ભારતના વડાપ્રધાન નરેન્દ્ર મોદી અને અમેરિકાના પ્રમુખ ડોનાલ્ડ ટ્રમ્પ વચ્ચે આજે ટેલિફોનિક વાતચીત થઈ છે. આ વાતચીત આશરે 40 મિનિટ સુધી ચાલી હતી. બંને નેતાઓએ વૈશ્વિક મુદ્દાઓ તેમજ ભારત-અમેરિકા વચ્ચેના દ્વિપક્ષીય સંબંધો પર વિસ્તૃત ચર્ચા કરી છે.
આ વાતચીત એવા સમયે થઈ છે જ્યારે અમેરિકી પ્રમુખ ડોનાલ્ડ ટ્રમ્પે હોર્મુઝ સ્ટ્રેટને સંપૂર્ણ રીતે બંધ કરવાનું એલાન કર્યું છે. વડાપ્રધાન મોદીએ વાતચીત બાદ કહ્યું કે, અમે દ્વિપક્ષીય સહયોગમાં થયેલી મહત્ત્વપૂર્ણ પ્રગતિની સમીક્ષા કરી. બંને નેતાઓએ મિડલ ઈસ્ટની વર્તમાન સ્થિતિ પર પણ વિસ્તારથી ચર્ચા કરી અને હોર્મુઝ સ્ટ્રેટને ખુલ્લો અને સુરક્ષિત રાખવાના મહત્ત્વ પર ભાર મૂક્યો.
વડાપ્રધાન મોદીએ ટ્રમ્પને વાતચીત દરમિયાન કહ્યું, “ભારતના લોકો તમને પ્રેમ કરે છે.”
મોદીએ સોશિયલ મીડિયા પ્લેટફોર્મ X પર પણ આ વાતચીતની માહિતી આપી છે. તેમણે લખ્યું, “મારા મિત્ર પ્રમુખ ડોનાલ્ડ ટ્રમ્પનો ફોન આવ્યો. અમે અલગ-અલગ ક્ષેત્રોમાં થયેલી પ્રગતિની સમીક્ષા કરી. અમે તમામ ક્ષેત્રોમાં અમારી વૈશ્વિક વ્યૂહનીતિક ભાગીદારીને વધુ મજબૂત બનાવવા માટે પ્રતિબદ્ધ છીએ. મિડલ ઈસ્ટની સ્થિતિ અને હોર્મુઝને ખુલ્લો અને સુરક્ષિત રાખવા પર પણ ચર્ચા થઈ.”
આ વાતચીત આ વર્ષે બંને નેતાઓ વચ્ચે ત્રીજી વખત થઈ છે અને મિડલ ઈસ્ટમાં યુદ્ધ શરૂ થયા બાદ બીજી વખત છે. અમેરિકી રાજદૂત સર્જિયો ગોરેએ પણ આ વાતચીતને મહત્ત્વપૂર્ણ ગણાવી છે.
આ વાતચીતમાં બંને નેતાઓ વચ્ચે શાંતિ જાળવવા અને આંતરરાષ્ટ્રીય સ્તરે સહયોગ વધારવા પર પણ ભાર મૂકવામાં આવ્યો છે. હાલમાં આખા વિશ્વની નજર આ વાતચીત અને મિડલ ઈસ્ટની સ્થિતિ પર ટકેલી છે.
આ પણ વાંચો – યુદ્ધની આર્થિક મારથી દેવામાં ડૂબેલા વેપારીએ રચ્યો નકલી નોટોનો પ્લાન, અમદાવાદમાં ત્રણ ઝડપાયા
