બગદાદ/તેહરાન : ઈરાકના પશ્ચિમી વિસ્તારમાં અમેરિકી વાયુસેનાનું એક KC-135 રિફ્યુઅલિંગ વિમાન ક્રેશ થયું છે. અમેરિકી સેન્ટ્રલ કમાન્ડે આ ઘટનાની પુષ્ટિ કરી છે અને જણાવ્યું છે કે વિમાન “દોસ્ત દેશના એરસ્પેસ”માં પડ્યું હતું. આ ક્રેશમાં બે વિમાનો સામેલ હતા. એક ક્રેશ થયું, જ્યારે બીજું વિમાન સુરક્ષિત ઉતરી ગયું.
અમેરિકી સેન્ટ્રલ કમાન્ડે સ્પષ્ટ કર્યું છે કે આ ઘટના દુશ્મનની ગોળીબારી કે પોતાની સેનાની ગોળીબારીને કારણે નથી થઈ. વિમાનમાં કેટલા લોકો હતા અને કેટલા લોકોનું મોત થયું છે તે અંગે હજુ સુધી કોઈ માહિતી જાહેર કરવામાં આવી નથી. આ KC-135 વિમાન હવામાં જ લડાકુ વિમાનોને ઈંધણ ભરવાનું કામ કરે છે, જે યુદ્ધમાં ખૂબ મહત્વનું હથિયાર છે.
ઈરાનના નવા સુપ્રીમ લીડરનું પ્રથમ નિવેદન
આ ઘટના પહેલા ઈરાનના નવા સુપ્રીમ લીડર મોજતબા ખામેનેઈએ પહેલો જાહેર સંદેશ આપ્યો છે. ઈરાની ટેલિવિઝન પર એન્કર દ્વારા વાંચવામાં આવેલા સંદેશમાં તેમણે હોર્મુઝ સ્ટ્રેટની નાકાબંધી ચાલુ રાખવા અને મિનાબ સ્કૂલના બાળકો સહિત શહીદોના ખૂનનો બદલો લેવા પર ભાર મૂક્યો છે. તેમણે કહ્યું કે “અન્ય મોરચાઓ ખોલવાના વિચાર પર ચિંતન ચાલી રહ્યું છે, જ્યાં દુશ્મનને ઓછો અનુભવ છે.” તેમણે યમન, લેબનોનના હિઝબુલ્લાહ અને ઈરાકના રેઝિસ્ટન્સની પ્રશંસા કરી.
વામાં ઈંધણ ભરવાની પ્રક્રિયા
KC-135 જેવા રિફ્યુઅલિંગ વિમાનો યુદ્ધમાં લાંબા અંતરની ઉડાન માટે લડાકુ વિમાનોને હવામાં જ ઈંધણ ભરે છે. આ પ્રક્રિયામાં લડાકુ વિમાનને ટેન્કર વિમાનની ખૂબ નજીક ઉડાવવું પડે છે. ટેન્કરમાંથી ઈંધણ પાઈપ (પ્રોબ) બહાર કાઢવામાં આવે છે અને લડાકુ વિમાન તેને પોતાના સાથે જોડે છે. આ દરમિયાન બંને વિમાનો માત્ર થોડા ફૂટના અંતરે ઉડે છે. આ કામમાં ઘણી કુશળતા જરૂરી છે, ખાસ કરીને રાત્રે અથવા દુશ્મનથી બચવા માટે લાઈટ્સ બંધ કરીને કામગીરી કરવી પડતી હોય છે.
KC-135માં સામાન્ય રીતે ત્રણ સભ્યોનું ક્રૂ હોય છે. પાયલટ, કો-પાયલટ અને બૂમ ઓપરેટર (જે હવામાં ઈંધણ ભરવાની પ્રક્રિયા સંભાળે છે). અમેરિકી વાયુસેના પાસે આવા લગભગ 400 ટેન્કર વિમાનો છે.
ઈરાનનું નવું નેતૃત્વ અને યુદ્ધનું ભવિષ્ય
આ ક્રેશ ઈરાન યુદ્ધના તીવ્ર તબક્કામાં થયું છે, જ્યારે ઈરાનના પૂર્વ સુપ્રીમ લીડર આયતુલ્લાહ અલી ખામેનેઈ સહિત અનેક વરિષ્ઠ અધિકારીઓના મોત થયા છે. તેમના પુત્ર મોજતબા ખામેનેઈને નવા સુપ્રીમ લીડર તરીકે ચૂંટવામાં આવ્યા છે. તેમનો આ પહેલો સંદેશ ઈરાનની આક્રમક નીતિનો સંકેત આપે છે અને યુદ્ધમાં નવા મોરચા ખોલવાની શક્યતા દર્શાવે છે.
આ ઘટનાએ વૈશ્વિક સ્તરે ચિંતા વધારી છે. અમેરિકી સેન્ટ્રલ કમાન્ડે તપાસ શરૂ કરી છે, પરંતુ હજુ સુધી કારણ સ્પષ્ટ થયું નથી. આ ક્રેશ યુદ્ધમાં હવાઈ કામગીરીના જોખમને ફરી ઉજાગર કરે છે.
