જૂનાગઢ : જૂનાગઢ જિલ્લાના વિસાવદર તાલુકાના મોણવેલ વિસ્તારમાં એક પરિણીતા મહિલા સાથે ભયાનક સામૂહિક દુષ્કર્મની ઘટના સામે આવી છે. મહિલાને મોણવેલના એક શખ્સે વિસાવદર બોલાવ્યા બાદ બે શખ્સોએ બાઈક પર અપહરણ કરીને મોણવેલની સીમમાં લઈ જઈને ગોંધી રાખી હતી, જ્યાં છ શખ્સોએ મળીને તેના પર અત્યાચાર ગુજાર્યા હતા.
મળતી માહિતી મુજબ, જેતપુર તાલુકાના એક ગામમાં રહેતી અને કેટરિંગમાં કામ કરતી આ મહિલાનો મોણવેલના મુન્ના ભરવાડ નામના શખ્સ સાથે પરિચય હતો. ગત 12મી તારીખે તે વિસાવદર આવી હતી. મુન્ના ભરવાડ અને બીજા એક શખ્સે તેને બસસ્ટેન્ડથી બાઈકમાં બેસાડીને ધારી તાલુકાના મોણવેલ વિસ્તારમાં લઈ જઈને ગોંધી રાખી હતી. ત્યાં મુન્ના ભરવાડ, ચાર અજાણ્યા શખ્સ અને એક ચોક્કસ મોબાઈલ નંબરધારકે મળીને મહિલા પર સામૂહિક દુષ્કર્મ આચર્યું હતું. આ ઘટના 12મીની રાત્રે 10 વાગ્યાથી 13મીની સવારે 5 વાગ્યા સુધી ચાલી હતી. બાદમાં આરોપીઓએ મહિલાને મુક્ત કરી દીધી હતી.
મહિલા વિસાવદર સરકારી હોસ્પિટલમાં દાખલ થઈ અને ત્યાંથી પોલીસને આપવિતી જણાવી હતી. વિસાવદર પોલીસે તાત્કાલિક કાર્યવાહી કરીને મુન્ના ભરવાડ સહિત છ આરોપીઓ સામે સામૂહિક દુષ્કર્મ અને એટ્રોસિટી એક્ટ હેઠળ ગુનો નોંધ્યો છે. એસ.સી.-એસ.ટી. સેલના ઈન્ચાર્જ ડીવાયએસપી હિતેષ ધાંધલ્યા તપાસનું નેતૃત્વ કરી રહ્યા છે. તેમણે જણાવ્યું કે તમામ આરોપીઓને રાઉન્ડઅપ કરીને ઓળખ પરેડ કરવાની તજવીજ ચાલુ છે.
આ પણ વાંચો – 20 જિલ્લામાં 2.57 લાખ કુપોષિત બાળકો : કરોડોનો ખર્ચ છતાં વધી રહ્યા છે આંકડા
