ગાંધીનગર: ગુજરાત પોલીસ વિભાગ માટે એક ખૂબ જ મોટા અને મહત્વના સમાચાર સામે આવ્યા છે. કેન્દ્ર સરકારના ગૃહ મંત્રાલય દ્વારા સત્તાવાર જાહેરનામું બહાર પાડીને ગુજરાત પોલીસ સેવાના (SPS) 6 સિનિયર અધિકારીઓને પ્રમોશન આપીને તેમને ભારતીય પોલીસ સેવા (IPS) કેડરમાં નિયુક્ત કરવામાં આવ્યા છે.
કેન્દ્ર સરકારના નોટિફિકેશન મુજબ, ‘સિલેક્ટ લિસ્ટ 2025’ અંતર્ગત નીચે મુજબના 6 અધિકારીઓને IPS તરીકે બઢતી આપવામાં આવી છે.
- રાજદીપસિંહ એન. નકુમ
- ભરતકુમાર બી. રાઠોડ
- પ્રફુલ વી. વાણિયા
- રાજેશકુમાર ટી. પરમાર
- કલ્પેશકુમાર એમ. ચાવડા
- રાકેશ ડી. દેસાઈ
હાઇકોર્ટે ઉઠાવ્યા હતા સવાલ અને 7 જ દિવસમાં મળ્યું પ્રમોશન!
આ પ્રમોશન લિસ્ટમાં સૌથી વધુ ચર્ચા DCP રાજદીપસિંહ નકુમની થઈ રહી છે. તાજેતરમાં જ સુરતના નાસીરનગર વિસ્તારમાં થયેલા કથિત ડિમોલિશન મામલે હાઇકોર્ટે વહીવટીતંત્રની ભૂમિકા સામે લાલ આંખ કરી હતી. હાઇકોર્ટે સુનાવણી દરમિયાન સીધો અને વેધક સવાલ ઉઠાવ્યો હતો કે આ સમગ્ર ડિમોલિશન પ્રક્રિયા દરમિયાન DCP નકુમ ત્યાં કેમ હાજર હતા? આ ટિપ્પણીથી સમગ્ર મામલામાં અનેક આશંકાઓ જન્મી હતી.
હવે સૌથી મોટો અને ચોંકાવનારો સવાલ એ ઊભો થયો છે કે, જે અધિકારીની હાજરી અને કાર્યવાહી સામે ખુદ ગુજરાત હાઈકોર્ટ પ્રશ્નો પૂછી રહી હોય, તેમને આ ઘટનાના માત્ર 7 જ દિવસમાં સરકાર દ્વારા પ્રમોશન આપીને IPS કેડર ફાળવી દેવામાં આવતા આ નિર્ણય સામે અનેક સવાલો ઉભા થયા છે.
એક વર્ષ સુધી પ્રોબેશન પર રહેશે તમામ અધિકારીઓ
કેન્દ્રીય ગૃહ મંત્રાલયના આદેશ અનુસાર, આ તમામ અધિકારીઓની નિમણૂક રાષ્ટ્રપતિની અંતિમ મંજૂરીથી કરવામાં આવી છે. ‘ઇન્ડિયન પોલીસ સર્વિસ (પ્રોબેશન) રૂલ્સ, 1954’ મુજબ આ તમામ નવા પ્રમોટ થયેલા અધિકારીઓ હાલ એક વર્ષ માટે પ્રોબેશન પિરિયડ પર રહેશે અને નિયમોનુસાર તેમની જરૂરી ઇન્ડક્શન ટ્રેનિંગ પણ મેળવશે.
આ પણ વાંચો – ભારતીય સશસ્ત્ર દળોમાં મોટી નિમણૂકો: સેનાને મળ્યા બે નવા કમાન્ડર, CISC ના નવા ચીફની પણ કરાઈ નિમણૂક
