ખાડી દેશોમાં યુદ્ધની સ્થિતિને કારણે ઇંધણની અછત પડી શકે છે તેવી સોશિયલ મીડિયા પર વહેતી અફવાઓએ આખા ગુજરાતમાં હલચલ મચાવી દીધી છે. લોકોમાં અનિશ્ચિતતાને કારણે પેટ્રોલ-ડીઝલની સંગ્રહખોરી શરૂ થઈ ગઈ છે અને અનેક જિલ્લાઓમાં પેટ્રોલ પંપો પર વાહનચાલકોની લાંબી કતારો જોવા મળી રહી છે.
છોટા ઉદેપુર જિલ્લાના સંખેડા તાલુકાના હાંડોદ ગામમાં આ અફવાએ વધુ ગંભીર સ્વરૂપ લીધું. સોમવારે વહેલી સવારથી જ એક પેટ્રોલ પંપ પર બાઈક ચાલકોની લાંબી લાઈન લાગી ગઈ હતી. પેટ્રોલ ભરાવવા માટે લાઈનમાં ઊભા રહેવાના સામાન્ય મુદ્દે બે જૂથના યુવકો વચ્ચે ઉગ્ર બોલાચાલી થઈ અને જોતજોતામાં મામલો હાથાપાઈ સુધી પહોંચી ગયો. યુવકો વચ્ચે જોરદાર ઝપાઝપી થતી હોય તેવા દ્રશ્યો સ્થાનિક વ્યક્તિએ મોબાઈલમાં કેદ કર્યા, જે હાલ સોશિયલ મીડિયા પર વાઈરલ થઈ રહ્યા છે.
વીડિયોમાં યુવકો એકબીજા સાથે બાથમ-બાથી કરતા અને વાતાવરણ તંગ બની ગયું હોય તે સ્પષ્ટ દેખાય છે. અંતે પંપના કર્મચારીઓ અને સ્થાનિક લોકોએ વચ્ચે પડીને મામલો શાંત પાડ્યો. કોઈ મોટી ઈજા થઈ હોવાની જાણકારી નથી.
છોટા ઉદેપુર સહિત અનેક જિલ્લાઓમાં પેટ્રોલ પંપો પર ‘હાઉ’ જેવી સ્થિતિ જોવા મળી રહી છે. લોકો અફવાઓમાં આવીને અનાવશ્યક સંગ્રહખોરી કરી રહ્યા છે, જેના કારણે કાયદો અને વ્યવસ્થાની સ્થિતિ પર અસર પડી રહી છે.
સરકાર અને તંત્રની અપીલ
ગુજરાત સરકાર, ઈન્ડિયન ઓઈલ કોર્પોરેશન (IOCL) અને પેટ્રોલિયમ ડીલર્સ એસોસિએશનના સંયુક્ત નિવેદનમાં સ્પષ્ટ કરવામાં આવ્યું છે કે રાજ્યમાં પેટ્રોલ અને ડીઝલનો પુરતો સ્ટોક છે અને કોઈ અછત નથી. લોકોને અપીલ કરવામાં આવી છે કે અફવાઓ પર વિશ્વાસ ન કરે, સોશિયલ મીડિયા પર વહેતી અસત્ય માહિતીને અવગણે અને શાંતિ જાળવે. જો કોઈ ડીલર સ્ટોક હોવા છતાં પંપ બંધ રાખે તો કાયદાકીય કાર્યવાહી કરવામાં આવશે.
આ પણ વાંચો – ટ્રમ્પ બોલ્યા; અમેરિકા-ઈરાન વચ્ચે યુદ્ધ ખતમ કરવા પર વાતચીત થઈ, ઈરાની વિદેશ મંત્રાલયે નકાર્યું
