અમદાવાદ: અમદાવાદ શહેરમાં વર્ષોથી મિલકતવેરો (પ્રોપર્ટી ટેક્સ) ન ભરીને કોર્પોરેશનની તિજોરીને નુકસાન પહોંચાડતા બાકીદારો સામે અમદાવાદ મ્યુનિસિપલ કોર્પોરેશન (AMC) એ હવે કડક કાર્યવાહીનો કોરડો વીંઝ્યો છે. ઉત્તર-પશ્ચિમ ઝોનમાં કુલ રૂ. ૮૩.૨૯ લાખથી વધુનો ટેક્સ બાકી રાખનાર પાંચ મોટા મિલકતધારકો સામે સીધી જ હરાજીની (Auction) કાર્યવાહી હાથ ધરવામાં આવતા અન્ય ટેક્સ ચોરોમાં ફફડાટ વ્યાપી ગયો છે.
માત્ર ૧ રૂપિયાના ટોકનથી મિલકતો AMC હસ્તક!
ઉત્તર-પશ્ચિમ ઝોનના પ્રોપર્ટી ટેક્સ વિભાગ દ્વારા અગાઉ વારંવાર નોટિસ અને છેલ્લી ચેતવણી આપવામાં આવી હતી. આમ છતાં, પાંચ મિલકતધારકોએ ટેક્સની રકમ જમા ન કરાવતા અંતે હરાજીની મંજૂરી લેવામાં આવી હતી. આ પાંચમાંથી બે મિલકતોના માલિકોએ ટેક્સ ભરવા અંગે કોઈ જ પ્રત્યુત્તર કે કાર્યવાહી ન કરતા, તંત્રએ આકરૂં વલણ અપનાવીને તેમની હરાજી પ્રક્રિયા પૂર્ણ કરી દીધી હતી. આશ્ચર્યજનક રીતે, આ બંને મિલકતોને માત્ર રૂ. ૧ ના ટોકનથી AMC એ પોતાના હસ્તક (જપ્ત) કરી લીધી છે.
હરાજીથી બચવા માલિકોએ કમિશનરના નામના કોરા ચેક આપ્યા
બીજી તરફ, હરાજી શરૂ થતાં જ બાકીની ત્રણ મિલકતોના માલિકો દોડતા થઈ ગયા હતા. તેમણે તંત્ર સમક્ષ પુરાવા રજૂ કર્યા હતા કે તેમની મિલકતો લાંબા સમયથી બંધ અને બિનઉપયોગી હાલતમાં છે. આ ત્રણેય મિલકતધારકોએ બાકી ટેક્સની ફેર-આકારણી બાદ જે પણ રકમ ભરવાની થશે, તે સંપૂર્ણ ચૂકવવાની લેખિત બાંહેધરી આપી હતી. હરાજીથી પોતાની મિલકત બચાવવા માટે આ માલિકોએ સીધા જ AMC કમિશનરના નામના ‘કોરા ચેક’ રજૂ કર્યા હતા. તેમની આ રજૂઆત અને બાંહેધરીને ધ્યાનમાં રાખીને સત્તાધીશોએ હાલ પૂરતી આ ત્રણ મિલકતોની હરાજી મોકૂફ રાખી છે.
કયા વિસ્તારમાં કોનો કેટલો ટેક્સ બાકી છે?
કોર્પોરેશનના ચોપડે નોંધાયેલા આ મોટા બાકીદારોની વિગતો નીચે મુજબ છે
મેમનગર (R3 મોલ): બીજા માળે આવેલા શોપ નં. ૧ થી ૧૧ નો સૌથી વધુ રૂ. ૩૮,૮૦,૫૮૦ નો ટેક્સ બાકી.
થલતેજ (માઇલસ્ટોન બિલ્ડીંગ): ડ્રાઇવ-ઇન સિનેમા રોડ પર આવેલી ઓફિસ નં. ૧૦૦૧ નો રૂ. ૧૩,૯૪,૭૪૯ અને અન્ય ત્રણ ઓફિસોનો રૂ. ૧૦,૬૪,૪૬૪ ટેક્સ બાકી.
સુવિધાનગર કો. ઓ. હા. સો.: ઓફિસ નં. ૯૦૧ અને ૯૦૨ પર રૂ. ૧૩,૩૫,૬૦૧ નો ટેક્સ બાકી.
થલતેજ (જે. બી. ટાવર): ઓફિસ નં. ૭૦૯ નો અંદાજિત રૂ. ૬,૫૪,૫૪૫ નો પ્રોપર્ટી ટેક્સ બાકી હોવાનું સામે આવ્યું છે.
સાતેય ઝોનમાં મેગા ઓપરેશનની તૈયારી
ઉત્તર-પશ્ચિમ ઝોનની આ કાર્યવાહી માત્ર એક ટ્રેલર છે. AMC ના ઉચ્ચ અધિકારીઓએ સ્પષ્ટ સંકેત આપ્યા છે કે આગામી દિવસોમાં અમદાવાદના સાતેય ઝોનમાં પ્રોપર્ટી ટેક્સની વસૂલાત માટે આ જ પ્રકારનું મેગા ઓપરેશન હાથ ધરાશે. જે મિલકતધારકો ટેક્સ નહીં ભરે તેમની મિલકતો સીધી ટાંચમાં લેવાશે, જપ્તી કરાશે અને જરૂર પડશે તો હરાજી કરીને કોર્પોરેશન પોતાની બાકી રકમ વસૂલ કરશે.
આ પણ વાંચો – નેપાળમાં જળપ્રલયથી ભારતમાં ખતરો : ગંડક નદી ગાંડીતૂર, બિહાર અને ઉત્તર પ્રદેશમાં ‘હાઈ એલર્ટ’, અમિત શાહે સમીક્ષા કરી
