અમદાવાદ : મેટ્રોપોલિટન કોર્ટ સંકુલમાં અચાનક મળેલી ધમકીને કારણે સુરક્ષા વ્યવસ્થા ચુસ્ત બનાવવામાં આવી છે. કોર્ટના અમુક વિભાગો ‘અપના બજાર’ બિલ્ડિંગમાં કાર્યરત હોવાથી સાવચેતીના ભાગરૂપે તે વિભાગોને તરત જ ખાલી કરાવી દેવામાં આવ્યા છે. આ ઘટનાથી આખા કોર્ટ કેમ્પસમાં તંગ વાતાવરણ જોવા મળી રહ્યું છે.
ઘટનાસ્થળે તરત જ ફાયર વિભાગની ત્રણ ગાડીઓ તહેનાત કરવામાં આવી છે. સ્થાનિક પોલીસની ટીમ સાથે ડોગ સ્ક્વોડ અને બોમ્બ ડિસ્પોઝલ સ્ક્વોડની ટીમો પણ સંકુલમાં પહોંચી ગઈ છે. આ ટીમોએ તરત જ તપાસની પ્રક્રિયા શરૂ કરી દીધી છે. હાલ પોલીસ દ્વારા સમગ્ર કોર્ટ કેમ્પસનું ખૂણે ખૂણે ચેકિંગ કરવામાં આવી રહ્યું છે. કોર્ટના દરેક વિભાગ, ઓફિસો અને આસપાસના વિસ્તારોમાં સઘન તપાસ હાથ ધરવામાં આવી છે.
પોલીસ અધિકારીઓએ જણાવ્યું કે, આ ધમકી કોણે અને કયા માધ્યમથી આપી તે દિશામાં પણ ઉચ્ચ પોલીસ અધિકારીઓ દ્વારા તપાસના ચક્રો ગતિમાન કરવામાં આવ્યા છે. ધમકીનો સ્ત્રોત શોધવા માટે સાયબર સેલ અને અન્ય સંબંધિત વિભાગોને પણ સક્રિય કરવામાં આવ્યા છે. કોર્ટ સંકુલમાં પોલીસનો ચુસ્ત બંદોબસ્ત ગોઠવી દેવાયો છે. પ્રવેશદ્વારે સખત ચેકિંગ ચાલુ છે અને કોર્ટના કાર્યો અસ્થાયી રીતે અસરગ્રસ્ત થયા છે.
આ ઘટના દરમિયાન કોર્ટમાં હાજર વકીલો, કર્મચારીઓ અને સામાન્ય લોકોને સુરક્ષિત સ્થળે ખસેડવામાં આવ્યા છે. અત્યાર સુધી કોઈ અનિચ્છનીય ઘટના બની નથી, પરંતુ સુરક્ષા દૃષ્ટિએ કોર્ટ સંકુલને સંપૂર્ણપણે સીલ કરવામાં આવ્યું છે. વરિષ્ઠ પોલીસ અધિકારીઓ સતત મોનિટરિંગ કરી રહ્યા છે અને જલ્દી જ પરિસ્થિતિને સામાન્ય બનાવવાના પ્રયાસો ચાલી રહ્યા છે.
આવી ધમકીઓ કોર્ટના કાર્ય અને ન્યાય વ્યવસ્થાને અસર કરે છે તેવું માનવામાં આવે છે. પોલીસે લોકોને અપીલ કરી છે કે કોઈ પણ અફવાઓ પર ધ્યાન ન આપે અને સત્તાવાર માહિતીની રાહ જુએ.
અપડેટ: તપાસ હજુ ચાલુ છે. વધુ વિગતો મળતાં જ અહેવાલ આપવામાં આવશે. ઉલ્લેખનિય છે કે, પાછલા કેટલાક સમયથી રાજ્યમાં વિવિધ વિભાગોને બોમ્બની ધમકીઓ મળી રહી છે. જો કે, અત્યાર સુધીમાં તમામ ધમકીઓ ખોટી સાબિત થઈ છે. પરંતુ ધમકી મળતા જ પોલીસને પોતાના માપદંડો અનુસાર તપાસ કરવી જ પડે છે. આવી ધમકીઓના કારણે વારંવાર પેનિક ક્રિએટ કરવામાં આવી રહી છે.
આ પણ વાંચો – ઈરાનમાં સ્કૂલ પર હુમલા માટે અમેરિકા જવાબદાર હોઈ શકે છે : પૂર્વ સીઆઈએ ડિરેક્ટરનો દાવો
