- ગુજરાત એક્સક્લૂસિવ (ભાગ-૯): અમદાવાદનો ડ્રગ્સ નકશો તૈયાર! પૂર્વ-દક્ષિણ બન્યા ડિસ્ટ્રીબ્યુશન હબ, પશ્ચિમ અને ઉત્તર છે સૌથી મોટું બજાર
- માફિયાઓએ અમદાવાદને કેવી રીતે વહેંચી દીધું? ખોખરામાં અનલોડિંગ, બાપુનગરમાં કટિંગ અને શાહપુરથી કોલેજોમાં સપ્લાય
- શહેરમાં ડ્રગ્સના નવા ‘એપિસેન્ટર’નો પર્દાફાશ: રખિયાલ-ગોમતીપુરમાં વેચાય છે સસ્તું ભેળસેળવાળું ઝેર, જાણો સમગ્ર નેટવર્ક
અભિષેક પાંડેય, અમદાવાદ : ગુજરાત એક્સક્લૂસિવની ડ્રગ્સ નેટવર્ક પરની વિશેષ તપાસ શ્રેણીના અત્યાર સુધીના ૮ ભાગમાં આપણે જોયું કે શહેરમાં કયા ડ્રગ્સનું ચલણ છે, તે કેવી રીતે યુવાધનને બરબાદ કરી રહ્યું છે અને તેની પાછળ કયા સફેદપોશ માફિયાઓ સક્રિય છે. હવે આ શ્રેણીના નવમા ભાગમાં આપણે અમદાવાદ શહેરના ડ્રગ્સના મુખ્ય કેન્દ્રો એટલે કે ‘એપિસેન્ટર’ (Epicentre) અંગે વિસ્તૃત તપાસ કરવા જઈ રહ્યા છીએ.
શહેરમાં એમડીએમએ (MDMA) ડ્રગ્સની શરૂઆત ભલે વર્ષ ૨૦૧૬-૧૭ના સમયગાળા દરમિયાન વટવા વિસ્તારમાંથી થઈ હોય, પરંતુ હાલમાં તેના મુખ્ય કેન્દ્રો સંપૂર્ણપણે બદલાઈ ચૂક્યા છે. આજે અમદાવાદમાં એવા અનેક ભૌગોલિક વિસ્તારો વિકસી ચૂક્યા છે, જે ડ્રગ્સના લોજિસ્ટિક્સ અને ડિસ્ટ્રીબ્યુશનમાં અત્યંત મહત્વની ભૂમિકા ભજવી રહ્યા છે. અગાઉના અહેવાલોમાં ઉલ્લેખ કર્યા મુજબ, ભૌગોલિક દૃષ્ટિએ શહેરનો પૂર્વ અને દક્ષિણ ભાગ ડ્રગ્સના ડિસ્ટ્રીબ્યુશન (વિતરણ)નું મુખ્ય કેન્દ્ર છે, જ્યારે પશ્ચિમ અને ઉત્તર ભાગ તેના ગ્રાહકો એટલે કે કન્ઝ્યુમર્સનું સૌથી મોટું બજાર બની રહ્યું છે. તેની પાછળ એક સુનિયોજિત ભૌગોલિક નેટવર્ક કાર્યરત છે.
આ કાળા કારોબારના આંતરિક માળખાને સમજવા માટે તેના મુખ્ય ટ્રાન્ઝિટ અને ડિસ્ટ્રીબ્યુશન પોઈન્ટ્સનું વર્ગીકરણ કરવું જરૂરી છે. વિવિધ સ્ત્રોતો અને જાણકારો પાસેથી મળેલી માહિતી મુજબ, શહેરના વસ્ત્રાલ, શાહપુર, ગોમતીપુર અને ખોખરા જેવા વિસ્તારો ડ્રગ્સના મુખ્ય ટ્રાન્ઝિટ પોઈન્ટ્સ (Transit Points) છે. ગુજરાતની બહારથી અથવા રાજ્યના અન્ય ભાગોમાંથી આવતી ડ્રગ્સની મોટી ખેપ સૌથી પહેલાં આ વિસ્તારોમાં અનલોડ કરવામાં આવે છે અને ત્યારબાદ અહીંથી જ તેને અન્ય વિસ્તારોમાં મોકલવા માટે ફરીથી લોડ કરવામાં આવે છે.
આ ટ્રાન્ઝિટ પોઈન્ટ્સ ઉપરાંત બાપુનગર, રખિયાલ, ગોમતીપુર, કારંજ, શાહપુર, ઈસનપુર, નારોલ, દાણીલીમડા, વેજલપુર અને ચાંદખેડા શહેરના મુખ્ય ડિસ્ટ્રીબ્યુશન પોઈન્ટ્સ (Distribution Points) તરીકે ઉભરી આવ્યા છે, જ્યાંથી ગ્રાઉન્ડ લેવલ પર સમગ્ર નેટવર્કનું સંચાલન કરવામાં આવે છે.
આ નેટવર્કની સૌથી ચોંકાવનારી બાબત એ છે કે આ દરેક વિસ્તારોની પોતાની અલગ ભૂમિકા અને ચોક્કસ કાર્યપદ્ધતિ નક્કી કરવામાં આવી છે. ઉદાહરણ તરીકે, ખોખરા વિસ્તારનો ઉપયોગ માત્ર ડ્રગ્સના બલ્ક જથ્થાને અનલોડ કરવા અથવા ત્યાંથી અન્ય સ્થળે સપ્લાય કરવા માટે જ થાય છે. અહીં કોઈપણ પ્રકારનું છૂટક (રિટેલ) વેચાણ કરવામાં આવતું નથી. સ્ત્રોતોના જણાવ્યા મુજબ, ખોખરા પંથકમાં વેપારના ઓઠા હેઠળ સક્રિય કેટલાક શખ્સો ડ્રગ્સના મોટા પાયે થતા ટ્રાન્સપોર્ટેશનના કાળા કારોબાર સાથે સીધા સંકળાયેલા છે.
