- પાલનપુર રહેશે મુખ્ય મથક, બોર્ડર રેન્જનું વિભાજન કરીને પાટણ, પાલનપુર અને વાવ-થરાદ જિલ્લાને નવી રેન્જમાં સામેલ કરાયા
અમદાવાદ : ભારત-પાકિસ્તાન સરહદ સાથે જોડાયેલા વિસ્તારોમાં સુરક્ષા વ્યવસ્થાને વધુ અસરકારક બનાવવા અને પોલીસ વહીવટને સરળ બનાવવા માટે ગુજરાત સરકારના ગૃહ વિભાગે મહત્વપૂર્ણ નિર્ણય લીધો છે. રાજ્યની સૌથી વિશાળ ગણાતી બોર્ડર રેન્જનું પુનર્ગઠન કરીને નવી ‘બનાસકાંઠા રેન્જ’ની રચના કરવામાં આવી છે. આ નવી રેન્જનું મુખ્ય મથક પાલનપુર ખાતે કાર્યરત રહેશે.
ગૃહ વિભાગ દ્વારા બહાર પાડવામાં આવેલા ઠરાવ મુજબ અગાઉની બોર્ડર રેન્જ હેઠળ પશ્ચિમ કચ્છ (ભુજ), પૂર્વ કચ્છ (ગાંધીધામ), પાટણ અને બનાસકાંઠા જેવા વિશાળ જિલ્લાઓનો સમાવેશ થતો હતો. આશરે 550 કિલોમીટર જેટલા ભૌગોલિક વિસ્તાર ધરાવતી આ રેન્જમાં 406.87 કિલોમીટરની આંતરરાષ્ટ્રીય જમીન સરહદ અને 238 કિલોમીટરનો દરિયાઈ વિસ્તાર આવતો હોવાથી કાયદો-વ્યવસ્થા જાળવવા અને સરહદી વિસ્તારો પર અસરકારક દેખરેખ રાખવામાં વહીવટી પડકારો ઊભા થઈ રહ્યા હતા.
તાજેતરમાં બનાસકાંઠા જિલ્લાના વિભાજન બાદ વાવ-થરાદ નવો જિલ્લો અસ્તિત્વમાં આવ્યો છે. બદલાતી વહીવટી જરૂરિયાતો અને સરહદી સુરક્ષાને ધ્યાનમાં રાખીને નવી બનાસકાંઠા રેન્જની રચના કરવાનો નિર્ણય લેવામાં આવ્યો હોવાનું ગૃહ વિભાગે જણાવ્યું છે.
રેન્જનું નવું માળખું
નવી વ્યવસ્થા અનુસાર બોર્ડર રેન્જમાં હવે પશ્ચિમ કચ્છ-ભુજ, પૂર્વ કચ્છ-ગાંધીધામ અને મોરબી જિલ્લાનો સમાવેશ કરવામાં આવ્યો છે. મોરબી અગાઉ રાજકોટ રેન્જ હેઠળ આવતો હતો, પરંતુ કચ્છની સરહદને અડીને આવેલા તેના ભૌગોલિક સ્થાનને ધ્યાનમાં રાખીને તેને બોર્ડર રેન્જમાં સ્થાન અપાયું છે.
નવી રચાયેલી બનાસકાંઠા રેન્જમાં પાલનપુર, પાટણ અને વાવ-થરાદ જિલ્લાનો સમાવેશ કરવામાં આવ્યો છે. પાલનપુર આ રેન્જનું મુખ્ય મથક રહેશે.
મોરબી જિલ્લો અલગ થયા બાદ રાજકોટ રેન્જનું પણ પુનર્ગઠન કરવામાં આવ્યું છે. હવે રાજકોટ રેન્જ હેઠળ રાજકોટ ગ્રામ્ય, જામનગર, દેવભૂમિ દ્વારકા અને સુરેન્દ્રનગર જિલ્લાઓ રહેશે.
ગૃહ વિભાગના આ નિર્ણયથી ભારત-પાકિસ્તાન સરહદ પર ઘૂસણખોરી, ડ્રગ્સની હેરાફેરી અને અન્ય રાષ્ટ્રવિરોધી પ્રવૃત્તિઓ પર વધુ અસરકારક દેખરેખ રાખવામાં મદદ મળશે. સાથે જ સરહદી જિલ્લાઓમાં પોલીસ પ્રતિસાદ વ્યવસ્થા અને કાયદો-વ્યવસ્થાનું સંચાલન વધુ સુદૃઢ બનવાની અપેક્ષા વ્યક્ત કરવામાં આવી રહી છે.
આ પણ વાંચો – ગુજરાત ST નિગમમાં ભડકો: ખાનગીકરણ અને પડતર પ્રશ્નો મુદ્દે કર્મચારીઓનું આંદોલન, 18 થી 25 જૂન સુધી વિરોધ પ્રદર્શન
