અમેરિકાએ ઈરાનના નવા સુપ્રીમ લીડર મોજતબા ખામેનેઈ (Mojtaba Khamenei) પર ભારે ઈનામ જાહેર કર્યું છે. અમેરિકી વિદેશ વિભાગે આયતુલ્લાહ અલી ખામેનેઈના પુત્ર મોજતબા ખામેનેઈ સહિત ઈરાનના 10 વરિષ્ઠ નેતાઓ અને અધિકારીઓની યાદી જાહેર કરી છે. આ લોકો વિશે માહિતી આપનારને 1 કરોડ ડોલર (લગભગ 92.60 કરોડ રૂપિયા)નું ઈનામ મળશે.
અમેરિકી વિદેશ વિભાગે પોતાના ‘રિવોર્ડ્સ ફોર જસ્ટિસ’ પ્રોગ્રામ હેઠળ આ ઈનામની જાહેરાત કરી છે. 13 માર્ચે ‘રિવોર્ડ્સ ફોર જસ્ટિસ’એ ‘X’ પર એક પોસ્ટર શેર કર્યું હતું, જેમાં કુલ 10 ઈરાની નેતાઓ અને અધિકારીઓને ‘આતંકવાદી’ ગણાવીને તેમના વિશે માહિતી માંગવામાં આવી છે.
આ યાદીમાં નવા સુપ્રીમ લીડર મોજતબા ખામેનેઈ ઉપરાંત સુપ્રીમ લીડર ઓફિસના ડેપ્યુટી ચીફ ઓફ સ્ટાફ અલી અસગર હેજાઝી, સુપ્રીમ લીડર ઓફિસના મિલિટરી એડ્વાઈઝર મેજર જનરલ યાહ્યા રહીમ સફવી, સુપ્રીમ નેશનલ સિક્યોરિટી કાઉન્સિલના સેક્રેટરી અલી લારિજાની, ગૃહ મંત્રી બ્રિગેડિયર ઇસ્કંદર મોમેની, ખુફિયા અને સુરક્ષા મંત્રી ઇસ્માઈલ ખતીબના નામ છે.
આ ઉપરાંત, ડિફેન્સ કાઉન્સિલના સેક્રેટરી, સુપ્રીમ લીડરના એડ્વાઈઝર, સુપ્રીમ લીડર ઓફિસના મિલિટરી ઓફિસ ચીફ, ઇસ્લામિક રિવોલ્યુશનરી ગાર્ડ કોર્પ્સ (IRGC)ના કમાન્ડર પણ અમેરિકાની યાદીમાં સામેલ છે.
પોસ્ટરમાં લખવામાં આવ્યું છે કે, “આ લોકો ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC)ના અલગ-અલગ ભાગોને કમાન્ડ અને ડાયરેક્ટ કરે છે, જે દુનિયાભરમાં આતંકવાદની યોજના બનાવે છે, તેને સંગઠિત કરે છે અને તેને અમલમાં મૂકે છે.”
પોસ્ટરમાં દાવો કરવામાં આવ્યો છે કે આ લોકો વિશે માહિતીના આધારે ઈનામ 1 કરોડ ડોલર (લગભગ 92.60 કરોડ રૂપિયા) સુધી હોઈ શકે છે. એ પણ જણાવવામાં આવ્યું છે કે વિશ્વસનીય માહિતી આપનાર વ્યક્તિઓને જરૂર પડે તો અન્ય જગ્યાએ વસાવવાની સુવિધા પણ આપી શકાય છે.
અમેરિકી વિદેશ વિભાગે કહ્યું છે કે જે લોકો પાસે આ યાદીમાં સામેલ વ્યક્તિઓ વિશે માહિતી છે, તેઓ એન્ક્રિપ્ટેડ મેસેજિંગ પ્લેટફોર્મ અથવા ટોર (Tor) નેટવર્ક પર સુરક્ષિત ચેનલ દ્વારા આ પ્રોગ્રામ સાથે સંપર્ક કરી શકે છે.
Got information on these Iranian terrorist leaders?
Send us a tip. It could make you eligible for a reward and relocation. pic.twitter.com/y7avkqdGWw
— Rewards for Justice (@RFJ_USA) March 13, 2026
આ પહેલાં અંગ્રેજી અખબાર ‘ધ સન’ના એક અહેવાલમાં દાવો કરવામાં આવ્યો હતો કે સુપ્રીમ લીડર મોજતબા ખામેનેઈ કોમામાં છે અને એક હવાઈ હુમલા દરમિયાન તેમણે એક પગ ગુમાવી દીધો છે. દાવો કરવામાં આવ્યો હતો કે મોજતબાને પેટ અને લિવરમાં પણ ગંભીર ઈજા થઈ છે. આ જ હુમલામાં તેમના પિતા આયતુલ્લાહ અલી ખામેનેઈનું મોત થયું હતું.
‘ધ સન’ અનુસાર, ખામેનેઈ હાલ તેહરાનના એક હોસ્પિટલમાં કડક સુરક્ષા વચ્ચે સારવાર લઈ રહ્યા છે. ઈરાની અધિકારીઓના હવાલાથી અહેવાલોમાં દાવો કરવામાં આવ્યો છે કે મોજતબા ઘાયલ તો થયા હતા, પરંતુ હવે તેઓ સુરક્ષિત છે અને તેમની તબિયતમાં સુધારો થઈ રહ્યો છે. જો કે, મોજતબા ખામેનેઈ કોમામાં હોવા એક પગ ગુમાવવા અને પેટ કે લિવરમાં ગંભીર ઈજા સાથે જોડાયેલા દાવાઓની અત્યાર સુધી અધિકૃત પુષ્ટિ થઈ નથી.
આ પણ વાંચો – પેટના દુઃખાવાથી ખુલી ગઈ કાકાની ક્રૂરતા : 14 વર્ષની ભત્રીજી પર દુષ્કર્મ, ધરપકડ