બીજી તરફ, બાપુનગર એવો વિસ્તાર છે જ્યાં ડ્રગ્સના મોટા પાર્સલ લાવીને તેનું કટિંગ (નાના ભાગોમાં વિભાજન) કરવામાં આવે છે. અહીંથી છેલ્લા સ્તરના નાના ડિસ્ટ્રીબ્યુટર્સ અને પેડલર્સ સુધી માલ પહોંચાડીને આગળનું નેટવર્ક ચલાવવામાં આવે છે. પશ્ચિમ અમદાવાદના પોશ વિસ્તારો તરફ નજર કરીએ તો, વેજલપુર અને દાણીલીમડાના સ્થાનિક યુવાનો અને પેડલર્સ સૌથી વધુ સક્રિય હોવાનું જાણવા મળે છે, જેઓ પશ્ચિમ વિસ્તારના હાઈ-પ્રોફાઈલ વિસ્તારોમાં ડ્રગ પેડલિંગનું સમગ્ર નેટવર્ક સંભાળે છે.
શહેરના મધ્ય ભાગ અને શૈક્ષણિક સંસ્થાઓની આસપાસના વિસ્તારોમાં ડ્રગ્સ પહોંચાડવામાં શાહપુર અને કારંજ વિસ્તારની ભૂમિકા અત્યંત શંકાસ્પદ માનવામાં આવે છે. જાણકારોના જણાવ્યા મુજબ, શાહપુર વિસ્તારમાં કેટલાક મોટા ડ્રગ ડિસ્ટ્રીબ્યુટર્સ સક્રિય છે, જેઓ મોટા પાયે ડ્રગ્સનો જથ્થો મંગાવી સમગ્ર સપ્લાય નેટવર્કનું સંચાલન કરે છે. આ ડિસ્ટ્રીબ્યુટર્સ શાહપુર અને કારંજના સ્થાનિક યુવકોનો ઉપયોગ કરીને શહેરના મધ્ય ભાગો તથા ચાંદખેડા આસપાસના વિસ્તારોમાં છૂટક વેચાણ કરાવે છે. સાથે જ વેજલપુર અને જુહાપુરાના મોટા પેડલર્સને પણ માલ સપ્લાય કરવાનું કામ શાહપુરના આકાઓ દ્વારા જ કરવામાં આવે છે.
સૌથી ચિંતાજનક બાબત એ છે કે ઉચ્ચ શૈક્ષણિક સંસ્થાઓ અને કોલેજોની આસપાસ થતું મોટાભાગનું રિટેલ વેચાણ પણ આ જ નેટવર્ક દ્વારા સંચાલિત થાય છે. પરિણામે શહેરની અનેક પ્રતિષ્ઠિત શૈક્ષણિક સંસ્થાઓના વિદ્યાર્થીઓ કારંજ અને શાહપુરના પેડલર્સની ચુંગાલમાં સૌથી વધુ ફસાતા હોવાનું સામે આવ્યું છે.
આ સમગ્ર ભૌગોલિક નેટવર્કમાં રખિયાલ અને ગોમતીપુર વિસ્તાર સસ્તા અને ભેળસેળયુક્ત નશાના મુખ્ય હબ તરીકે ઉભરી આવ્યા છે. અમદાવાદ શહેરમાં જે પણ કથિત કોન્ટામિનેટેડ (Contaminated – ભેળસેળયુક્ત) એમડીએમએ અથવા અન્ય કેમિકલયુક્ત ડ્રગ્સ સપ્લાય થાય છે, તે અહીં અત્યંત સસ્તા ભાવે ઉપલબ્ધ કરાવવામાં આવે છે. જાણકારોના જણાવ્યા મુજબ, આવા જીવલેણ અને ભેળસેળયુક્ત ડ્રગ્સના મોટા ભાગના સપ્લાય પર અહીંના સ્થાનિક માફિયાઓનું નિયંત્રણ છે.
બીજી તરફ, શહેરના ઉત્તર ભાગમાં આવેલો ચાંદખેડા વિસ્તાર મુખ્યત્વે ઉત્તર અમદાવાદના ડ્રગ કન્ઝ્યુમર્સ (ગ્રાહકો) માટે એક મોટું ‘બાઈંગ એરિયા’ (Buying Area – ખરીદીનું કેન્દ્ર) બની ચૂક્યો છે. જોકે, અહીં સક્રિય પેડલર્સ મોટાભાગે શહેરના અન્ય વિસ્તારોમાંથી આવીને ઓપરેટ કરતા હોવાનું જાણવા મળ્યું છે.
ડ્રગ્સ નેટવર્કનું આ ભૌગોલિક વિસ્તરણ દર્શાવે છે કે માફિયાઓએ આખા શહેરને કેવી રીતે પોતાના કાળા નકશામાં વહેંચી દીધું છે. દરેક વિસ્તારને અલગ-અલગ જવાબદારી સોંપીને તેમણે એક એવું સંગઠિત નેટવર્ક ઊભું કર્યું છે, જ્યાં ટ્રાન્ઝિટ, ડિસ્ટ્રીબ્યુશન અને કન્ઝ્યુમર માર્કેટ, ત્રણે તબક્કા સુનિયોજિત રીતે એકબીજા સાથે જોડાયેલા છે.
આ પણ વાંચો – વૈષ્ણોદેવીથી તપોવન સર્કલના કેફે હવે ફક્ત હુક્કા બાર નહીં, સાયબર ગુનેગારોની ‘ઓફિસ’
