ગાંધીનગર: બાળકો સામેના જઘન્ય અપરાધોમાં કાયદો કોઈ પણ પ્રકારની ઢીલાશ નહીં રાખે, તેવો એક કડક અને સ્પષ્ટ સંદેશ આપતો ચુકાદો ગાંધીનગરની પોક્સો (POCSO) કોર્ટે આપ્યો છે. ગાંધીનગરના સેક્ટર-૨૪ માં માત્ર ચાર વર્ષની માસૂમ બાળકી સાથે દુષ્કર્મ આચરવાના ગંભીર કેસમાં કોર્ટે આરોપી રામ યાદવને દોષિત ઠેરવી આજીવન કારાવાસની સજા ફટકારી છે. પોલીસની ઝડપી તપાસ અને ન્યાયતંત્રની વેગવંતી સુનાવણીના કારણે પીડિતાને ટૂંકા ગાળામાં જ ન્યાય મળ્યો છે. કોર્ટે જીવનના છેલ્લા શ્વાસ સુધીની સજા એટલે કે આજીવન કારાવાસ ફટકારી છે. આ ઉપરાંત, પીડિતાને 10 લાખ રૂપિયાનું વળતર ચૂકવવાનો આદેશ આપ્યો છે. ઉલ્લેખનીય છે કે, કોર્ટે કેદમાં દોષિતનું મોત થાય પછી જ લાશ તેના વાલીને સોંપવા માટે હુકમ કર્યો છે.
શું હતી સમગ્ર ઘટના?
ગત ૮ ડિસેમ્બરના રોજ ગાંધીનગરના સેક્ટર-૨૪ વિસ્તારમાં આ હૃદયદ્રાવક ઘટના બની હતી. રામ યાદવ નામના શખ્સે ચાર વર્ષની માસૂમ બાળકીને પોતાની હવસનો શિકાર બનાવી હતી. આ ઘટના પ્રકાશમાં આવતા જ સમગ્ર પંથકમાં ભારે રોષ અને અરેરાટી વ્યાપી ગઈ હતી. મામલાની ગંભીરતાને જોતા ગાંધીનગર પોલીસે તાત્કાલિક એક્શનમાં આવીને આરોપીને દબોચી લેવા માટે ચક્રો ગતિમાન કર્યા હતા.
ધરપકડ સમયે પોલીસે કરવું પડ્યું હતું ફાયરિંગ
આરોપી રામ યાદવ એટલો શાતિર હતો કે જ્યારે પોલીસની ટીમ તેની ધરપકડ કરવા પહોંચી, ત્યારે તેણે કાયદાને શરણે થવાના બદલે પોલીસથી બચીને ભાગવાનો પ્રયાસ કર્યો હતો. જોકે, પોલીસે આરોપીને કોઈપણ ભોગે ફરાર થવા દેવા માંગતી ન હોવાથી તેને રોકવા માટે ફાયરિંગ કરવાની પણ ફરજ પડી હતી અને અંતે તેને ઝડપી લેવામાં આવ્યો હતો.
માત્ર ૧૩ દિવસમાં ચાર્જશીટ, ૫ મહિનામાં ચુકાદો
આ કેસમાં ગુજરાત પોલીસ અને ન્યાયિક તંત્રની કામગીરી અત્યંત પ્રશંસનીય અને દાખલારૂપ રહી છે. પોલીસે રાત-દિવસ એક કરીને ગુનાને લગતા તમામ જરૂરી અને વૈજ્ઞાનિક પુરાવાઓ એકત્રિત કર્યા હતા અને ધરપકડના માત્ર ૧૩ દિવસના અત્યંત ટૂંકા ગાળામાં જ કોર્ટ સમક્ષ મજબૂત ચાર્જશીટ રજૂ કરી દીધી હતી.
પોલીસની આ ઝડપી કામગીરીને પગલે કોર્ટમાં પણ ન્યાયિક પ્રક્રિયા અત્યંત ઝડપથી ચાલી હતી. કોર્ટે માત્ર ૫ મહિનામાં કેસની તમામ સુનાવણી અને દલીલો સાંભળીને પોતાનો અંતિમ ચુકાદો આપી દીધો છે.
આજીવન કેદ અને ૧૦ લાખનો દંડ
આજે ગાંધીનગરની પોક્સો કોર્ટે ઐતિહાસિક ચુકાદો આપતા આરોપી રામ યાદવને આજીવન કેદની કડક સજા ફટકારી છે. આ ઉપરાંત, કોર્ટે માનવીય અભિગમ દાખવીને પીડિત બાળકીના પરિવારને આર્થિક સહાયરૂપે રૂપિયા ૧૦ લાખનું વળતર ચૂકવવા માટે પણ આરોપીને દંડ ફટકાર્યો છે. આ કેસની ઝડપી તપાસ અને કડક સજાના પગલે સામાન્ય જનતાનો ન્યાયતંત્ર પરનો વિશ્વાસ વધુ દૃઢ બન્યો છે.
