IMD Weather Forecast: ગત સપ્તાહે માવઠાના રાઉન્ડ બાદ ગુજરાતમાં કાળઝાળ ગરમીના આકરા તેવર જોવા મળી રહ્યા છે. રાજ્યના મોટાભાગના શહેરોમાં તાપમાન 40 ડિગ્રીની આસપાસ જોવા મળી રહ્યું છે, ત્યારે હવામાન વિભાગ દ્વારા આગામી દિવસોમાં વધુ એક કમોસમી વરસાદના રાઉન્ડની આગાહી કરવામાં આવી છે.
હવામાન વિભાગના જણાવ્યા પ્રમાણે, દક્ષિણ-પૂર્વ પાકિસ્તાન અને રાજસ્થાન પર સક્રિય અપર એર સાયક્લોનિક સર્ક્યુલેશનના કારણે આવનારા દિવસોમાં ભેજવાળા પવનો ફૂંકાવા સાથે પ્રી-મોન્સૂન એક્ટિવિટી જોવા મળશે.
આગામી 18 એપ્રિલ સુધી ગરમીમાં સહેજ પણ રાહત નહીં મળે, પરંતુ તે બાદ ઉત્તર ગુજરાતના સાબરકાંઠા, અરવલ્લી, બનાસકાંઠા ઉપરાંત અમરેલી, ભાવનગર, દાહોદ, મહીસાગર અને પંચમહાલ જિલ્લામાં માવઠારૂપી ઝાપટા વરસી શકે છે. આ સિવાય અન્ય ભાગોમાં હવામાન એકંદરે સૂકું રહેશે.
ખાસ કરીને દરિયા કાંઠાના ભાગોમાં ગરમ હવા અને દરિયાનો ભેજ ભળતા અસહ્ય બફારાથી લોકો પરસેવે રેબઝેબ થઈ શકે છે.
