મધ્ય પૂર્વમાં ચાલી રહેલો સંઘર્ષ હવે વધુ તીવ્ર અને ખતરનાક બની રહ્યો છે. શનિવાર (28 માર્ચ, 2026)ની સવારે ઈઝરાયલે ઈરાનના “રેજીમ ટાર્ગેટ્સ” પર હવાઈ હુમલા કર્યા હોવાની જાહેરાત કરી છે. તહેરાનમાં રહેતા AFP પત્રકારે આસપાસ 10 જેટલા તીવ્ર વિસ્ફોટો સાંભળ્યા અને કાળા ધુમાડાના ગોટેગોટા જોયા હોવાનું કહ્યું છે.
શુક્રવારે (27 માર્ચ) ઈરાન તરફથી છોડવામાં આવેલા મિસાઈલ હુમલામાં ઈઝરાયલમાં એક વ્યક્તિનું મોત થયું છે. તેલ અવીવમાં હુમલાને પગલે એર રેઈડ સાયરન વાગ્યા હતા. આ ઉપરાંત, ઈરાને સાઉદી અરેબિયામાં આવેલા પ્રિન્સ સુલતાન એર બેઝ પર મિસાઈલ અને ડ્રોન હુમલો કર્યો હતો, જેમાં 12 અમેરિકી સૈનિકો ઘાયલ થયા છે, જેમાંથી બેની હાલત ગંભીર છે. હુમલામાં અનેક એરિયલ રિફ્યુઅલિંગ પ્લેનને પણ નુકસાન પહોંચ્યું છે.
ખૌંદાબ ન્યુક્લિયર પ્લાન્ટ પર હુમલો
ઈરાનના અત્યંત સંવેદનશીલ ગણાતા ખૌંદાબ (Khondab) ન્યુક્લિયર પ્લાન્ટ પર અમેરિકા અને ઈઝરાયલે મોટો હુમલો કર્યો છે. આ હુમલામાં હેવી-વોટર રિએક્ટર અને યલોકેક (Yellowcake) પ્રોડક્શન પ્લાન્ટને નિશાન બનાવવામાં આવ્યા છે. હુમલા બાદ પ્લાન્ટની આસપાસ કાળો ધુમાડો જોવા મળ્યો હતો, પરંતુ રેડિયેશન લીકના કોઈ સંકેત મળ્યા નથી.
ઈરાનની સૈન્ય પાંખ IRGCએ વળતો પ્રહાર કરવાની જાહેરાત કરી છે. તેણે અમેરિકા અને ઈઝરાયલ સાથે જોડાયેલા ઉદ્યોગોમાં કામ કરતા કર્મચારીઓને તાત્કાલિક ઓફિસ છોડી દેવા માટે અલ્ટીમેટમ આપ્યું છે. વળતા હુમલાની ભીતિને કારણે ઔદ્યોગિક વિસ્તારોની 1 કિલોમીટરની ત્રિજ્યામાં રહેતા નાગરિકોને ઘર ખાલી કરવાનો આદેશ પણ આપવામાં આવ્યો છે.
અન્ય મહત્ત્વની ઘટનાઓ
દમાસ્કસમાં વિસ્ફોટો સાંભળવામાં આવ્યા છે. ઈઝરાયલી એર ડિફેન્સે સીરિયન આકાશમાં ઈરાની મિસાઈલોને ઈન્ટર સેપ્ટ કરી હોવાના દાવા કરવામાં આવ્યા હતા.
BREAKING: ATTACK REPORTED ON A POWER PLANT IN KHONDAB IRAN pic.twitter.com/24IVVKhRVN
— Sulaiman Ahmed (@ShaykhSulaiman) March 27, 2026
ઈરાન-સંલગ્ન હેકર્સે અમેરિકાના FBI ડિરેક્ટર કાશ પટેલના પર્સનલ ઈમેઈલને હેક કરીને તેમના અંગત ફોટા અને દસ્તાવેજો ઈન્ટરનેટ પર મૂક્યા છે.
ટ્રમ્પનું 10 દિવસનું પ્લાન
અમેરિકી રાષ્ટ્રપતિ ડોનાલ્ડ ટ્રમ્પે અગાઉ 10 દિવસ માટે હુમલા રોકવાની (સીઝફાયર) વાત કરી હતી, પરંતુ આ જાહેરાત વચ્ચે જ ન્યુક્લિયર પ્લાન્ટ પર થયેલા હુમલાએ વિશ્વભરમાં આશ્ચર્ય અને તણાવ વધારી દીધો છે.
મધ્ય પૂર્વમાં હાલની સ્થિતિ અત્યંત તંગ છે. ગમે ત્યારે વધુ મોટા સ્તરનું યુદ્ધ ફાટી નીકળે તેવી આશંકા વ્યક્ત કરવામાં આવી રહી છે. આ સંઘર્ષની અસર વૈશ્વિક તેલના ભાવ અને આંતરરાષ્ટ્રીય વેપાર પર પણ પડી રહી છે.
આ પણ વાંચો – ખેડૂતો માટે મોટી રાહત! ગુજરાત સરકારે વારસાઈ અને હક્ક કમી પર સ્ટેમ્પ ડ્યુટી માત્ર ₹300માં મર્યાદિત કરી
