અમદાવાદ: બાર કાઉન્સિલ ઓફ ગુજરાતની તાજેતરમાં યોજાયેલી ચૂંટણીમાં પીઢ ધારાશાસ્ત્રી અને વકીલ વર્ગમાં લોકપ્રિય એવા J. J. Patel એ ઐતિહાસિક વિજય મેળવીને નવો રેકોર્ડ સ્થાપ્યો છે. પ્રથમ પસંદગીના મતોમાં ક્વોટા પાર કરીને તેમણે બાર કાઉન્સિલના ચૂંટણી ઇતિહાસમાં નોંધપાત્ર સિદ્ધિ હાંસલ કરી છે.
માહિતી મુજબ Bar Council of Gujarat ની આ ચૂંટણીમાં જે. જે. પટેલને પ્રથમ પસંદગીના 1929 થી વધુ મત મળ્યા છે. વર્ષ 1961 પછી બાર કાઉન્સિલની ચૂંટણીમાં પ્રથમ પસંદગીના મતોમાં આ સૌથી મોટો આંકડો ગણાય છે. આ પરિણામે વકીલ આલમમાં તેમની લોકપ્રિયતા અને વિશ્વસનીયતા સ્પષ્ટ રીતે સામે આવી છે.
જે. જે. પટેલ છેલ્લા લગભગ 25 વર્ષથી બાર કાઉન્સિલમાં સક્રિય રહી વકીલોના હિતો અને પ્રશ્નો માટે સતત કામ કરી રહ્યા છે. કાયદાકીય ક્ષેત્રમાં સામાન્ય માન્યતા એવી છે કે બુદ્ધિજીવી વર્ગ ગણાતા વકીલોનો વિશ્વાસ જીતવો અને તેમની આગેવાની કરવી સહેલું નથી. તેમ છતાં, પોતાના મજબૂત નેતૃત્વ, સરળ સ્વભાવ અને સતત કાર્યશૈલીના કારણે તેમણે સમગ્ર રાજ્યના વકીલોનો વિશ્વાસ પ્રાપ્ત કર્યો છે.
ચૂંટણીના પરિણામ બાદ રાજ્યભરના વકીલોમાં આનંદ અને ઉત્સાહનો માહોલ જોવા મળ્યો હતો. અનેક વકીલોએ આ પરિણામને વકીલ હિત માટે કાર્ય કરનાર નેતૃત્વ પર મુકાયેલ વિશ્વાસ તરીકે ગણાવ્યું છે.
વિજય બાદ જે. જે. પટેલે ગુજરાતના તમામ વકીલ મિત્રોનો આભાર વ્યક્ત કર્યો હતો. તેમણે જણાવ્યું હતું કે આ જીત તેમના છેલ્લા 25 વર્ષના સેવાકાર્ય પર વકીલ આલમ દ્વારા મૂકાયેલ વિશ્વાસનું પ્રતિબિંબ છે અને તેઓ આગળ પણ વકીલોની કલ્યાણ, હિત અને વ્યવસાયિક ગરિમા માટે પ્રતિબદ્ધ રહી કામ કરતા રહેશે.
આ પણ વાંચો – સુરત એરપોર્ટ પર એરક્રાફ્ટમાંથી મળ્યો 1.65 કિલો હાઇડ્રોપોનિક ગાંજો, કસ્ટમ્સની કાર્યવાહી
