અમેરિકી રાષ્ટ્રપતિ ડોનાલ્ડ ટ્રમ્પ ફરી એકવાર વિવાદોમાં ઘેરાયા છે. તાજેતરમાં તેમણે સોશિયલ મીડિયા પર એક વીડિયો શેર કર્યો હતો, જેમાં ભારત અને ચીન જેવા દેશોને ‘પ્લેનેટના હેલહોલ’ (પૃથ્વીના નરક સમાન દેશ) ગણાવ્યા હતા. આ નિવેદન બાદ ભારત સરકારે આકરી પ્રતિક્રિયા આપી છે, તો બીજી તરફ ઈરાને ભારતનો પક્ષ લઈને ટ્રમ્પની મજાક ઉડાવતો વીડિયો વાયરલ કર્યો છે.
ભારતના વિદેશ મંત્રાલયનો વળતો પ્રહાર
ભારતીય વિદેશ મંત્રાલય (MEA) ના પ્રવક્તા રણધીર જાયસવાલે આ બાબતે સ્પષ્ટ શબ્દોમાં કહ્યું કે, “આ ટિપ્પણીઓ અયોગ્ય અને ખરાબ ઈરાદાવાળી છે. આ નિવેદન ભારત અને અમેરિકા વચ્ચેના મજબૂત સંબંધોની વાસ્તવિકતાને દર્શાવતું નથી. બંને દેશો લાંબા સમયથી પરસ્પર સન્માન અને ભાગીદારીના પાયા પર જોડાયેલા છે.”
ઈરાને ભારતની સંસ્કૃતિનો વીડિયો શેર કર્યો
આ વિવાદ વચ્ચે ‘ઈરાન ઈન મુંબઈ’ નામના અધિકૃત સોશિયલ મીડિયા હેન્ડલ પરથી ભારતની વિવિધતા અને સુંદર સંસ્કૃતિ દર્શાવતો એક વીડિયો શેર કરવામાં આવ્યો છે. ઈરાને ટ્રમ્પની વાતોને ‘બકવાસ’ ગણાવતા લખ્યું કે, “કદાચ કોઈએ ટ્રમ્પ માટે ભારતની સાંસ્કૃતિક યાત્રા બુક કરવી જોઈએ, જેથી તેમની આવી અર્થહીન વાતો ઓછી થઈ શકે. ક્યારેક ભારત આવીને જુઓ, પછી બોલજો.” સોશિયલ મીડિયા પર ભારતીયો ઈરાનના આ સમર્થનની ખૂબ પ્રશંસા કરી રહ્યા છે.
શું હતો સમગ્ર વિવાદ?
Maybe someone should book a one-way cultural detox for Mr. #Trump, it might just reduce the random bakwaas 😏
Kabhi #India aa ke dekho, phir bolna. pic.twitter.com/kkocLZ31XX
— Iran in Mumbai (@IRANinMumbai) April 23, 2026
ટ્રમ્પે રેડિયો હોસ્ટ માઈકલ સેવેજનો એક વીડિયો શેર કર્યો હતો. આ વીડિયોમાં અમેરિકામાં જન્મના આધારે મળતી નાગરિકતા (Birthright Citizenship) પર નિશાન સાધવામાં આવ્યું હતું. સેવેજે દાવો કર્યો હતો કે અન્ય દેશોના લોકો ગેરકાયદેસર રીતે અમેરિકા આવીને બાળકને જન્મ આપે છે અને પછી પોતાના આખા પરિવારને ભારત કે ચીન જેવા ‘નરક’ માંથી અમેરિકા બોલાવી લે છે.
અમેરિકી દૂતાવાસે મામલો થાળે પાડવા પ્રયાસ કર્યો
વિવાદ વધતા અમેરિકી દૂતાવાસે સ્પષ્ટતા જારી કરી છે. દૂતાવાસના પ્રવક્તાએ જણાવ્યું કે, “રાષ્ટ્રપતિ ટ્રમ્પ ભારતને એક મહાન દેશ માને છે અને વડાપ્રધાન મોદી તેમના ખૂબ સારા મિત્ર છે.”
જોકે, આ પ્રકારના નિવેદનોથી અમેરિકામાં વસતા ભારતીય સમુદાયમાં રોષ જોવા મળી રહ્યો છે. અગાઉ પણ અનેકવાર MAGA (Make America Great Again) સમર્થકો દ્વારા ભારતીય ઈમિગ્રન્ટ્સ અને H-1B વિઝા પ્રોગ્રામ પર નિશાન સાધવામાં આવ્યું છે.
આ પણ વાંચો – બંગાળમાં 92% મતદાનઃ પ્રથમ તબક્કામાં જ આ રેકોર્ડ મતદાનનો શું અર્થ છે?
