તેલ અવીવ/તેહરાન : ઈરાન અને ઈઝરાયલ વચ્ચે ચાલી રહેલા તીવ્ર સંઘર્ષ વચ્ચે સોશિયલ મીડિયા પર એક મોટો વિવાદ વાઇરલ થઈ રહ્યો છે. ઘણા યુઝર્સ દાવો કરી રહ્યા છે કે ઈરાની હુમલામાં ઈઝરાયલના વડાપ્રધાન બેન્જામિન નેતન્યાહુનું મોત થઈ ગયું છે. આ અફવાઓને વધુ વેગ મળ્યો છે ઈરાનના રિવોલ્યુશનરી ગાર્ડ્સ (IRGC)ના એક સત્તાવાર નિવેદનથી.
IRGCએ રવિવારે જાહેર કર્યું કે, “જો ગુનેગાર ઝાયોની વડાપ્રધાન હજુ જીવિત હોય તો અમે તેનો પીછો કરીશું અને તેને પૂર્ણતઃ નષ્ટ કરીશું.” તેમણે વધુમાં કહ્યું કે નેતન્યાહુના મોત અંગેની અનિશ્ચિતતા ઈઝરાયલી સમાજમાં વ્યાપ્ત ગભરાટને સ્પષ્ટ રીતે દર્શાવે છે. છેલ્લા કેટલાક દિવસોથી નેતન્યાહુ કોઈ જાહેર કાર્યક્રમ કે સુરક્ષા મીટિંગમાં દેખાયા નથી, જેના કારણે શંકાઓ વધી રહી છે.
આ વચ્ચે ગત શુક્રવારે (13 માર્ચ) નેતન્યાહુના એક્સ એકાઉન્ટ પર એક પ્રેસ કોન્ફરન્સનો વીડિયો પોસ્ટ કરવામાં આવ્યો હતો. વીડિયો જોતાં જ યુઝર્સે 35 સેકન્ડની જગ્યાએ નેતન્યાહુની હાથમાં ‘છઠ્ઠી આંગળી’ જેવું કંઈક દેખાતું હોવાનો દાવો કર્યો. તેમણે કહ્યું કે આ ક્લાસિક AI જનરેટેડ વીડિયોની નિશાની છે અને વાસ્તવમાં નેતન્યાહુનું મોત થઈ ચૂક્યું છે.
ઈઝરાયલના વડાપ્રધાન કાર્યાલય (PMO)એ આ અફવાઓને સ્પષ્ટપણે નકારી કાઢી છે. તુર્કીની સમાચાર એજન્સી અનાદોલુ સાથે વાત કરતાં PMOએ કહ્યું કે, “આ તમામ અહેવાલો સાવ ફેક છે. વડાપ્રધાન બેન્જામિન નેતન્યાહુ સંપૂર્ણ સ્વસ્થ છે.” વીડિયોમાં નેતન્યાહુએ ઈરાનના નવા સુપ્રીમ લીડર મોજતબા ખમેનેઈ પર પણ તીવ્ર પ્રહાર કર્યો હતો.
ટેકનિકલ તપાસ અને ફેક્ટ ચેકર્સે સ્પષ્ટ કર્યું છે કે વીડિયો અસલી છે અને ઈઝરાયલ સરકારની સત્તાવાર યુટ્યુબ ચેનલ પર પણ ઉપલબ્ધ છે. ‘છઠ્ઠી આંગળી’ જેવું દેખાતું તત્વ માત્ર કેમેરા એંગલ અને લાઈટિંગની અસર છે. છતાં અનેક લોકો હજુ પણ સવાલ કરી રહ્યા છે કે આ લાઈવ પ્રસારણ હતું કે અગાઉથી રેકોર્ડ કરેલો વીડિયો.
આ પણ વાંચો – જૂનાગઢ : વિસાવદરમાં પરિણીતા મહિલા સાથે સામૂહિક દુષ્કર્મની ઘટના, 6 આરોપીઓની ધરપકડ
