રાજકોટ: શહેરના કાલાવડ રોડ જેવા પોશ વિસ્તારમાં આવેલ જાણીતા ‘ફનબ્લાસ્ટ ગેમઝોન’માં આજે (26 એપ્રિલ) અચાનક ભીષણ આગ ફાટી નીકળતા ચકચાર મચી ગઈ હતી. રવિવારની રજા અને ઉનાળુ વેકેશનના કારણે ગેમઝોન બાળકો અને પરિવારોથી ખીચોખીચ ભરેલો હતો, જેના કારણે આગ લાગતા જ સ્થળ પર ભારે નાસભાગ અને ભયનો માહોલ સર્જાયો હતો.
ધુમાડાના ગોટેગોટા જોઈ લોકોમાં ફફડાટ
બપોરના સમયે લાગેલી આ આગ એટલી વિકરાળ હતી કે તેના કાળા ધુમાડાના ગોટેગોટા અને જ્વાળાઓ દૂર-દૂર સુધી જોઈ શકાતી હતી. ગેમઝોનની અંદર રહેલા પરિવારો પોતાના બાળકોને લઈને જીવ બચાવવા બહાર તરફ દોડ્યા હતા. સ્થાનિક લોકોમાં પણ આ દ્રશ્યો જોઈને ફફડાટ વ્યાપી ગયો હતો.
શોર્ટ સર્કિટ હોવાનું પ્રાથમિક અનુમાન
આગ લાગવાનું ચોક્કસ કારણ હજુ સુધી જાણી શકાયું નથી, પરંતુ પ્રાથમિક તપાસમાં શોર્ટ સર્કિટના કારણે આ દુર્ઘટના ઘટી હોવાની આશંકા વ્યક્ત કરવામાં આવી રહી છે. સદનસીબે, સમયસર લોકો બહાર નીકળી જવામાં સફળ રહ્યા હોવાથી હજુ સુધી કોઈ જાનહાનિ કે ગંભીર ઈજાના સમાચાર મળ્યા નથી, જે મોટી રાહતની વાત છે.
ફાયર બ્રિગેડની કામગીરી
ઘટનાની જાણ થતા જ રાજકોટ ફાયર બ્રિગેડની ટીમો તાત્કાલિક ઘટનાસ્થળે પહોંચી ગઈ હતી. ફાયર ફાઈટરો દ્વારા સતત પાણીનો મારો ચલાવીને આગ પર કાબૂ મેળવવાની કામગીરી તેજ કરવામાં આવી હતી. હાલ સ્થિતિ નિયંત્રણમાં હોવાનું જાણવા મળી રહ્યું છે.
આ પણ વાંચો – બોહરા મહિલાઓનો સાયલન્ટ સંઘર્ષ: ખતના જેવા કુરિવાજ સામે શિક્ષિત મહિલાઓનો જંગ
