાં યોજાનારા ‘ફ્લોર ટેસ્ટ’ પર છે, જ્યાં વિજયે પોતાની બહુમતી સાબિત કરવાની રહેશે. જોકે, રાજ્યભરમાં પ્રવર્તી રહેલા ઉત્સાહને જોતા લાગે છે કે તમિલનાડુના નવા ‘દલપતિ’ હવે રાજ્યની કાયાપલટ કરવા માટે સજ્જ છે.
