તેહરાન : ઈરાને અમેરિકાના વધુ એક અત્યંત આધુનિક અને મોંઘુ F-35 ફાઈટર જેટ વિમાનને તોડી પાડ્યું હોવાનો દાવો કર્યો છે. ઈરાની સરકારી મીડિયા અનુસાર, આ વખતે પાયલોટના બચવાની સંભાવના ખૂબ જ ઓછી છે.
ઈરાની સેનાના ઓપરેશનલ કમાન્ડ સેન્ટર ખાતમ અલ-અંબિયાના પ્રવક્તાએ જણાવ્યું કે, 3 એપ્રિલે ઈરાનના આકાશમાં IRGCના એર ડિફેન્સ સિસ્ટમે અમેરિકી F-35 વિમાનને નિશાન બનાવ્યું. હુમલા બાદ વિમાનમાં વિસ્ફોટ થયો હોવાનો અને પાયલોટના માર્યા જવાની સંભાવના વ્યક્ત કરવામાં આવી છે.
આ દાવાની અત્યાર સુધી કોઈ સ્વતંત્ર પુષ્ટિ થઈ નથી અને અમેરિકી તરફથી પણ આ અંગે કોઈ પ્રતિક્રિયા આવી નથી.
પહેલો દાવો (19 માર્ચ)
19 માર્ચે પણ ઈરાને અમેરિકાના F-35 વિમાનને માર્યું હોવાનો દાવો કર્યો હતો. ત્યારે અમેરિકી સેનાએ સ્વીકાર્યું હતું કે વિમાનને ઇમર્જન્સી લેન્ડિંગ કરવી પડી હતી, પરંતુ વિમાન અને પાયલોટ બંને સુરક્ષિત છે.
વર્તમાન ઘટના
આ વખતે ઈરાની મીડિયાએ વીડિયો પણ જાહેર કર્યો છે, જેમાં તેજ ધમાકા પછી વિમાનમાંથી ધુમાડો નીકળતો અને વિમાન દિશાહીન થતું જોવા મળે છે. ઈરાનના આ દાવા સાથે જ 3 એપ્રિલે ઈરાને ઇઝરાયેલ, બહેરીન અને કુવૈતમાં પણ મિસાઈલ અને ડ્રોન હુમલા કર્યા હતા.
F-35 એ અમેરિકાનું ૫મી પેઢીનું અત્યંત આધુનિક લડાકુ વિમાન છે, જેની કિંમત 100 મિલિયન ડોલરથી વધુ છે. તેને અમેરિકાની હવાઈ તાકાતનો આધારસ્તંભ માનવામાં આવે છે. 28 ફેબ્રુઆરીએ ઈરાન વિરુદ્ધ ‘ઓપરેશન એપિક ફ્યુરી’ શરૂ થયા બાદ અમેરિકા અને ઇઝરાયેલ બંને F-35 વિમાનોનો વ્યાપક ઉપયોગ કરી રહ્યા છે.
આ પણ વાંચો – ઈરાને સઉદી, UAE અને જોર્ડનના 8 મહત્ત્વના પુલોની ‘હિટ લિસ્ટ’ જાહેર, કહ્યું- “હવે કોઈ બચશે નહીં”
