- 210 કરોડનું સાયબર ફ્રોડ : વડોદરા સ્થિત ગેંગે 15 બેંકોને નિશાન બનાવી, ભાવનગર બેંકમાંથી 7 કરોડ ચોરી
ગુજરાત પોલીસના સાયબર સેન્ટર ઓફ એક્સેલન્સની ટીમે એક મોટું અને અત્યંત મહત્ત્વપૂર્ણ ઓપરેશન હાથ ધરીને આંતરરાજ્ય સાયબર ગઠિયાઓની એક મોટી ગેંગને પકડી પાડી છે. આ ગેંગે દેશભરની 15થી વધુ બેંકોને નિશાન બનાવીને અંદાજે 210 કરોડ રૂપિયાનું સાયબર ફ્રોડ આચર્યું હતું.
સૌથી મોટો કાંડ ભાવનગર ડિસ્ટ્રિક્ટ કો-ઓપરેટિવ બેંકનો હતો. ગેંગે ધૂળેટીની એક રાતમાં જ બેંકની સિસ્ટમ હેક કરીને 7 કરોડથી વધુની રકમ ચોરી કરી લીધી હતી. આ ગેંગ વડોદરા સ્થિત હતી અને તેના સભ્યો આંધ્રપ્રદેશ, ગુજરાત, હરિયાણા, કર્ણાટક, મહારાષ્ટ્ર, તામિલનાડુ, ઉત્તરપ્રદેશ અને પંજાબ જેવા અનેક રાજ્યોમાં સક્રિય હતા.
તપાસમાં સામે આવેલા ચોંકાવનારા આંકડા
સાયબર સેન્ટર ઓફ એક્સેલન્સની તપાસમાં જાણવા મળ્યું છે કે આ ગેંગે અત્યાર સુધીમાં 273 સાયબર ગુનાઓ આચર્યા છે અને કુલ 210 કરોડ રૂપિયાનું ફ્રોડ કર્યું છે. આરોપીઓએ બેંકના CBS (કોર બેંકિંગ સર્વિસ) સોફ્ટવેરમાં રહેલી ટેક્નિકલ ખામીનો લાભ ઉઠાવ્યો હતો.
કૌભાંડની રીત
ગેંગે સૌપ્રથમ બેંકના જૂના અને નિષ્ક્રિય (dormant) એકાઉન્ટ્સને ટાર્ગેટ કર્યા. તે એકાઉન્ટ્સના રજિસ્ટર્ડ મોબાઈલ નંબર બદલીને પોતાના નંબર એક્ટિવ કરી દીધા. ત્યારબાદ સિસ્ટમની ખામીનો ઉપયોગ કરીને તેમણે વર્ચ્યુઅલી રકમ જનરેટ કરી. છેલ્લે આ રકમને સગેવગે કરવા માટે સામાન્ય લોકો પાસેથી આર્થિક લાલચ આપીને 135 અલગ-અલગ બેંક એકાઉન્ટ્સ ભાડે લીધા અને તેમાં પૈસા ટ્રાન્સફર કરી દીધા.
પોલીસની કાર્યવાહી
આ ઓપરેશન ગુજરાત પોલીસ વડા (CID ક્રાઈમ અને રેલ્વેઝ) ડૉ. કે. લક્ષ્મી નારાયણ રાવ અને સાયબર સેન્ટર ઓફ એક્સેલન્સના પોલીસ મહાનિરીક્ષક બિપીન આહિરના માર્ગદર્શન હેઠળ હાથ ધરવામાં આવ્યું હતું. પોલીસ અધિક્ષક ડૉ. રાજદીપસિંહ ઝાલા, સંજય કેશવાલા અને વિવેક ભેડાના સુપરવિઝન હેઠળ પીઆઈ જી.બી. ડોડીયા, એચ.જે. પરમાર અને એચ.વી. દેસાઈની ટીમે હ્યુમન સોર્સ અને ટેક્નિકલ એનાલિસિસની મદદથી આખી તપાસ કરી.
પોલીસે અત્યાર સુધીમાં 7 આરોપીઓની ધરપકડ કરી છે. તેમની પાસેથી 9 પાસબુક, 39 ડેબિટ કાર્ડ, 12 ચેકબુક અને 4 મોબાઈલ ફોન જપ્ત કર્યા છે. તપાસ દરમિયાન છેતરપિંડીથી મેળવેલી રકમ પૈકી 2.04 કરોડ રૂપિયા ફ્રીઝ કરવામાં આવ્યા છે.
પકડાયેલા આરોપીઓ
અબ્દુલ પઠાણ – બેંક એકાઉન્ટ ઓપન કરીને પૈસા ઉપાડીને આપતો
વિવેક વણઝારા – મિત્રો સાથે એકાઉન્ટ ખોલાવડાવીને કમિશન લેતો
મયંક બૈરવા – બેંક એકાઉન્ટ ઓપરેશનમાં સહયોગી
રોહિત વર્મા – બેંક એકાઉન્ટમાંથી પૈસા ઉપાડીને કમિશન મેળવતો
મોહિત રાવલ – મોબાઈલ શોપથી ફ્રોડ નેટવર્ક સાથે જોડાણ
દિપેશ રાજપુરોહિત ઉર્ફે મોન્ટુ – મુખ્ય સંચાલક, 40 જેટલા એકાઉન્ટ્સનો હેન્ડલર
પોલીસે જણાવ્યું છે કે મુખ્ય સૂત્રધારની શોધખોળ હજુ ચાલુ છે અને આગામી દિવસોમાં વધુ ચોંકાવનારી વિગતો સામે આવી શકે છે.
આ પણ વાંચો – હોર્મુઝ સ્ટ્રેટમાં ભારતના ઝંડા વાળા બે જહાજો પર ગોળીબારી, ભારતે ઈરાનને મોકલ્યો સંદેશ
