સુરત: ડાયમંડ સિટી સુરતના વરાછા વિસ્તારમાં આજે કાયદો અને વ્યવસ્થાના ધજાગરા ઉડાવતી એક સનસનીખેજ ઘટના સામે આવી છે. ધોળા દિવસે અને ધમધમતા વિસ્તારમાં આવેલી સ્ટેટ બેંક ઓફ ઈન્ડિયા (SBI) ની શાખામાં ચાર હથિયારધારી લૂંટારુઓએ ત્રાટકીને અંદાજે 50 લાખ રૂપિયાની લૂંટ ચલાવી છે. આ ઘટનાને પગલે સુરત પોલીસ વિભાગમાં દોડધામ મચી ગઈ છે.
ફિલ્મી ઢબે લૂંટની ઘટના
મળતી માહિતી મુજબ, આજે સોમવારે બપોરના સમયે જ્યારે બેંકની કામગીરી ચાલુ હતી, ત્યારે ચાર અજાણ્યા બુકાનીધારી શખ્સો હથિયારો સાથે બેંકમાં ઘૂસી આવ્યા હતા. લૂંટારુઓએ અંદર પ્રવેશતાની સાથે જ ફિલ્મી સ્ટાઈલમાં બેંકના કર્મચારીઓ અને હાજર ગ્રાહકોને બંદૂકની અણીએ બંધક બનાવી લીધા હતા. લૂંટારુઓએ હથિયાર બતાવીને બેંક સ્ટાફને ડરાવી-ધમકાવી કેશ કાઉન્ટર અને સ્ટ્રોંગ રૂમમાંથી આશરે 50 લાખ રૂપિયાની રોકડ રકમની લૂંટ કરી હતી.
પોલીસનો કાફલો ઘટનાસ્થળે
માત્ર ગણતરીની મિનિટોમાં લૂંટની ઘટનાને અંજામ આપીને ચારેય લૂંટારુઓ ત્યાંથી નાસી છૂટવામાં સફળ રહ્યા હતા. લૂંટારુઓ ગયા બાદ તુરંત પોલીસને જાણ કરવામાં આવતા, વરાછા પોલીસ સહિત ઉચ્ચ અધિકારીઓનો કાફલો તાત્કાલિક બેંક પર દોડી આવ્યો હતો. પોલીસે બેંકના સીસીટીવી ફૂટેજ કબજે કર્યા છે અને લૂંટારુઓ કઈ દિશામાં ભાગ્યા છે તે જાણવા માટે તપાસના ચક્રો ગતિમાન કર્યા છે.
સમગ્ર શહેરમાં નાકાબંધી
પોલીસે આસપાસના રસ્તાઓ પર નાકાબંધી કરી દીધી છે અને શંકાસ્પદ વાહનોનું ચેકિંગ શરૂ કર્યું છે. ધોળા દિવસે થયેલી આટલી મોટી લૂંટની ઘટનાએ સુરતની જનતામાં ભયનો માહોલ પેદા કર્યો છે, સાથે જ પોલીસ પેટ્રોલિંગ પર પણ ગંભીર સવાલો ઉભા થયા છે. પ્રાથમિક તપાસમાં લૂંટારુઓ રીઢા ગુનેગાર હોવાનું જણાઈ રહ્યું છે.
આ પણ વાંચો – નેતાઓ નહીં, પ્રોફેશનલ્સ નક્કી કરે છે રણનીતિ: બંગાળમાં આઈ-પેક (I-PAC) અને આઈટી સેલ (IT Cell) વચ્ચેનો જંગ
