કટક : ઓડિશાના SCB મેડિકલ કોલેજ અને હોસ્પિટલના ટ્રોમા કેર સેન્ટરમાં સોમવારે વહેલી સવારે ભીષણ આગ લાગી હતી. આ દુર્ઘટનામાં 10 દર્દીઓના મોત નીપજ્યા છે અને અનેક લોકો ગંભીર રીતે દાઝી ગયા છે. આગની લપેટમાં ICU વોર્ડ પણ આવી ગયો હતો, જ્યાં ઘણા દર્દીઓ લાઇફ સપોર્ટ સિસ્ટમ પર હતા.
મળતી માહિતી અનુસાર, સવારે લગભગ 3 વાગ્યે આગ લાગી હતી. જોતજોતામાં આગની લપેટમાં ટ્રોમા કેર સેન્ટરનો મોટો ભાગ આવી ગયો હતો. આ વોર્ડમાં 23 દર્દીઓ દાખલ હતા, જેમાંથી બચાવ અભિયાન શરૂ થાય તે પહેલાં જ 7 દર્દીઓના મોત નીપજ્યા હતા. બાકીના ત્રણ દર્દીઓ ગુંગળામણ અને દાઝવાને કારણે મૃત્યુ પામ્યા હતા. ફાયર બ્રિગેડની ટીમો તાત્કાલિક પહોંચીને અનેક દર્દીઓને બચાવી શકી હતી.
મુખ્યમંત્રી મોહન માઝીએ ઘટનાસ્થળે પહોંચીને પીડિત પરિવારોને મળીને સાંત્વના આપી હતી. તેમણે રેસ્ક્યૂ અને સારવારના કાર્યોનું નિરીક્ષણ કર્યું અને સ્થિતિને નિયંત્રણમાં લાવવા માટે તમામ સંબંધિત વિભાગોને તાત્કાલિક સૂચના આપી હતી. મુખ્યમંત્રીએ આ ઘટનાની ઊંડી તપાસના આદેશ પણ આપ્યા છે અને દોષિતો વિરુદ્ધ કડક કાર્યવાહી કરવાની વાત કરી છે.
આ ઘટના ફરી એક વખત હોસ્પિટલોમાં ફાયર સેફ્ટી અને ઈમર્જન્સી વ્યવસ્થાની ગંભીરતા પર પ્રશ્નો ઉભા કરે છે. ઓડિશા સરકારે તાત્કાલિક રાહત અને સારવારના તમામ પ્રયાસો શરૂ કર્યા છે.
આ પણ વાંચો – Exclusive breaking : ગુજરાત પોલીસમાં મોટા પાયે હલચલ, અંદાજે 850 PIના જિલ્લા ફેરબદલના આદેશ ટૂંક સમયમાં
