સુરત: સુરત ઇન્ટરનેશનલ એરપોર્ટ પર કસ્ટમ્સના એર ઇન્ટેલિજન્સ યુનિટ (AIU) એ મોટી કાર્યવાહી કરતા એરક્રાફ્ટની તપાસ દરમિયાન હાઇડ્રોપોનિક ગાંજાનો જથ્થો જપ્ત કર્યો છે. પ્રાથમિક માહિતી મુજબ કુલ 1656.07 ગ્રામ (ગ્રોસ) જેટલો ગાંજો મળ્યો છે, જેને NDPS એક્ટ હેઠળ જપ્ત કરવામાં આવ્યો છે.
માહિતી મુજબ 14 માર્ચના રોજ એર ઈન્ડિયા એક્સપ્રેસની ફ્લાઈટ નંબર IX-263 સુરત એરપોર્ટ પર પહોંચી હતી. ફ્લાઈટના આગમન બાદ કસ્ટમ્સ અધિકારીઓએ સમગ્ર એરક્રાફ્ટની વિગતવાર તપાસ (રમેજિંગ) હાથ ધરી હતી. તપાસ દરમિયાન સીટ નંબર 12E અને 12F નીચે સેફ્ટી જૅકેટ મૂકવા માટે બનાવવામાં આવેલા પાઉચમાંથી શંકાસ્પદ પેકેટો મળી આવ્યા હતા.
તપાસ દરમિયાન કુલ ચાર વેક્યુમ પેક પોલિથિન પેકેટો મળી આવ્યા હતા. જેમાંથી ત્રણ પેકેટ ગ્રે રંગની અને એક પેકેટ બ્રાઉન રંગની સેલો ટેપથી કાળજીપૂર્વક લપેટવામાં આવ્યા હતા. આ પેકેટો કોઈ મુસાફર દ્વારા ક્લેમ કરવામાં આવ્યા નહોતા અને તે અનઅકમ્પેનિડ હાલતમાં મળી આવ્યા હતા.
કસ્ટમ્સ અધિકારીઓએ મળેલ પદાર્થનું ફીલ્ડ ટેસ્ટ કિટથી પરીક્ષણ કરતા તે મેરિજુઆના (કેનાબિસ) હોવાનું બહાર આવ્યું હતું. બાદમાં સમગ્ર જથ્થો, જેનો કુલ વજન 1656.07 ગ્રામ (ગ્રોસ) થાય છે, તેને NDPS એક્ટ, 1985 હેઠળ જપ્ત કરવામાં આવ્યો છે.
કસ્ટમ્સ વિભાગે આ મામલે વધુ તપાસ શરૂ કરી છે. અધિકારીઓ હાલમાં તપાસ કરી રહ્યા છે કે આ ગાંજાનો જથ્થો કયા મુસાફર દ્વારા છુપાવવામાં આવ્યો હતો અને તેનો અંતિમ ગંતવ્ય શું હતું. એરપોર્ટ સુરક્ષા એજન્સીઓ પણ સમગ્ર મામલાને ગંભીરતાથી તપાસી રહી છે.
આ પણ વાંચો – નેતન્યાહુના મોતની અફવાઓથી સોશિયલ મીડિયા ગરમ : IRGCની ધમકી અને વીડિયોમાં ‘છઠ્ઠી આંગળી’નો વિવાદ
