દ્વારકા જિલ્લાના ખંભાળિયા પોલીસ સ્ટેશનમાં આજે ભારે રાજકીય હોબાળો મચી ગયો હતો. આમ આદમી પાર્ટી (AAP) ના ગુજરાત પ્રદેશ પ્રમુખ ઈસુદાન ગઢવી સહિત આશરે ૫૦ કાર્યકરોની પોલીસે અટકાયત કરી લીધી હતી.
મળતી માહિતી અનુસાર, ઈસુદાન ગઢવી પાર્ટીના જિલ્લા પ્રમુખ અને અન્ય કાર્યકરો સાથે એક પાર્ટી કાર્યકર દીપક કુમાર સિંગ પર નોંધાયેલી ફરિયાદના વિરોધમાં રજૂઆત કરવા ખંભાળિયા પોલીસ સ્ટેશન પહોંચ્યા હતા. તેમનો આરોપ હતો કે બિહારના આ કાર્યકર પર પોલીસે ખોટી રીતે લૂંટની કલમ લગાવી દીધી છે.
સ્ટેશનમાં પહોંચતા જ ઈસુદાન ગઢવી અને ખંભાળિયા પોલીસ ઇન્સ્પેક્ટર (PI) વચ્ચે ઉગ્ર બોલાચાલી થઈ ગઈ. આ બોલાચાલી ઝડપથી માથાકૂટમાં ફેરવાઈ ગઈ. આમ આદમી પાર્ટીના કાર્યકરોએ આ ઘટનાનો મોબાઈલથી વીડિયો ઉતારવાનો પ્રયાસ કર્યો ત્યારે પોલીસે તેમને અટકાવ્યા. આનાથી કાર્યકરો વધુ ઉશ્કેરાઈ ગયા અને પોલીસ સ્ટેશનમાં જ ભારે હોબાળો મચી ગયો.
AAP कार्यकर्ता की गैर क़ानूनी गिरफ्तारी के खिलाफ पुलिस स्टेशन गए AAP के प्रदेश अध्यक्ष @isudan_gadhvi जी को ही भाजपा की पुलिस ने गिरफ्तार कर लिया।
गुजरात में AAP की बढ़ती लोकप्रियता से डर रही है भाजपा।
#BJPFearsAAPInGujarat pic.twitter.com/dTi9B3omJQ
— AAP (@AamAadmiParty) April 1, 2026
પરિસ્થિતિ વધુ વિકરાળ બનતાં DYSP, LCB અને SOGના મોટા પોલીસ કાફલાએ તાત્કાલિક ઘટનાસ્થળે પહોંચીને મામલો કાબૂમાં લાવ્યો. આ દરમિયાન ઈસુદાન ગઢવી સહિત આશરે ૫૦ કાર્યકરોને લગભગ ૨ કલાક સુધી પોલીસ સ્ટેશનમાં જ અટકાયતમાં રાખવામાં આવ્યા હતા.
આપના આકરા આરોપો
ઘટના બાદ આમ આદમી પાર્ટીએ પોતાના સત્તાવાર સોશિયલ મીડિયા એકાઉન્ટ પર વીડિયો શેર કરીને સરકાર અને પોલીસ વહીવટ પર તીવ્ર પ્રહારો કર્યા છે. પાર્ટીએ આરોપ લગાવ્યો છે કે ગુજરાતમાં દારૂ, ડ્રગ્સ અને ગુંડાગીરીની ફરિયાદો તો અવગણવામાં આવે છે, પરંતુ જ્યારે કોઈ સામાન્ય વ્યક્તિ અથવા પાર્ટી કાર્યકર માટે રજૂઆત કરવા જાય ત્યારે પોલીસ તેમની વાત સાંભળવાને બદલે અટકાયત કરી લે છે.
ઈસુદાન ગઢવી અને આપ ગુજરાતે વધુમાં આક્ષેપ કર્યો છે કે રાજ્યમાં આમ આદમી પાર્ટીના નેતાઓ અને કાર્યકરોને ખોટા કેસમાં ફસાવવાનું ષડયંત્ર ચાલી રહ્યું છે. પાર્ટીએ માંગ કરી છે કે દીપક કુમાર સિંગ પર લગાવેલી લૂંટની ફરિયાદની નિષ્પક્ષ તપાસ કરવામાં આવે.
આ ઘટનાએ ગુજરાતના રાજકીય વર્તુળોમાં ભારે ચર્ચા જગાવી છે અને વિરોધપક્ષો વચ્ચે નવો વિવાદ શરૂ થવાની સંભાવના છે.
આ પણ વાંચો – ગુજરાતમાં સ્થાનિક સ્વરાજ્યની ચૂંટણીની તારીખો જાહેર: ૨૬ એપ્રિલે મતદાન
