અમદાવાદમાંથી એક ચોંકાવનારી ઘટના સામે આવી છે, જ્યાં નોકરીની લાલચ આપીને યુવાનોને વિદેશમાં ફસાવીને સાયબર ઠગાઈ કરાવતી આંતરરાષ્ટ્રીય ગેંગ વિરુદ્ધ ગુજરાત પોલીસે કાર્યવાહી શરૂ કરી છે.
ગુજરાત સાયબર ક્રાઇમ સેલ દ્વારા ફરિયાદ નોંધાવવામાં આવી છે કે, બેંગકોકમાં ઉચ્ચ પગારવાળી નોકરીનું લાલચ આપીને ગુજરાતી યુવાનોને મ્યાનમાર, કમ્બોડિયા અને લાઓસ જેવા દેશોમાં લઈ જવામાં આવે છે. ત્યાં તેમને ચાઇનીઝ ગેંગ દ્વારા ચલાવવામાં આવતા ગેરકાયદેસર કોલ સેન્ટરમાં ફસાવીને ભારત સહિત વિશ્વભરમાં સાયબર ફ્રોડ કરાવવામાં આવે છે. આ ગેંગ દ્વારા મોટી સંખ્યામાં ગુજરાતીઓને લક્ષ્ય બનાવવામાં આવ્યા હોવાનું તપાસમાં બહાર આવ્યું છે.
પોલીસે આ મામલે વિશેષ તપાસ ટીમ રચી છે અને કેન્દ્ર સરકાર પાસેથી મળેલી માહિતીના આધારે તપાસ આગળ વધારી રહી છે. જે લોકો વિદેશમાં નોકરીના નામે ગયા હતા અને પરત ફર્યા છે, તેમની વિગતોના આધારે કાર્યવાહી કરવામાં આવી રહી છે.
તપાસ દરમિયાન સુરતના કૌશિક પેથાણી (રહે. સાઇમિલન રેસીડેન્સી, મોટા વરાછા), ધ્રુવ ડોબરિયા (રહે. એચઆરપી બંગ્લોઝ, કામરેજ), ચેતન સોની અને મનીષ ભાનુસાલી જેવા નામો સામે આવ્યા છે.
ધ્રુવ ડોબરિયાની પૂછપરછમાં ખુલાસો થયો કે, તેના બનેવી મારફતે કૌશિક પેથાણી સાથે સંપર્ક થયો હતો. નોકરીની તલાશમાં ધ્રુવ બેંગકોક ગયો, જ્યાં કૌશિકે તેને મ્યાનમાર લઈ જઈને ચાઇનીઝ ગેંગના સભ્યો સાથે મુલાકાત કરાવી. ત્યાં તાલીમ આપીને ફેસબુક પર છોકરીના નામે ફ્રેન્ડ રિક્વેસ્ટ મોકલી, લોકોને લલચાવીને વોટ્સએપ પર વાત કરી નાણાં પડાવવાનું કામ સોંપાયું.
આ કામમાં હાથ પરીક્ષણ થયા બાદ ધ્રુવને લાઓસ અને કમ્બોડિયાના કોલ સેન્ટરમાં મોકલવામાં આવ્યો, જ્યાં તેને ટીમ લીડર બનાવીને 20 લોકોની ટીમ આપવામાં આવી અને ભારતમાંથી નાણાં પડાવવાની કામગીરી સોંપાઈ. તેને આ કામના બદલામાં 6 ટકા કમિશન અને પગાર મળતો હતો. તેણે ગુજરાતમાંથી બીજા બે લોકોને પણ નોકરીના નામે બોલાવ્યા, પરંતુ તેમને અંગ્રેજી ન આવડતા કામ સોંપી શકાયું નહીં.
પાછળથી લાઓસમાં નાણાંકીય વિવાદ થતા ધ્રુવ પોતાનો પાસપોર્ટ લઈને ગુજરાત પરત આવી ગયો. હાલ કૌશિક પેથાણી મ્યાનમારમાં હોવાની માહિતી મળી છે, જે અંગે પોલીસ વધુ તપાસ કરી રહી છે.
આ પ્રકારના કેસોમાં વધુને વધુ ગુજરાતી યુવાનો ફસાઈ રહ્યા છે, જેથી બેંગકોક કે અન્ય વિદેશી નોકરીના ઓફર આવે તો અત્યંત સાવધાની રાખવી જરૂરી છે. પોલીસે આ ગેંગના મુખ્ય સભ્યો સુધી પહોંચવા માટે તપાસ તેજ કરી છે.
આ પણ વાંચો- પહેલગામ કેસમાં નવો ખુલાસો : રેકી વાળો કેમેરો ચીનમાં થયો એક્ટિવ, NIA ભરશે આંતરરાષ્ટ્રીય કાનૂની પગલું
