વડોદરા (01 માર્ચ 2026) : વડોદરાના જેતલપુર રોડ પર આવેલી વોર્ડ વિઝાર્ડ મેડિકેર પ્રા. લિ. અને તેની હેઠળની હોસ્પિટલોમાં મેડિકલ સાધનોની ખરીદીમાં ગેરરીતિ અને છેતરપિંડીના મોટા કેસમાં કંપનીના પૂર્વ સીઇઓ ડૉ. સંતોષકુમાર હરિભાઈ ગઢવીને ડીસીબી (ડિટેક્શન ઓફ ક્રાઇમ બ્રાન્ચ) પોલીસે અમદાવાદમાંથી ઝડપી પાડ્યા છે. આ છેતરપિંડીથી કંપનીને જીએસટી સહિત કુલ 28.47 કરોડ રૂપિયાનું નુકસાન થયું છે.
કંપનીના ફાઇનાન્સ હેડ મોહસીનખાન રહીમખાન પઠાણે (ઉંમર 42) વડોદરા ક્રાઇમ બ્રાન્ચમાં ફરિયાદ નોંધાવી હતી. ફરિયાદ મુજબ, વોર્ડ વિઝાર્ડ મેડિકેર પ્રા. લિ. વડોદરા (જેતલપુર રોડ) ઉપરાંત નડિયાદ, દહેજ અને ભરૂચમાં હોસ્પિટલો ચલાવે છે. કંપનીએ ડૉ. સંતોષ ગઢવીને જાન્યુઆરી 2022માં સીઇઓ તરીકે નિમણૂક કરી હતી અને તેમને અલગ-અલગ ત્રણ કરાર આધારિત મેડિકલ સાધનો, એસેટ્સની ખરીદી તથા હોસ્પિટલના વહીવટી કાર્યોની સંપૂર્ણ જવાબદારી સોંપી હતી.
1 એપ્રિલ 2022થી 31 જાન્યુઆરી 2025 દરમિયાન ઓડિટ દરમિયાન ખુલાસો થયો કે ડૉ. ગઢવીએ મેડિકલ સાધનોની ખરીદીમાં ભારે ગેરરીતિ આચરી છે. તેમણે બોગસ બિલો તૈયાર કરાવ્યા, નકલી એકાઉન્ટ્સ ખોલાવ્યા અને કંપનીની રકમો ટ્રાન્સફર કરી દીધી. આ ઉપરાંત, તેમણે જૂના અને નીચી ગુણવત્તાવાળા સાધનો ખરીદીને કંપનીને મોટું નુકસાન પહોંચાડ્યું અને પોતાના ખિસ્સામાં પૈસા ભર્યા હોવાનું આરોપ છે.
આરોપીએ ગુનો નોંધાયા પછી આગોતરા જામીન માટે અરજી કરી હતી, પરંતુ તે નામંજૂર થઈ ગઈ. ડીસીબી પી.આઈ. આર.જી. જાડેજાની ટીમને ગુપ્ત માહિતી મળી કે આરોપી અમદાવાદના એસ.જી. હાઇવે પાસે સંસ્કાર એપાર્ટમેન્ટમાં ભાડાના મકાનમાં રહે છે અને નાસતો ફરે છે. તેના આધારે પોલીસ ટીમ અમદાવાદ પહોંચી અને તેને ધરપકડ કરી લીધો.
આરોપી ડૉ. સંતોષ ગઢવીના મૂળ રહેઠાણ બોરસદ (ચતુરપાર્ક સોસાયટી-4, કોરેગાંવ પાર્ક, પૂણે) અને અન્ય સ્થળો પણ નોંધાયા છે. પોલીસે તેને વડોદરા લાવીને વધુ પૂછપરછ શરૂ કરી છે અને આ કેસમાં અન્ય સંડોવાયેલા વ્યક્તિઓની તપાસ ચાલુ છે.
આ પણ વાંચો- મહારાષ્ટ્રના નાગપુરમાં વિસ્ફોટક બનાવતા કારખાનામાં ભયાનક ધમાકો : 17ના મોત, 18 ઘાયલ
