અમદાવાદ : શહેરના સરદારનગર વિસ્તારમાં ગેરકાયદેસર દારૂના ધંધા સાથે જોડાયેલા નેટવર્કમાં હવે એક નામ ખાસ ચર્ચામાં આવ્યું છે. SG2 ટ્રાફિક વિભાગમાં ફરજ બજાવતો સંદીપ પોતાની કામગીરી અને ભૂમિકાને લઈને ગંભીર સવાલોના ઘેરામાં આવ્યું છે.
વિશ્વસનીય સૂત્રોના જણાવ્યા મુજબ, સંદીપ સરકારી કર્મચારી હોવા છતાં પોતાની નિયમિત ફરજ પર હાજર રહેતો નથી. ચર્ચા છે કે તે દર મહિને અંદાજે ₹25 હજાર ભરણરૂપે ચૂકવે છે, જેથી તેને ફરજ પર હાજરી આપવાની જરૂર ન પડે. આ પ્રકારની ગોઠવણ કેવી રીતે શક્ય બને છે અને તેના પાછળ કોણ છે તે મોટો પ્રશ્ન બની ગયો છે.
આ આક્ષેપો આટલામાં જ અટકી રહ્યાં નથી. માહિતી મુજબ, સંદીપ સરદારનગર વિસ્તારમાં ગેરકાયદેસર દેશી દારૂના ધંધા સાથે સીધો જોડાયેલો છે અને ઉઘરાણીની જવાબદારી સંભાળી રહ્યો છે. દારૂના ઠેકાણાઓ પરથી નિયમિત વસૂલાત કરવી અને તે નેટવર્ક સુધી પહોંચાડવી તેની મુખ્ય ભૂમિકા હોવાનું કહેવાય છે.
તે ઉપરાંત, સ્થાનિક સ્તરે એવી પણ ચર્ચા છે કે સંદીપનો ઉપયોગ માત્ર ઉઘરાણી પૂરતો મર્યાદિત નથી. સરદારનગરમાં તૈનાત એક અધિકારી માટે ટિફિન લાવવા અને લઈ જવાની ‘સેવા’ પણ તે જ સંભાળે છે. સરકારી કર્મચારી પાસેથી આવી કામગીરી લેવાઈ રહી હોવાના આક્ષેપો તંત્રની કાર્યપદ્ધતિ પર ગંભીર સવાલો ઊભા કરે છે.
એક તરફ સરકારી પગાર લેતો કર્મચારી અને બીજી તરફ ગેરકાયદેસર નેટવર્કમાં સક્રિય ભૂમિકા ભજવતો હોવાના આક્ષેપો. આ વિસંગતતા માત્ર વ્યક્તિગત સ્તરે નહીં પરંતુ સમગ્ર તંત્ર માટે ચિંતાજનક છે. આ માત્ર શિસ્તભંગનો મુદ્દો નથી, પરંતુ સરકારી વ્યવસ્થાની વિશ્વસનીયતા પર સીધો પ્રહાર છે.
સવાલ એ પણ ઊભો થાય છે કે એક કર્મચારી ખુલ્લેઆમ આ પ્રકારની પ્રવૃત્તિઓમાં સંકળાયેલો હોવા છતાં સંબંધિત વિભાગ અજાણ કેવી રીતે રહી શકે. શું આ માત્ર બેદરકારી છે કે ગોઠવણબદ્ધ રીતે આંખ આડા કાન કરવામાં આવી રહ્યા છે?
આ પણ વાંચો – અમદાવાદમાં ક્રાઈમ કોન્ફરન્સ યોજાઈ, ચૂંટણીઓને ધ્યાનમાં રાખી કાયદો-વ્યવસ્થાની તૈયારીઓ પર ભાર
