રાજકોટ : રાજકોટમાં એક દુઃખદ અને ચોંકાવનારી ઘટના સામે આવી છે, જેમાં 14 વર્ષની સગીરા પર તેના જ કૌટુંબિક કાકાએ છેલ્લા પાંચ મહિનાથી વારંવાર દુષ્કર્મ આચર્યું હોવાનો ઘટસ્ફોટ થયો છે. આ ઘટના મૂળ મધ્ય પ્રદેશના અને હાલ રાજકોટમાં મજૂરી કરતા પરિવાર સાથે જોડાયેલી છે.
ઘટનાની શરૂઆત ત્યારે થઈ જ્યારે સગીરાને અચાનક પેટમાં તીવ્ર દુઃખાવો થયો અને તેને તાત્કાલિક હોસ્પિટલ લઈ જવામાં આવી. તપાસ દરમિયાન તબીબોએ બાળકી પાસેથી કેટલીક ગોળીઓ મળી આવી, જેની તપાસ કરતાં તે ગર્ભનિરોધક ગોળીઓ હોવાનું જાણવા મળ્યું. આ વાતથી આઘાત પામેલા પિતાએ પુત્રીને વિશ્વાસમાં લઈને પૂછપરછ કરી, ત્યારે સગીરાએ રડતા-રડતા પોતાની વેદના વ્યક્ત કરી.
બાળકીએ જણાવ્યું કે, તેના સાથે જ રહેતો 37 વર્ષીય કાકો છેલ્લા પાંચ મહિનાથી જ્યારે પિતા કામે બહાર હોય ત્યારે તેની સાથે બળજબરી કરતો હતો. પોતે પકડાઈ ન જાય તે માટે કાકો તેને ગર્ભનિરોધક ગોળીઓ ખવડાવતો હતો અને કોઈને કહેશે તો જાનથી મારી નાખવાની ધમકી આપતો હતો.
પોલીસ તપાસમાં બહાર આવ્યું છે કે આરોપી કાકાની પત્ની અને બાળકો પિયરમાં રિસામણે હતા. આ ગેરહાજરીનો લાભ ઉઠાવીને તેણે પોતાની ભત્રીજી પર આ કુકર્મ આચર્યું હતું. પ્રથમ વખત આ ઘટના 5 મહિના પહેલાં બની હતી, જ્યારે પિતા કામે બહાર હતા.
આ ઘટનાની ફરિયાદ પર રાજકોટ બી-ડિવિઝન પોલીસે ત્વરિત કાર્યવાહી કરી આરોપીની ધરપકડ કરી છે. આરોપી સામે ભારતીય ન્યાય સંહિતા (BNS)ની કલમ 65(1), 351(3) તથા POCSO એક્ટની કલમ 4(2) અને 6(1) હેઠળ ગુનો નોંધવામાં આવ્યો છે. પોલીસે વધુ તપાસ હાથ ધરી છે અને આરોપીની પૂછપરછ ચાલુ છે.
આ ઘટના ફરી એક વાર ઘરેલુ હિંસા અને બાળ સુરક્ષાના મુદ્દાને ગંભીરતાથી લેવાની જરૂરિયાત દર્શાવે છે. સમાજમાં આવા કુકર્મોને અટકાવવા માટે જાગૃતિ અને સખત કાર્યવાહીની જરૂર છે.
આ પણ વાંચો – વડોદરા : બકરાવાડીમાં ઘરકંકાસમાં પતિએ પત્નીની ચાકુથી કરી હત્યા, બે બાળકો બન્યા અનાથ
