સ્ટ્રેટ ઓફ હોર્મુઝમાં સમુદ્રી સુરક્ષાને લઈને ઈરાની વિદેશ મંત્રાલયે એક નિવેદન જાહેર કર્યું છે. આ નિવેદનમાં હોર્મુઝ સ્ટ્રેટ અંગે ઈરાને પોતાના અધિકારોનો ઉલ્લેખ કર્યો છે અને અમેરિકા, ઈઝરાયેલ તથા તેમના સમર્થકો સાથે જોડાયેલા જહાજો પર ટિપ્પણી કરી છે.
ઈરાની વિદેશ મંત્રાલયના નિવેદનમાં કહેવામાં આવ્યું છે કે,”ઈરાને સંયુક્ત રાષ્ટ્રના ચાર્ટર અને આંતરરાષ્ટ્રીય કાયદાના સિદ્ધાંતો પ્રત્યે પ્રતિબદ્ધ એક જવાબદાર દેશ તરીકે સમુદ્રી માર્ગોની સ્વતંત્રતા અને સુરક્ષાના સિદ્ધાંતોને હંમેશા જાળવી રાખ્યા છે.”
“ઘણા વર્ષોથી ઈરાને આ વિસ્તારમાં ફારસની ખાડી, હોર્મુઝ સ્ટ્રેટ અને ઓમાન સાગરમાં આ સિદ્ધાંતોની રક્ષા કરવાનો પ્રયાસ કર્યો છે. આ સ્પષ્ટ છે કે આ સિદ્ધાંતોનું વ્યવહારમાં સન્માન ત્યારે જ શક્ય છે જ્યારે સમુદ્ર તટીય દેશોની સર્વોચ્ચતા અને અધિકારોનો સન્માન કરવામાં આવે.”
ઈરાની વિદેશ મંત્રાલયે આગળ કહ્યું કે, “28 ફેબ્રુઆરી 2026થી સંયુક્ત રાષ્ટ્રના ચાર્ટરના અનુચ્છેદ 2(4) અને બળના ઉપયોગને પ્રતિબંધિત કરતા નિયમોનું સ્પષ્ટ ઉલ્લંઘન કરીને અમેરિકા અને ઈઝરાયેલે ઈરાન પર હુમલો કર્યો છે. તેના પરિણામે ફારસી ખાડી વિસ્તાર અને હોર્મુઝ સ્ટ્રેટમાં ખતરનાક સ્થિતિ ઊભી થઈ છે. આની સીધી અસર નૌવહન અને શિપિંગની સુરક્ષા પર પડી છે.”
“ઈરાને આ હુમલાઓના જવાબમાં આત્મરક્ષા હેઠળ આ વિસ્તારમાં અમેરિકાના સૈન્ય ઠેકાણાઓને નિશાન બનાવ્યા છે. ઈરાને ઘણા એવા પગલાં લીધા છે જેથી હુમલાખોર અને તેમના સમર્થકો હોર્મુઝ સ્ટ્રેટનો દુરુપયોગ કરીને પોતાની દુશ્મની આગળ વધારી ન શકે.”
ઈરાની વિદેશ મંત્રાલયે કહ્યું કે, “હોર્મુઝ સ્ટ્રેટના તટીય દેશ તરીકે અને આંતરરાષ્ટ્રીય કાયદા મુજબ ઈરાને તે જહાજોના પસાર થવા પર પ્રતિબંધ મૂક્યો છે જે હુમલો કરનારા પક્ષોના માલિકીના છે, તેમની સાથે જોડાયેલા છે અથવા તેમની આક્રમક પ્રવૃત્તિઓમાં ભાગ લઈ રહ્યા છે.””વારંવાર ભાર મૂકીને કહેવામાં આવ્યું છે કે હોર્મુઝ સ્ટ્રેટ બંધ નથી. આ માર્ગથી જહાજોનું આવાગમન ચાલુ છે, પરંતુ તે માટે જરૂરી પગલાં અને યુદ્ધને કારણે ઊભી થયેલી પરિસ્થિતિઓનું પાલન કરવું પડશે.”
આ પણ વાંચો- ન્યૂયોર્ક લાગાર્ડિયા એરપોર્ટ પર ભયાનક અકસ્માત : ફાયર ટ્રક સાથે વિમાન ટકરાયું, પાયલટ-કો-પાયલટનું મોત
