અમદાવાદ: શહેરમાં નકલી નોટોના એક વધુ કૌભાંડનો પર્દાફાશ થયો છે. શહેરના સ્પેશિયલ ઓપરેશન ગ્રુપ (SOG)એ કાર્યવાહી કરીને ત્રણ આરોપીઓને ઝડપી પાડ્યા છે અને તેમની પાસેથી ₹500ની 133 નકલી નોટો જપ્ત કરી છે. આ ઘટનાએ શહેરમાં ફરી એકવાર ચકચાર મચાવી છે.
પોલીસ સૂત્રોના જણાવ્યા મુજબ, બાપુનગર વિસ્તારમાં નકલી નોટો ફરતી કરવાની તૈયારી ચાલી રહી હોવાની ચોક્કસ બાતમી મળી હતી. જેના આધારે પોલીસ ટીમે વોચ ગોઠવી અને શંકાસ્પદ હલચલ પર નજર રાખી. યોગ્ય સમયે દરોડો પાડી ત્રણેય આરોપીઓને રંગેહાથ ઝડપી લેવાયા હતા.
પકડાયેલા આરોપીઓમાં મોરબીનો સિરામિક વેપારી અનિલ ઈશ્વર, ભાવેશ મકવાણા અને જીતેન્દ્ર પ્રજાપતિનો સમાવેશ થાય છે. પૂછપરછ દરમિયાન બહાર આવ્યું છે કે નકલી નોટો લીંબડી ખાતે ઝેરોક્સ મશીન દ્વારા છાપવામાં આવી હતી. અનિલ ઈશ્વરે ભાવેશ મકવાણાને સંપર્ક કરી એક લાખ રૂપિયાની અસલી રકમ સામે ત્રણ લાખની નકલી નોટોની માંગણી કરી હતી, જે કામ આગળ વધારવા ભાવેશે પોતાના મિત્ર રાહુલ કાલિયાને જોડ્યો હતો.
તપાસમાં ખુલ્યું છે કે આંતરરાષ્ટ્રીય સ્તરે અમેરિકા અને ઈરાન વચ્ચે ચાલી રહેલા તણાવની અસર સિરામિક ઉદ્યોગ પર પડી હતી. આ કારણે અનિલ ઈશ્વરને વેપારમાં ભારે નુકસાન સહન કરવું પડ્યું હતું અને અંદાજે ₹30 લાખનું દેવું થતાં તેણે ગેરકાયદેસર રસ્તો અપનાવ્યો હતો.
પોલીસના હાથે ઝડપાયેલા જીતેન્દ્ર પ્રજાપતિનો ભૂતકાળ પણ શંકાસ્પદ રહ્યો છે. તે અગાઉ ડ્રગ્સ અને દેહવ્યાપાર જેવા ગુનાઓમાં સંડોવાયેલો હોવાનું બહાર આવ્યું છે. આરોપીઓ લીંબડીમાં નોટો છાપ્યા બાદ અમદાવાદમાં એકત્ર થયા હતા, પરંતુ બજારમાં નોટો ફેરવતા પહેલા જ તેઓ પોલીસના જાળમાં ફસાઈ ગયા.
હાલમાં પોલીસે ત્રણેય આરોપીઓ સામે કાયદેસરની કાર્યવાહી હાથ ધરી છે અને મુદ્દામાલ કબજે કર્યો છે. સાથે જ આ નકલી નોટો અગાઉ બજારમાં ફેરવાઈ હતી કે નહીં અને આ રેકેટમાં અન્ય કોણ સંડોવાયેલ છે તે દિશામાં વધુ તપાસ શરૂ કરવામાં આવી છે.
આ પણ વાંચો – અમરેલીના લાઠીમાં સ્ટેટ મોનિટરિંગ સેલનો મોટો દરોડો : 57.89 લાખનો વિદેશી દારૂ જપ્ત, 6 આરોપી ઝડપાયા
