અમદાવાદ: શહેરના સંવેદનશીલ ગણાતા દરિયાપુર વિસ્તારમાં આવેલા જાણીતા ‘મનપસંદ જીમખાના’ ક્લબમાં સ્ટેટ મોનિટરિંગ સેલ (SMC) દ્વારા એક મોટી અને આક્રમક કાર્યવાહી કરવામાં આવી છે. જીમખાનાની આડમાં ધમધમતા એક હાઈપ્રોફાઈલ અને વિશાળ જુગારધામનો પર્દાફાશ કરતા SMCની ટીમે ગેરકાયદેસર રીતે જુગાર રમી રહેલા 150 કરતાં પણ વધુ લોકોને રંગેહાથ ઝડપી પાડ્યા છે. આ અચાનક થયેલા મેગા ઓપરેશનથી સ્થાનિક પોલીસ બેડામાં અને બુટલેગરો-જુગારીઓમાં ભારે ફફડાટ વ્યાપી ગયો છે.
લાખોનો મુદ્દામાલ જપ્ત
પ્રાપ્ત વિગતો અનુસાર, ક્લબમાં મોટા પાયે જુગાર રમાતો હોવાની ચોક્કસ બાતમી ગાંધીનગર SMCના ઉચ્ચ અધિકારીઓને મળી હતી. જેના આધારે અલગ-અલગ ટીમો બનાવીને ક્લબ પર અચાનક દરોડો પાડવામાં આવ્યો હતો. પોલીસના આક્રમક પ્રવેશથી જુગારીઓમાં ભારે નાસભાગ મચી ગઈ હતી. આ રેડની કાર્યવાહીમાં પોલીસની ટીમે સ્થળ પરથી મોટી માત્રામાં રોકડ રકમ, મોબાઈલ ફોન, વાહનો અને જુગારના સાધનો સહિત લાખો રૂપિયાનો શંકાસ્પદ મુદ્દામાલ જપ્ત કર્યો છે. હાલ તમામ આરોપીઓ સામે કાયદેસરની કાર્યવાહી હાથ ધરીને વધુ તપાસ શરૂ કરવામાં આવી છે.
સ્થાનિક પોલીસની કામગીરી સામે સવાલ
નોંધનીય છે કે, શહેરમાં એક જ સ્થળેથી આટલી મોટી સંખ્યામાં જુગારીઓ પકડાવાની આ તાજેતરની સૌથી મોટી કાર્યવાહી માનવામાં આવી રહી છે. જોકે, આટલા મોટા પાયે હાઈપ્રોફાઈલ જુગારધામ ચાલતું હોવા છતાં સ્થાનિક પોલીસ તેનાથી અજાણ હતી, જેના કારણે સીધી સ્ટેટ મોનિટરિંગ સેલ દ્વારા આ રેડ કરવામાં આવતા સ્થાનિક પોલીસની કામગીરી સામે પણ મોટા પ્રશ્નાર્થ ઊભા થયા છે.
આ પણ વાંચો – પોલીસની કામગીરીને પ્રોત્સાહન : હવે વહીવટી સ્ટાફ, ડોગ સ્ક્વોડ અને બોમ્બ સ્ક્વોડને પણ મળશે ‘DGP કમેન્ડેશન ડિસ્ક’
