ચેન્નાઈ : તમિલનાડુના મુખ્યમંત્રી તેમજ ડીએમકે પ્રમુખ એમ.કે. સ્ટાલિને પાર્ટીના જિલ્લા સેક્રેટરીઓને સ્પષ્ટ સંદેશ આપ્યો છે કે વ્યક્તિગત મતભેદોને કારણે પાર્ટીની ચૂંટણીની તકોને નુકસાન ન પહોંચે. તેમણે ચેતવણી આપી છે કે જે કોઈ પણ પાર્ટીમાં મુશ્કેલી ઊભી કરશે તેની સામે તરત જ કડક કાર્યવાહી કરવામાં આવશે.
અન્ના અરિવલયમ (પાર્ટી મુખ્યાલય)માં યોજાયેલી બેઠકમાં સ્ટાલિને કહ્યું, “હું પાર્ટીના હિતને વ્યક્તિગત હિત કરતાં ઉપર રાખું છું.”તેમણે કહ્યું કે છેલ્લા એક વર્ષમાં કરેલી મહેનતનું ફળ મેળવવાનો સમય આવી ગયો છે અને આ ચૂંટણી રિલે રેસ જેવી છે. “અમારામાંથી કોઈ પણ આરામ કરી શકે નહીં.
તેમણે કહ્યું કે, વિજય મેળવવા માટે અમારે બમણી મહેનત કરવી પડશે,” મુખ્યમંત્રીએ ચેતવણી આપી કે પાર્ટી પ્રમુખને રાજ્યની 234 બેઠકોમાં શું ચાલી રહ્યું છે તેની સંપૂર્ણ જાણકારી છે. તેમણે કહ્યું કે, “આ સ્ટાલિનની 234 બેઠકોમાં આંખો અને કાન છે. હું સીધી માહિતી મેળવું છું. હવે મને પણ માહિતી મળી રહી છે.”
‘વરિષ્ઠતા બીજા ક્રમે’
સ્ટાલિને સ્પષ્ટ કહ્યું કે જિલ્લા સેક્રેટરીઓના વિસ્તારમાં કેટલી બેઠકો જીતાડી છે તેના આધારે જ તેમનું મૂલ્યાંકન થશે. તેમણે કહ્યું, “પાર્ટીમાં વરિષ્ઠતા બીજા ક્રમે છે. યાદ રાખો કે કેબિનેટમાં સ્થાન માત્ર તેમને જ મળશે જેઓ મહત્તમ બેઠકો જીતાડશે.”
તેમણે વધુમાં જણાવ્યું કે વિવિધ વિસ્તારોના પ્રભારીઓ અને જિલ્લા સેક્રેટરીઓની ફરજ માત્ર વિજય સુનિશ્ચિત કરવાની છે, ઉમેદવારો પસંદ કરવાની નહીં.
તેમણે કહ્યું કે, “ઉમેદવારોની પસંદગી અને તેઓ કઈ બેઠક પરથી લડશે તેની જવાબદારી હું ઉઠાવીશ. સીટો માટે લોબિંગમાં સમય બગાડશો નહીં. સીટો માત્ર તેમને જ મળશે જેઓ લોકોમાં લોકપ્રિય છે અને જીતવાની તેજ તક ધરાવે છે,”
સ્ટાલિને કહ્યું કે તેમને કોઈનો પરિચય કરાવવાની જરૂર નથી, કારણ કે પાર્ટીના ‘ઉડનપિરપ્પે વા’ કાર્યક્રમ દરમિયાન તેમણે લગભગ તમામ કાર્યકર્તાઓ અને અધિકારીઓને મળી લીધા છે. તેમણે કહ્યું કે, “હું દરેકને વ્યક્તિગત રીતે ઓળખું છું. દરેકની અપડેટેડ માહિતી મારી પાસે છે. જે વિજય મેળવશે અને અન્યને જીતાડવામાં મદદ કરશે તેને ઈનામ મળશે.”
તેમણે કહ્યું કે ડીએમકે ચૂંટણી કામગીરીમાં આગળ છે અને મીડિયામાં પણ પાર્ટીના કાર્યકર્તાઓના અસરકારક ક્ષેત્રીય કાર્યની ચર્ચા થઈ રહી છે.
“અમે તમિલનાડુના રાજકીય ક્ષેત્રમાં પ્રભુત્વ જમાવી રહ્યા છીએ. તેમણે કહ્યું કે, પોંગલની ₹3,000ની રોકડ ભેટ, મહિલાઓ માટે ₹5,000 અને અપંગ તથા અન્ય માટે ₹2,000ની યોજનાઓએ લોકોમાં અમારી સ્થિતિને વધુ મજબૂત કરી છે.”
સ્ટાલિને વધુમાં જણાવ્યું કે ડીએમકેએ ગઠબંધનમાં મૂંઝવણ ઊભી કરવાના પ્રયાસોને નિષ્ફળ બનાવ્યા છે અને નવા મિત્રોને પણ જોડવામાં સફળતા મેળવી છે. તેમણે કહ્યું કે, “અમે લોકોમાં તો ખાસ, પરંતુ અમારા રાજકીય વિરોધીઓમાં પણ એવી ઈમેજ બનાવી છે કે અમે ગઠબંધનની તાકાત, દ્રવિડ મોડલ સરકારની કલ્યાણ યોજનાઓ અને અન્ય કાર્યક્રમોના બળથી જીતીશું.”
23 એપ્રિલે યોજાનારી વિધાનસભા ચૂંટણીમાં ડીએમકેની તૈયારીઓ પૂરજોશમાં ચાલી રહી છે.
આ પણ વાંચો – અમેરિકા-ઈઝરાયેલ અને ઈરાન વચ્ચેના યુદ્ધના 18મા દિવસે શું થઈ રહ્યું છે?
